Da Ponzano Veneto (TV)

Me sorela Wally

Primi ani ’50. I me fràdèi: da sin., Gabriella, Carla, Gaetano, mi, Wally e Roberta.

Me sorela Wally nel 1969 e, soto, nel 1972.

De le volte càpita de ’ver voja de ricordar coalchedun che ga lassà un segno inportante nel nostro cuor. Tra le creature che ga segnà de più la me vita ghe xe stà me sorela Wally. Anca éla come mi, e come tuti i tini mucini de i driti la ga seguìo na strada particolar.
La ga fato le scole elementari de paese in paese, e anca éla xe stà tante volte descriminada. La gera più vecia de mi de quatro ani, e cussì se ’ndava a scola insieme, tegnéndose par man. Come tanti putèi de giostrari in serti posti e in serte scole no se jera ben aceti da i conpagni, e tante volte gnanca da le maestre: se sentìvimo pessi fora de l’aqua. Me sorela Wally, però, la me ga senpre fato corajo, la me diseva :
“Dài, Silvano, tien duro, tanto tra qualche dì saremo da naltra parte, co putèi novi. Sarà tuta naltra roba.” Cussì, anca se me sentivo fora posto, sentir la so vose zentil, me dava forsa de ’ndar in classe co manco spàsemo, pensando che sarìa stà solo par poco.
No la xe ’ndada oltre la scola elementar, parché come se usava, la xe ’ndada a dar na man a la mama e al papà par titar ’vanti la baraca. Me la ricordo toseta, drio el banco del tiro a stròpoi, che sarìa stà un tiro a segno co carabine che sparava su stròpoi de sùgaro. Me dispiaseva védarla far quel lavoro, parché come capitava a tute ’e tini pischerle, la vegneva ciamada o tratada da i tosati che vegneva a sparar, co parole poco piasévoli e de poco gusto. Par fortuna che sta atività ga durà poco, parché el scòter, ne faseva guadagnar ben e far na vita più che dignitosa. ’Lora co le altre tre me sorele la se ga dedicà a i umili lavori de casa, o mèjo de carovana: la tegneva ordine, la lavava a mastelo, la andava a tor aqua co i seci par far da magnar, par le pulissìe e par lavarse. Na volta granda, xe rivà anca par éla el momento de i amori zovanili, la se ga incapà in un tini raclo venessian che co la so Vespa vegneva drìo al nostro Luna Park par catarse co la Wally. Pareva che tuto ’ndasse a maraveja, ma sto inamoramento se ga desfà come neve al sol e cussì no se ga più visto el Celentano, cussì el gera ciamà sto moroso par via de na somejansa co el cantante, e la so Vespa rossa. Dopo quela delusion de amor, la Wally de inamorarse no la ga più vossùo savérghene e la se ga dedicà corpo e ànema a curar la mama e anca el papà. La ga seguità a preparar da magnar ne la carovana par tuti, conpresi i tini racli, che jera al nostro servissio par jutarne a montar e smontar le atrassion.
La xe stada ecessional, parché el so operar ga fato in maniera che noaltri fradèi e genitori podéssimo èssar liberi par altre mansion. Có me papà se ga malà, la ghe xe stada drio par ani, la xe stada na infermiera straordinaria, stàndoghe da vissin fin a la so morte, có el gaveva sessantatre ani. Co la mancansa del papà se ga serà un mondo par noaltri e ga scumissià el declino de la nostra atività; go visto la Wally lavorar come un omo par tegner sù la giostra co me mama, ma le ga dovesto cédar e cussì se ga vendùo lo scòter a un parente, e solo me fradelo Gaetano ga continuà co altre atrassion inportanti a mòvarse ben ne i Luna Park, tegnendo alto el nome de la fameja.
Me pianse ancora el cuor a ricordar ’sti fati. Fenìa l’aventura in ’sto mondo da no credar, de spetàcolo viagiante, che ben pochi conosse ne i so risvolti più sconti, la Wally e me mama Giulia, se ga ritirà ne la nostra vèra casa de piera a Villorba e grassie a vari apartamenti, a un bar e a un distributor de benzina “ESSO” le ga podesto vìvar ben. Me mama e la Wally po’ xe stà punto de riferimento par i nevodi, soratuto par el me fiolo, e xe stà par merito de lore, che lo ga rancurà co amor,visto che la mama no ghe jera, che mi go podesto insegnar.
Po’ Wally ghe xe stà drìo a me mama có la se ga infermà e, có la se ga trovà sola, la xe ’ndada a star co la sorela più vecia, ma solo par pochi ani, parché la se ga malà e la xe morta a soli 59 ani. Có la go vista sensa vita, me xe passà par la mente i momenti vivesti co éla soratuto da tini mucini, có la me tegneva par man andando a scola. No la ga avesto na vita fortunada, e cussì come riconpensa, me piase pensarla beata tra i ànzoli insieme a la mama e al papà. A mi resta coalche scrùpolo, pensando de no èssarghe stà più de tanto da vissin, ma so’ sicuro che un giorno la trovarò e me farò ancora ciapar par man ne la scola de i ànzoli.

[torna sopra]