|
Da Adria (RO)
I dó sinque schei
Questa l’è na storia vecia, ma vecia forte, capità ani anorum fà in Arian, ch’a m’è stà riferì da persona de l’età d’i mi genitori. Marino el jera un ragasseto che ’l lavorava come comesso da un feramenta in Arian. Sta botega la vendeva canfini, frali da stala, candelieri in fero e lumi a ’cetilene, e po’ ciodi, cavece, broche, brucun e vide e fil de fero, rede e reticolati, sape, vanghe, rastèi, cortèi, segheti e messure, feri da segare e forche e vari altri artegagni par lavorare la tera, conpresi i gumieri e i denti da àrpesi e da falciatrici a cavalo. Insuma tuto quel ch’a serviva in canpagna.
L’enporio el jera un gran camaron co’ d’i scafali tuti tornovìa a i muri, alti fin a i sufiti, che par rivare a tore i tòchi in alto bisognava ranpegarse su le scale a piròi. Anche se tuto jera ben messo e ordenà, a ghe voleva na bona memoria par savere indove catare le diverse robe.
Dentro i ghe lavora in tri: il sior Agènore – el paron – che ’l gheva ormai più de sinquant’ani, so nevodo Gineto – ch’a se pol dire che ’l fusse cressù in botega – un marcantonio grande e grosso cofà ’n armaron, che in botega el jera na mana, primo parchè el rivava gnonde che st’altri i gheva bisogno de la scala e secondo parchè da lu solo el moveva i quintài come s’i fusse caresina; el terso jera apunto ’n omo de botega, Marino, un fiolato de sedes’ani, tanto bon e ubidiente, ma pitosto ìndrìoto par no dire gnoco dal tuto.
El sior Agènore el se lo tegneva più par conpassion che par altro. El jera orfano de pare, so madre se rangiava par mandar avanti la baraca, fasendo la serva de qua, andando a giornata de là, a catare i pumi in stason, a spigare el formento d’istà, a far sù qualche fassina quando ch’ i scapava i sàlesi, lassando in tera le brùscole, che ela se rancurava par brusarle inte ’l camin. El fiolo, bon ma gnoco, praticamente el n’jera bon da gninte; el faseva solo quelo che i ghe ordinava, ma l’avesse da tor n’inissiativa par conto suo, el restava lì a man scrulun, vardandose in giro cofà ’n aloco.
El sior Agènore a fine setimana el ghe slungava dó palanche sbuse, ma par quel che ’l faseva le jera anca massa. El jera bon solo de scoare in tera, netare un fià in giro co’ la strasseta e da tirare el caretin có gh’jera da portare via qualcossa che no ’l fusse né massa distante e né massa pesante. Par farghe capire na roba bisognava spiegàrghela almanco tre volte e gnancora se podeva essere sicuri che ’l se la fusse ficà ben inte la crapa. E le spiegassion cadéa che le fusse ciare e curte sensa conplicassion de sorte, sinò te ghe le sercavi de far capire diese volte e a la fine te ghe domandavi: “Marino, è tuto ciaro par ben?” E lu rispondeva sensa falo: “Sì, sior!”
Alora pa’ far riscontro te ghe disivi: “Alora dime ben cossa ch’a tegà da fare.” “A ne me lo ricordo mina massa ben adesso.” A sto punto jera mèjo molàrghela e darghe n’antra inconbensa, sensa tanto inpegno.
Càpita na volta che ’l sior Agènore el lo manda dal tabacaro par tore de le cartine da sigarete e un bolo da létera. El tira fora dal scarselin del gilè dó monedine da sinque schei (jera ancora i tenpi che girava le palanchine, i diese e cinque schei) el ghe le peta in man, lassàndolo andare. No passa diese minuti che Marino torna tuto sudà par la corsa ch’l’éva fato. In man el gheva ancora i dó sinque schei. ’Pena rivà su la porta, tirando el segon pa’ fià curto, el fa: “Quali èi i sinque schei de le cartine e quali par el bólo?”
No ve digo l’espression del sior Agènore e de so nevodo Gineto a st’ussita veramente fora da le vade.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
El dovere de la memoria
Ricordare el tenpo passà, i nostri cari, la nostra vita de ieri, le persone de ieri, el sacrificio de quanti, par amor de Patria, i xe morti in nome de la so e nostra libertà: el xe on preciso dovere morale e civile de tuti quanti.
de Mario Sileno Klein
|
