|
Da Maran Lagunare (UD)
Le vece orassion de "Nona Angelina"
 |
| "Nona Angelina" in cesa co i fantulini del'asilo: la posa par la foto ricordo. (foto L. Maurini |
Go trovò in t'una casseta registrada nel 1990, ste vece orassion de Angelina Milocco ciamada da duti "Nona Angelina", la dona più ansiana del Trivèneto. Infati la gera nata el 24 otobre del 1889, e la xe mancada el 18 giugno del 1998: come se pol notà, fasendo i cunti, par quatro misi circa, no la xe rivada a conpì 109 ani.
Trascrivéndole propio come che ela la le disi, go notò che la forma la xe più antica de altre (squasi conpagne) che le fa parte de 'na mia racolta.
Le go risentìe cò emossion parché la cognossevo ben essendo stada cò gero fantulina del so visinal, e po', fin da quando la veva conpìo 100 ani ghe scrivevo a ogni "primavera" 'na dèdica o poesìa, che ela la veva senpre gradìo.
'Desso come altri, "Nona Angelina" la fa parte de i personagi maranisi, lassàndone in eredità par la so fede ne la dura e sènplice vita, el so bel ricordo.
El segno de la crose
Aqua santa bàgneme
Spirto Santo ciàmame
nemico fate indrìo
che ghe dago l'ànema a Dio.
La Comunion
Me also duta consolada,
che go ricevesto el gran figlio de Dio
da la mano del Sacerdote che me l'ha dato,
me pentisso dei miei pecati.
Un bon fin
Mi me levo a la bonora
cò San Josepo e la Sua sposa,
vegno da Vu, Signor, cò gran speransa
parché sé la - Crose Santa -
- Crose Santa - Crose Degna -
Dio me varda, Dio mi segna,
basarò la Santa Tera
parsiò che la me conserva
a bon fin de la Vita Eterna. Amen.
L'angelo de Dio
Mi vago a leto
cò l'Angelo perfeto,
cò l'Angelo de Dio,
cò San Bortolo mio,
cò Santa Elisabeta,
cò dodese Apostoli,
cò quatro Evangelisti,
sta preghiera
tre volte la disarò
che le pene de l'inferno
no le tocarò.
Vu savè tre grassie
che Vu me dé,
ve dimando - Confession -
- Comunion - Ojo Santo -
in nome del Padre
del Filio e de lo Spirito Santo.
Orassion in Simiterio
àneme sante, àneme purgante,
preghé Dio par naltre
che naltre pregaremo par valtre.
Valtre sé là
e naltre vegnaremo
quando che a Dio ghe piasarà.
Orassion del matin a Nostro Signor
Ghe dago el bongiorno
al mio Signore
che 'l xe fito in quela crose,
quela crose tanto bela
che la riva in siel
e in tera,
quela crose tanto dolorata
che 'l Signor se la ben
conquistata.
Quando che 'l mondo finissarà
Nostro Signor
in tera el vegnarà
a mostrane le sue Santissime
sinque piaghe.
Tremarà la nostra ànema
tremarà el nostro corpo,
come trema la foja
de l'àlbaro.
Chi la sinti dì
sta orassion la inpararà
e chi no la disarà
el zorno del giudissio
dolente e pentìo
el se ciamarà. Amen.
Ave Maria
Ave Maria
grassiosa e pia,
Venere eletta
che fussi concetta
sensa pecato
fruto serato.
L'ànema costante
el corpo tristo
me ve racomando a Vu
Madre de Cristo,
Vu se in gloria dei beati
perdoneme duti i pecati.
Perdoneme se ve go ofeso,
se ve go ofeso
par ignoransa
deme perdon, pietà,
misericordia e perdonansa.
Bon Nadal
Ama Dio, non falire
fa prudensa chi che vuole,
ama Dio di buon cuore,
di buon cuor,
'na bona voce
ama Dio su la croce,
su la croce una colona
ama Dio e la Madona,
la Madona la xe 'ndada in siel,
ama Dio e San Micel.
San Micel xe re dei Santi
ama Dio e duti quanti.
Bona note di Natale
canta canta rosa in fiore
che xe nato Nostro Signore,
in Betleme, in una stala,
tra el bue e l'asinel
xe nassùo un pupo bel.
Chi la sa sta' orassion
ben el fa
e se insieme a ti la digo
Dio ne daga el Paradiso.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Giugno:
Editoriale
Informare rispetando la persona
Qua ultimamente i mezi de comunicazion - radio, TV, giornài - i va via de ficheton, meténdone al corente de robe che pezo no le podarìa èssare
de Mario Klein
Da Belun
Vincenzo Savio an Véscovo Salesiano
de Luigina Tavi
|
