|
Linguìstica (in veronese)
Benedeto dialeto!
 |
| Par che 'l diga: "Lassème zugar e parlar in dialeto!!!" |
"Par piaser, mama! Par piaser, bopà! No ste a parlar in dialeto col buteleto! Parlèghe talian! "dise la fiola consegnàndoghe el bocia ai soi. E i noni, mortificà parché no ocoréa mia che la ghe lo disesse, i se fa sù le màneghe par çercar de afrontar sta situazion par lori assè difìçile e ingarbuià.
Ciò! El neodeto el parla ben el talian parché no 'l conosse altra lingua par comunicar. A l'asilo le maestre le ghe parla talian, el bopà e la mama anca e cossì i buteleti che lu 'l frequenta a scola e a casa. Ma ancò gh'è festa nazional e la mama la ga 'n inpegno, cossì eco che vien boni i noni col so... asilo privato.
In casa el bocia el se stufa e alora el nono el pensa de menarlo ai giardini pùblici, cossì là el pol sfogarse ben. L'omo el çerca sùbito 'na bancheta indó sentarse e intanto el neodeto de quatro ani el core su l'erba come 'na passareta 'pena volà lìa dal gnaro.
Ma el dì avanti ga piovù e el nono el ga 'na gran paura che el bocia el se sporca... Lo savìo, senò, che supa che 'l ciaparìa da so moier e da la fiola?
"Corri piano che se strabucchi dopo ti smèrcoli tutto! - ghe çiga drio el nono. Ma el neodeto el se scalmana ancora de pi, tanto che a l'omo ghe vien el dubio che no 'l gabia capìo chel che 'l ghe ga 'pena dito in talian. Alora el ghe ripete: "Ciò!? Ti ò appena çigato di corere piano che se ti intrapetti ti sporchi come un mas-ceto!" Ma 'l neodeto o no 'l capisse o no 'l scolta e corendo el sbrissia finendo longo desteso, come un pantazo, sul paltan lassà lì da 'na pocia de piova.
Alora el nono el perde el controlo de i nervi e... del so talian. El tira sù el neodo da tera e dopo 'verghe dà un bel sculazon el ghe urla te le rece: "Te l'avéa dito, bruto àseno che no te si altro, che te te sporcài tuto come un mas-cio! Ma ti no te scolti mai! 'Desso cossa ghe digo mi a to nona e a to mare? Le dirà che son insemenìo!"
El bocia el lo varda co i oci pieni de lagrimoni fin a l'orlo e co i brazeti verti. L'è drio a s-ciopar in te un pianto pien de sangiuti. Me digo che no 'l ga mia capìo chel che ghe ga 'pena dito so nono e pare inveçe che 'l sia lì che 'l çerca aiuto e conprension. Alora el nono el capisse che 'l ga fato un fià massa el rùstego e el çerca de indolçirse. Par prima roba el se sforza de miliorar el so talian: "Dai, caro, no è sucesso gniente. Ma bisogna che te sipi più tento perché sei massa svanito!" E el se strapega drio pa' un brazo, verso casa, el neodeto che 'l camina de mala oja, fregàndose i oci aluvionà.
A casa, come che lo vede so nona, el talian el va de colpo a farse benedir. Tuta colpa de la fufa! "Maria santissima! - la urla ciapàndose la testa fra le man. - Desso 'sa ghe disemo a to mare? E ti, sito vecio par gnente? La dirà che te te sì rinbanbìo! Ma varda ti che roba!" El nono el sta çito, ma dopo, un fià mortificà, el ghe ricorda a la furia de so moier che davanti al bocia i ga da parlar talian. No 'l l'avesse mai dito! "Maché talian e talian! - ghe urla la dona. - L'è sporco come un porzelo e ti te me parli del talian?" El bocia intanto el seita a pianzotar e fra i sangiuti el dise: "E adesso... cosa dirà... la mamma?... Mi farà... totò... sul sederino...!" e zo a piànzar come 'na vegna 'pena bruscà. "Non piànzare, angeletto de la nonna! - ghe fa la dona strenzéndoselo sul cor e metendo finalmente soto controlo el so talian. - 'Desso ti caviamo via tutta la smèrcola che ciai e ti struziamo bene anche le scarpe. Cossì ti lustriamo bene e la mamma non ti s-ciafa le mane!"
Po', eco la mama che la va torse el fiol e, co i so oci da falcheto, la vede sùbito che 'l vestitin 'pena sfodrà el ga de le onfegadure sul davanti. La se imàgina sùbito tuto! "Come ti sei sporcato? - la ghe domanda in talian parfeto al fiol - "Il nonno... - el fa sto chì segnando col deeto el poro omo che 'l pare fermo a piè descalzi sora le bronze... Alora anca la tosa la perde el controlo del so talian e la va zo de brenton. "No se pol mai fidarse de lassarve i fiòi! Tanta fadiga par tegnerli neti e vualtri me li dè indrìo tuti smercolà!" la çiga. El bocia, no capendo el dialeto, el varda a boca verta la sèna e el se neta co la mànega del vestito le candele del naso.
La mama, co i nervi tirà come le corde de 'na chitara, la tol sù co malagrazia el fiolo e ostregando a meza oçe la infila la porta senza saludar, lassando i soi come du saladi tacà al baldachin a staionarse. Se sente pestolar zo par le scale e 'na voçeta che la domanda: "Mamma! Cosa vuol dire 'tutto smercolà?" Domanda senza risposta. Ma quanto belo sarìa che 'l dialeto el gavesse un fià de considerazion ne le scole, cossì che un bocia el podesse capir 'sa vol dir "smercolà" senza el bisogno de l'interprete.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Giugno:
Editoriale
Informare rispetando la persona
Qua ultimamente i mezi de comunicazion - radio, TV, giornài - i va via de ficheton, meténdone al corente de robe che pezo no le podarìa èssare
de Mario Klein
Da Belun
Vincenzo Savio an Véscovo Salesiano
de Luigina Tavi
|
