|
Editoriale
Informare rispetando la persona
Qua ultimamente i mezi de comunicazion - radio, TV, giornài - i va via de ficheton, meténdone al corente de robe che pezo no le podarìa èssare
 |
| G.B.Tiepolo, Decollazione del Battista, 1733, Bergamo, cappella Colleoni. Anca questo el xe on fato stòrico, ma la sèna no fa el stesso efeto de le foto incriminà. |
Ormai la xe na gara a chi mostra e a chi trasmete pi notizie, superando i lìmiti stabilìi da la decenza, da la deontologia professionale e dal rispeto de i altri. Par no ciaparse indrìo, rispeto a la TV, 'desso se ga messo anca la radio a trasmétare la so parte de òrido.
No xe bastà bonbardarne par giorni e giorni co le fotografìe de le torture de i prigionieri iracheni ne la preson de Abu Ghraib, sùbito incalzà da quele de l'ostagio merican che ga fato chea bruta fine che tuti conossemo: bisognava zontarghe anca el "sonoro"
(13 majo, RAI 1), ocoreva far sentire i zighi de disperazion de sto poro disgrazia in mezo ai urli de i so carnèfici che inalzava orazion al so Signore, come se i fusse drio sacrificarghe na bestia qualunque.
La matina dopo - me catavo in màchina - da la radio inpizà par farme conpagnìa durante el viajo, go sentìo co le me rece na tenpestada de proteste parché mai la radio la jera rivà a tanta barbarie: quela de avere mandà in onda la registrazion de la morte violenta, zontando violenza a violenza.
Quelo che curava la trasmission el sostegnéa che bisogna informare la gente parché la se fassa na idea e parché la senta el bisogno de contestare quanto xe sucesso. In altre parole, par insegnare che no bisogna tocare i fili de
la corente senò se more, secondo sto autorévole parere, xe ben far védare uno che xe drio pèrdare la vita tocando i fili, e far sentire par radio i zighi de disperazione fin che 'l xe drio lassarghe le pene!
Robe da mati! Robe che no dovarìa stare né in cielo né in tera. E invesse le viaja "via etere" e le ne riva dal cielo in casa nostra, senza averle né ordinà, ne ciamà, e tantomanco dito che le ne piase! Za semo disturbà e inoridìi nel vegner savere quelo che xe sucesso, bisogna anca isìstare inpietosamente su la tragedia, butàndone 'dosso na scàrica de crudeltà. Xe proprio cussì che nasse el scontro de culture, religion e civiltà.
Ma no la xe finìa qua: ghe xe giornài che ga publicà foto che fa inoridire, disendo de avere mostrà el "fato stòrico", come, par esenpio, certe òpere d'arte le mostra la testa de Giovani Batista so na guantiera. El paragon no pol règere: mejari de ani ne separa da quando xe capità el fato, mentre in quelo de 'desso a ghe semo drento
con tuta la nostra sensibilità e la nostra potenzialità psìchica.
Xe ora de finirla de trincerarse drio on conceto tuto personale de la libertà, ignorando conpletamente che la to libertà finisse dove scominzia la mia. Libertà vol dire proprio sotostare a règole che va ben par tuti e tien conto de lìmiti, inpegni, òblighi e responsabilità.
Chi esèrcita la profession de l'informazion no pole desmentegarse che al dovere de informare ga da conpagnarse senpre el rispeto de la persona: se ghe manca sta qualità fondamentale el xe scarsamente professionale e, oltre tuto, el pròvoca on dano enorme a la so categorìa e no 'l pole certo contribuire a far créssare la conossenza, el dialogo e la civiltà.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Giugno:
Editoriale
Informare rispetando la persona
Qua ultimamente i mezi de comunicazion - radio, TV, giornài - i va via de ficheton, meténdone al corente de robe che pezo no le podarìa èssare
de Mario Klein
Da Belun
Vincenzo Savio an Véscovo Salesiano
de Luigina Tavi
|
