|
Da Belun
Vincenzo Savio an Véscovo Salesiano
 |
| Mons. Vincenzo Savio, Véscovo de Belun e Feltre... fin al 31 marzo 2004. |
"La speranza che mai no l'è finida..." me fa créder che Vincenzo Savio al sìe ancora qua, longo ste nostre strade, com'era fàcile incontrarlo. Ma, chi èrelo Vincenzo Savio? Prima de tut an Salesiano, co indoss "quel che de profumo da San Giovanni Bosco". Al primo incontro al rivéa a farse voler ben e... da tuti! Era come incontrar, so sto mondo càrico de tenpeste, n'arcobaleno, grando, che féa veder seren: an vero "pont" fra sponde anca diverse. Vincenzo Savio, nat a Osio Sotto, diocesi de Bergamo, al 6 aprile 1944, l'à scominzià a far parte de la Fameja Salesiana a diese ani, quando "co la valisa de carton" sto tosatel, co gran voja de studiar, al passa da la so fameja, numerosa e par gnent siora, a quela Salesiana de Strada Casentino (Arezzo). Studi ginasiali, altri studi a Lucca (Pietrasanta), al decide pa na profession religiosa, corso filosòfico a Nave (Brescia), Licenza in teologìa a Roma, Univ. Pont. Salesiana; l'é Sacerdote Salesiano al 25 marzo 1972, Roma, Basìlica Sacro Cuore-Congregazione Figli Don Bosco. Animatore vocazionale e de l'oratorio a Savona, a Livorno dove dal '77 a l'85 l'é Pàroco te na Parochia Salesiana. Novi studi a Roma e ne l'87 l'é nominà Segretario generale Sinodo fiorentino, dal Cardinal Piovanelli arcivéscovo de Firenze. Nel 1990 l'é diretor de la Comunità Salesiana de Alassio; 14 aprile '93 nominà Véscovo de Livorno, consacrà al 30 maio. Al 9 dicenbre 2000 ècolo Véscovo de Belun e Feltre, al riva al 18 febraro 2001, in sostituzion del Véscovo Pietro Brollo - "an furlan fiol de 'n Bocia del '99, come mi, e che so an zerto senso, sentìe fradel." Sì, m'era despiasest de sto trasferimento da Belun a Udine, ma ere contenta par Lu... Cossa elo de pi bel de catarse so la propia tera!
Mons. Vincenzo Savio, dal mar a la montagna, l'é an Pastor che no speta le pecore a l'ovile, al ghe va incontro par conosserle mèjo. E eco, me lo vede: gaban scuro, siarpa bianca, longa... traverse la strada e: "Bongiorno, se no sbalie Lu l'é al nostro Véscovo." "Sì." al me risponde strenzéndome la man. Ghe dighe al me nome e Lu, rivolto a Don Diego che lo conpagnéa: "Questo è il mio Segretario." E mi, dato che ere co Chica, la me cagneta, (che da quel dì presente cossì): "E questa è la mia segretaria." E, al Véscovo: "Ma è brava come il mio Segretario?" Li ò vardadi tuti do e me son trovada a dir de paca: "Beh! Senz'altro è più segreta, senza ofendere il segretario." Pense che Chica ghe sìe vegnest da rìder in nostra conpagnìa... e se von saludà co n'arivederci. Al tenp al va... co sto nostro Véscovo senpre su la "breccia"... l'ùndese de novenbre 2002, pa San Martin nostro Patrono, no l'é presente in Domo, causa malatìa. la preocupazion la se fa granda... cala na nebia che inmagona... Sì, ma e la speranza a che sèrvela, me domande, cossì eco che: "Sot i boscat / su par la scarpada / ò catà na prìmola / belche fiorida, / scondesta, come / che l'avée sognada, / tra foje seche e / erba, tant sbasida. / La paréa te 'l biso / de sta zornada, / la speranza, / che mai / no l'é finida."
Méte la pianteta so 'n vaset co la tera e, co Chica, son in Vescovado: a Don Giuseppe Bratti consegne "prìmola e poesìa". 9 dicenbre 2002, al Véscovo ringrazia e: "... La benedico... anche con la Sua segretaria." E, conrtinue co i primi bucanevi, unisse pàgine de Quatro Ciàcoe, e eco le prime canpanele, ocet de la Madona... sicura che 'l Véscovo, riva a capir che par mi sti fioret, che senpre i se presenta come miràcoi, oltre che la Speranza l'é Lodi al Creator: orazion sènplici, ma grande, che mi anca se ghe la mete tuta, no riesse a butar fora.
Primavera stranba quela de sto an: bucanevi e canpanele ora sot, sora e, ancora sot la neve, tant da rivar parfin a marz a fàrghene an bel mazet; unisse an raconto contro la guera. 18 marzo 2004: "Grazie del Suo scritto e dei Suoi bucaneve. La speranza che mai no l'é finida... per la pace nel mondo e per tutto. La benedico, Vincenzo Savio."
Sto nostro Véscovo l'à volest prima de méterse tut so le man de Dio, incontrar tuti i Sacerdoti, un a un... l'era conten pa l'arivo del Redentore del Beato Angelico (òpera del 1450, tènpera e oro su tàvola 55x39) rivada da Livorno e come so desiderio esposta a San Rocco, dove na Pala d'Altar figura don Bosco circondà da boce, ex Cesa Salesiana.
Par sto Redentore, al Véscovo, l'à detà na preghiera, quatro giorni prima "d'incontrarlo": "UN VOLTO - DALL'ETERNO SI PROLUNGA NEI MIEI PICCOLI GIORNI. / UN VOLTO - UN DIO CHE HA CERCATO L'UOMO..."
Vincenzo Savio al lassa sto mondo la matina del 31 marzo.
Portà te la cesa de San Pietro par do giorni, dì e not, l'é stat possìbile saludarlo... Dopo la cerimonia funebre in Domo dove anca na nevoda, Simona, l'à volest ricordar sto "Caro zio, Pastore e Zingaro della fede", ècolo a Feltre... e a Osio Sotto, dove 'dess al riposa.
Vivi i ricordi: ècolo in Domo, có in fondo la navata al saludéa tuti... ècolo a Santo Stefano per l'Addolorata 2003, provà dal mal ma content de abrazar e basar tuti... ècolo in piaza Domo: 20 marzo 2003, conpagnà da le canpane a mort sonade contro la guera, unirse a i dimostranti per la Pace, dopo intervento Iraq. ècolo al Premio San Martino 2003: assegnà dal Comune a la so Persona. ècolo a Tele Belluno co le so parole e al so soriso... ècolo a Belun a Feltre, so ogni canton de la provincia... co grandi... co picioi. ècolo co tuti: amigo de tuti, come San Giovanni Bosco.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Giugno:
Editoriale
Informare rispetando la persona
Qua ultimamente i mezi de comunicazion - radio, TV, giornài - i va via de ficheton, meténdone al corente de robe che pezo no le podarìa èssare
de Mario Klein
Da Belun
Vincenzo Savio an Véscovo Salesiano
de Luigina Tavi
|
