|
Da Adria (RO)
Anze e bisati
In cao a la tera, tri trami in banda a l'àrzere de Po Pìcolo, dedrìo a casa, a gh'jera un gran fosson. El jera un fosso de surtìa de Po e dunque la jera aqua bona, aqua corentiva, ciara e neta ch'a te vedivi el fondo. La jera tanto bona che de le volte invesse d'andare a Po i toleva l'aqua diretamente dal fosso. Par sta rason e pa 'l fato de èssere in comunicassion con Po, anca se par vie sconte, dentro int'el fosso ghe sguassava ogni qualità de pésse: rinati, buriòi, tenche, barbone, bisati, gànbari; gh'jera anca le rane e, naturalmente, qualche bissa d'aqua.
I mi veci, quando ch'i voleva far na magnà de pésse, i fondava na bela negossa granda, triangolare, fata co' tri tòchi de pèrtega e un mànego lungo, e in t'un fià per l'altro i eva bel e ciapà la sena. Naturalmente bisognava fare na s-ciaresà: sernire i péssi mèjo, butare via i più pìculi e scadenti, netarli da la grata e scartare insuma tuto quelo ch'a no serviva.
De le volte, quando ch'el fosso l'andava in magra parché gh'jera Po basso, i 'ndava a bisati. Co' i badili i faseva du cavedun, uno a monte e uno a vale, distanti na vintina de metri uno da st'altro e po' co' le pale - quele stesse ch'i doprava su l'ara pa 'l formento - i svodava el fondo butando l'aqua oltri i arzerèi.
Naturalemte i 'ndaseva dentro o co' i stivài o descalsi, parché sul fondo a gh'jera senpre un bel poco de smelmarin. Propio inte sto smelmarin sercava de ficarse dentro i bisati par scónderse, ma i mii i jera più svelti de lori: i li brincava e i li cassava dentro a d'i sachiti ch'i gheva ligà intornovìa a la vita.
Più che na pesca la jera na spece de festa de la melma: defati có i decideva che la racolta la jera fenì, i vegneva sù tuti infangà da la pansa in zo, ch'i paréa fati de crea. Na volta al suto i 'ndaseva sul sélese e lì, ormai distante da l'aqua i scrolava i so sachiti e tuti i bisati, desgropàndose, i scuminsiava a sparguiarse par l'ara, fin ch'i n'i ciapava par tajarghe la testa e cunsarli, po' i rostiva i più grossi e i frizeva i più pìculi. Inte sta sagra de la melma quela ch'a se distingueva, da putina, l'è senpre stà mi nona: no la gheva paura e no ghe faseva schifo ninte.
Alora, có tuti svodava el so sacheto, ela faseva altretanto, solo che le so bestiole le scapava via tute a testa alta supiando, parché anca se le somejava ai bisati, le jera anze, tute chele bisse nere ch'a magna le rane.
E ela se giustificava disendo: "Ne capisso parché ve spasemè tanto e ve metì a sigalare cofà le strighe: i è conpagne d'i bisati e mi, là in meso al paltan, no distinguevo le anze da i bisati: tuti du i è nigri e tuti du i se fica dentro la melma co' la stessa sveltessa. Come podévia fare a capire la difarensa?".
E, intanto chele altre done de casa le scapava in giro par l'ara più svelte de anze e bisati, ela la se sgionfava da rìdere cofà na mata.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Giugno:
Editoriale
Informare rispetando la persona
Qua ultimamente i mezi de comunicazion - radio, TV, giornài - i va via de ficheton, meténdone al corente de robe che pezo no le podarìa èssare
de Mario Klein
Da Belun
Vincenzo Savio an Véscovo Salesiano
de Luigina Tavi
|
