|
Vita de na volta (in dialeto rùstego de la Bassa)
Jeri e oncò
 |
| Có se levava el sole, te sentivi i osèi che sigolava: finchi, gardellini, merli, rejèstole (nella foto)... |
A me recordo oncora come che el jera el mondo na volta 'nte i nostri paesi de canpagna: la jente staséa male, sassiti par le scarsele i ghe n'ea pochi, i magnava male, i se vestìa come che i podéa, i naséa via piedescalzi o co le papusse e de inverno co le sgiàvare e le fémane co i zopéi e i pi trasandà i ghea i puldi e le bocarole. La pi parte i naséa via senpre a piè e domè i pi fortunà i ghea la rùgoli, ma tuti i saéa contentarse; la pi parte de le tosete le ghea le dreze e tute le fémane el cocon; i òmani i fumava el sìgaro e i pi veci i cicava, i tabacava e i fumava la pipa. 'Nte i misi de istà in siè-sete, a la sera, a se sentàvimo 'ntel meale de la porta o 'nte la mureta del zèlase par contàrsela e i tusiti ca no i jera mai boni da stare fermi, i ghe coréa drio a le slusiarole. El zielo el jera pien de stele bele lustre, la luna la fasèa on bel ciaro, pi in basso i barbastriji i xolava fando on mucio de schinchiti e i griji col so eterno "cri-cri" i ne tegnéa conpagnìa.
A la matina te te svejavi al canto de i gali che i se daséa risposta un co l'altro; có te verdivi la finestra te te sentivi inondà da na sboà de aria fresca e ciara che la se tirava drio el bon odore del madengo o de la braspagna 'pena segà. Da distante te rivava a le rece el canto del coajo e come che el sole se levava te sentivi tuti che l'altri osèi che i cantava, i sigolava o i faséa el so verso: finchi, gardelini, cinciarinbine, rejèstole e merli; po' te sentivi el zelegò de le zéleghe, al so tenpo calandre, turdi e sturlini, e se te ghivi la furtuna de averlo poco distante, te sentivi el russignolo che a gratis el te faséa sentire na mùsica che incantava, e 'nte le ore pi calde le zigale le tegnéa anca ele el so comarò. Có tacava a inbronire, via de i griji, tavaca anca le rane e le racolete, e po' el cuco, el ciò e pi tardi la zoeta.
La canpagna la jera piena de àlburi, dapartuto bine de opio o de nogare, fossài de olnaro o pratanaro, rivài de morari, al sò tenpo carghi de more, file de salgari e de piope ca no le finìa mai, e drio le strade e i confini passaje de opio o de olmo. Pa i rivài a primavera viole e margarete e pi vanti fiuri russi, zelesti e dali dapartuto e 'nte i canpi de fromento fiordalisi e papàvari in grande coantità. Soto i pòrteghi, le barchesse e anca 'nte le stale ghe jera on futìo de gnari de róndane, soto el grondale de la ciesa ghe jera, uno tacà a l'altro, na infinità de gnari de rondanuni, rondanini che i xolava cofà le saete drio e avanti par el zielo e po' vis'ciando 'torno al canpanile che i ti inpinava l'ocio e i te daséa contenteza.
'Ntel calar del sole te sentivi coà e là s'ciapi de fémane che nando a casa da laorare, con coanto fià che le ghea, le cantava le bele canzon de na volta e te paréa inpussìbile che dopo de aver laorà na jornata intiera soto el sole, e magari co' na gran xìsola indosso che le ghesse oncora cussì tanto fià. 'Nte un pìcolo paese, via de na secela, ghe jera ben sete ostarìe, e 'nte coatro ghe jera el dugo de le bale. A la doménega dopodisnà te sentivi sti gran sbari che faséa le bale nando incoste a le tole che tegnéa sarà el dugo; a la sera da ste ostarìe te sentivi cantare de i cori maravejusi.
El vin el jera jenuin parché casalin, có te lo bevivi te ghe sentivi l'odore del pànpano; se capisse che se uno el ciarìa massa, nando a casa, la strada la jera tuta soa. 'Ntel pi tardi passava par la strada s'ciapi de tosati in biga, ma a passo de omo, che i jera stà al cine o a smorosare, che i cantava degusto anca luri le ùltime canzon che jera vegnù fora. I òmani, anca tenpà, de na volta, có i caminava par la strada e có i jera drio fare on laoro lediero i sigolava senpre. 'Nte l'ora de dutrina la strada se inpinava de tusi che el prete dopo de avere inpinà la cesa e la sacrastìa no 'l saéa pi indò métarli: mi go inparà la dutrina sentà 'nte na cassa de candele, 'nton sgabussin indó che ghe jera poco ciaro e tante scarpìe. Finìa la dutrina ghe jera tusi dapartuto, pieni de contenteza, che i se coréa drio, o che i dugava a polgie o a balete, e tosete che dugava a caranpana o a bòzolo canpanelo.
Adesso mi me piase oncora 'nte i misi caldi a la sera sentarme 'ntel meale de la porta o 'nte na carega in medo al zélase: se capisse, co na coerta 'nte le spale par via de le magagne, ma son senpre mi mi solo 'fà on can: barbastriji no ghin vedo mai gnanca uno de orbo, de le slusiarole e de i griji no ghe xe gnanca l'insegna, quele che ghe xe oncora le xe le sginzale. El zielo xe senpre nibià da i fumi, stele te ghin vidi poche e la luna ciaro no la ghin fa, l'aria xe pesante, spesso te senti odore de plàstica o goma brusà o altri bruti uduri ca no se sa de cossa che i sia; có i cura po' chela mas-ciara che xe a tri tiri de s-ciopo da casa mia, da la spussa me toca scapare in casa.
A xe vero che el progresso ga portà el benèssare: bele case, automòbili, television e on sepiterno de altre bele robe che le ne rende la vita còmoda, xe anca vero che sto benedeto progresso el ne ga portà la solitùdine, la malinconìa, la desperazion e on gran disprezo par la vita, e po' el ne ga fato inbocare la strada che porta a la nostra destruzion: "A se ghemo salvà da la gradela e semo cascà 'nte la padela!"
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Giugno:
Editoriale
Informare rispetando la persona
Qua ultimamente i mezi de comunicazion - radio, TV, giornài - i va via de ficheton, meténdone al corente de robe che pezo no le podarìa èssare
de Mario Klein
Da Belun
Vincenzo Savio an Véscovo Salesiano
de Luigina Tavi
|
