|
Editoriale
Che aria tira?
Da che mondo xe mondo, l’omo ’l ga senpre ’vùo el so cao de mato, ma ogni tanto el se ferma a vardare el disastro del so progresso
 |
| Senza parole: CO2 par tuti ne l'atmosfera... |
"Par forza, se no ’l vol petarghe ’l penaro!" vien sùbito da dire. Ma par quanto el se ferma a vardare indrìo, la Tera xe senpre pi malà e la tira el fià in do volte. On fià grosso e cativo, pesante, che no te fè ora vèrzare la boca che ’l te spaisse i denti. Va ben che l’omo no ’l vive mia solo de aria, ma se no te ghe dè aria ai polmoni, te stè fresco!
Qua nasse el problema. Che aria pensemo de darghe ai nostri polmoni, se xe previsto che, ne la sola Europa, nel giro de na quindesina de ani, a gavaremo 8 milioni de morti a causa de la porcarìa che respiremo? Ne le nostre cità, i dani a la salute, causà da l’inquinamento, i xe enormi: se parla de 3.500 vìtime a l’ano, provocà da le "polveri sottili" che fa vegnere bronchiti, crisi asmatiche, malatìe de cuore, cancro al polmon e, in qualche caso, la malaria.
Che tuto questo sia vero, ghe n’emo le prove soto i nostri oci, osservando la natura. Mi, par esenpio, xe quasi on ano che tegno de ocio le ponte de i rami de on ulivo che go davanti casa. Go fato caso che i buti i xe tuti brusà e le pìcole zime le xe spenotà come on bacheto seco dopo na tenpestada. Ne i ani passà questo no sucedéa: vol dire che anca co le "domeniche ecologiche" no se ghe mete rimedio. L’aria xe senpre pi velenà e, se te vè fora a piè, a te ciapi na inbriagada de gas, che te toca canbiarte ogni volta che te vien casa, da quanto te si inbronbà de odorazi. Se po’ te provi a supiarte el naso, a te vedi cossa ca te ghè magnà e bevù fin chel momento.
E no stemo senpre rinpiànzare i tenpi de na volta, parché ogni tenpo ga ’vùo le so magagne. La natura ga senpre soferto e anca ne i tenpi antichi i òmeni no i ga mai cessà de rovinarla. Un vecio documento de tremila ani prima de Cristo (al tenpo de i Sumèri) el parla de on disastro ecològico causà dal tajo de le foreste de cedro, produsendo distruzion e sicità. I dani causà dal pionbo, secondo i studiosi, i xe stà quei che ga fato morire Roma, dove vegnéa doparà in abondanza l’acetato de pionbo e el sùcaro de pionbo par rèndare dolze el vin. Parfin el poeta latin Orazio se lamentava de l’aer infamis de l’Urbe.
Dal Medioevo ai giorni nostri, passando dal carbon al petrolio, le robe no le ga mai miliorà: da do, smoke fog, le parole se xe ridote a una: smog, ma el dano no xe mai canbià. Anzi, pur saltando fora, ogni tanto, de i difensori de l’anbiente, come el tedesco Haeckel e el stesso Führer, contrario a la cultura de l’asfalto, l’ecologista Gandhi e le varie associassion "pro-ambiente" del nostro tenpo, se catemo qua... a sbochezare come na tenca!
’Desso, al "vertice" de Bruxelles, i 27 Paesi de l’U.E. i s’à inpegnà a ridure el velen de l’aria co na serie de canbiamenti che, se i va in porto, calcossa de bon i dovarìa portare, partendo dal "risparmio energetico". Par intanto, fin che spetemo i risultati, le robe che podemo fare nel nostro pìcolo le xe tante... e tuti le conossemo.
Par fare on esenpio, mi go smorzà la luce de la scrivanìa, go ciapà carta e pena, e son vegnù in cusina a scrìvare sti pensieri a la luce del giorno... risparmiando energìa!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Che aria tira?
Da che mondo xe mondo, l’omo ’l ga senpre ’vùo el so cao de mato, ma ogni tanto el se ferma a vardare el disastro del so progresso
de Mario Klein
Salute
Mario Trivellato
cardiologo-spia a fin de ben
de Mario Galdiolo
|
