Salute

Mario Trivellato
cardiologo-spia a fin de ben

El prof. Mario Trivellato nel so studio.

Le scoperte sientifiche e tecnologiche nel canpo de la medeçina xe rivàe a on altissimo livelo, inpensàbile fin a pochi ani indrìo.
Ai primi de st’ano el professor Mario Trivellato, diretore del Servissio de Cardiologia de l’Uls 16 de Padova, con sede inpiantà a l’I.R.A. (Istituto di Riposo Anziani) in via Beato Pellegrino 192, cardiologo conossudo a livelo universitario, ma soratuto da padovani e vèneti, oltre che par el so saère de studioso, par le so qualità umane, el ga presentà a Roma on aparechieto funsionante co’ la tècnica bluetooth, in ocasion del Congresso Internassionale so le aritmie cardiache. Se trata de na tecnica che utilisa la frequensa de le onde radio par curte distanse, che, insieme a on celulare, giuta i cardiologhi a guantare malatìe de core, sconte e difìssili da scoprire co i normali aparechi fin ’desso in uso.
Par ociare da vissin e par savérghene on fià de più de sto pìcolo e pressioso strumento che ’l professor Trivellato, par primo al mondo, ga testà co sucesso za so ’na ventena de malà, semo ’ndài a trovare el luminare nel so studio.
Gentile e afàbile come senpre, el ne ga fato comodare e ’l ne ga spiegà fìo par segno co parole sènplici el funsionamento e la messa in pràtica de sto novo "eletrocardiografo transtelefonico": nome che no sarìa proprio el suo giusto, ma che ciamemo cussì par capirse e par no conplicare le robe.
"La principale caraterìstica de sto tipo de aparechio – dise el professor Trivellato –, la xe quea che a difarensa del normale storico eletrocardiografo che tien controlà el core par el tenpo de quei pochi secondi o al massimo pochi minuti nel mentre che se fa el ’cardiograma, o de l’Holter, (esame che tien controlà "el paron de casa par 24-48 ore), el novo strumento tien soto ocio el core e el comùnica al computer del cardiologo el traciato, come se conporta la ponpa (el core), senza lìmiti de tenpo. El pole essare tegnù sù ’na setimana, on mese, do, tre, on ano... Se vien limità el tenpo de controlo, in media a ’na setimana o diese dì, xe solo par dare el giro de l’aparechio, in maniera che più zente possa utilisarli e controlarse anca lori, poareti!"

El novo aparechieto co' tacà el celulare.

"On bel salto de qualità – continua el prof. Trivellato –, che smaschera el ‘ladro malegnasso’ nel mentre che ’l xe drìo robare. Par ‘ladro’ intendemo el male che de scondon se inponara so ’l core de la persona ciapà de mira, più de qualche volta sensa che questa gnanca se inacorsa, come sucede ne le recidive, ne l’insuficiensa coronarica e fibrilassion: malfunsionamenti che se no i vien visti, registrài,ciapài e curài in tenpo, i va a gravare la situassion. ’Desso, co ’l novo strumento, se al malà soto controlo ghe càpita on ataco al core, on bàtito iregolare o calcossa altro che no quadra, anca se el passiente fisicamente no ’l sente gnente, la inregolarità vien segnalà so ’l computer del cardiologo, in qualsiasi parte del mondo el se trova. Par esenpio, se nel computer del cardiologo che xe in Italia, riva el traciato sbalà de on so passiente soto controlo, che xe in viagio par lavoro o par caprissio in Australia e no ’l se ga inacorto de gnente, el mèdego che vede el messagio se toe la briga de rintraciare l’assistìo e avisarlo de cossà che xe sucesso o cossa che xe oncora drio sucédarghe e ’l ghe consilia i provedimenti da tore.
El tuto avien in tenpo reale, e poe èssare documentà in ogni momento, nero su bianco."
"Ogni tanto se sente dire che ghe xe persone spiàe al telefono, sensa che l’interessà sapia e spesso par farghe del male; in sto caso invesse, la persona lo sa e ’na volta tanto la spia vien fata a fin de ben" conclude el professore.
L’eletrocardiografo transtelefonico che usa sta nova tecnica de trasmission dita bluetooth, a prima vista el ga la fatessa del scarselin del traverson che se metévino ’na volta có ’ndasévino scola, con tacà do fili (elettrodi) che vien fora longheti da ’na parte, e naltro filo so la parte de sora che serve par picarlo al colo de la persona, sconto soto la camisa nel periodo de controlo. El tuto pesa ’na setantena de grami; peso e intrigo che disturba quanto ’na colana, ’desso de moda, cioè gnente.
Quando se parecia el malà par scumissiare el controlo, i do elètrodi colegài a l’aparechio vien posissionài so ’l torace de la persona, uno in alto a destra sora la "clavicola", e st’altro da la parte sanca del torace soto l’ultima costa. L’unica avertensa che ga da ’vere el controlà, la xe quea de tegnere el telefonin celulare de ùltima generassion (tarà in precedensa e sintonizà co l’aparechio) in scarsèa, so ’l comodin o in qualche altro posto, ma mai più lontan de ’na diesena de metri da l’aparechieto picà al colo.
Bluetooth xe on tèrmine che in se stesso no ’l dise gnente, ma el risulta èssare on mètodo sicuro e econòmico par scanbiare informassion a breve distansa tra dispositivi diversi (celulari, computer, stanpanti, machine fotografiche digitali, ecc.) e spedirle soto forma de traciato in qualsiasi parte del mondo. Nel darge el nome a l’inpresa, i inventori se ga ispirà a Harald Blatand, che sarìa Aroldo I de Danimarca, conossudo par essare on abile diplomatico.
"Se xe rivà al risultato – dise el professor Trivellato – meténdoghe tanto entusiasmo e determinassion." Concordemo anca noantri che, riussire a métare d’acordo eletronica, onde radio, dotori, malà, ecc. ecc., oltre che a tanta inteligensa, ghe ga ocorso davero ’na bona dose de entusiasmo e determinassion: tre qualità che anca al nostro amigo mèdego sicuramente no ghe manca.

[torna sopra]