|
El raconto del mese, in visentin
El sacrifissio
 |
| ...i lo ga prima bastonà e dopo fusilà... |
Quando i ricordi se inmucia, penso proprio ca semo so la porta de quela che i ciama: "la tersa età". Fortunà, s’a podemo contentarse de aver puchi rinpianti. Ma, puchi o tanti, rinpianti ghe ne gavemo tuti. Ghe xe però chi se contenta de quelo che i xe o i xe stà o che i ga conbinà ne la vita; savemo de quei (ma i xe puchi) che i se contenta de i schei che i ga e con quei i se rabata a tirar vanti, sensa invidie e sensa pretese. Credo proprio che quisti i sia quìi che la Beatitudine del Vangelo ciama: "Beati i miti, perché erediteranno la terra".
Però, come tute le robe, la medaja ga senpre do face: se nessun tendesse de nar vanti, de miliorare o far el mèjo, el mondo restarìa fermo. No ghe sarìa conquiste o scoperte. Ma, par fortuna, el bon Dio ne ga fati come ga dito on tale: "Par vardare le stele" o come me ricordo de aver leto, da bocia, on libro intitolà: "Per aspera ad astra". Vol dire che dovemo mirare senpre al mèjo, superare le dificoltà e questo, soratuto, quando se trata de i valori morali o civili. Sa sercàssimo ne la vita solo el tornaconto o el divertimento, le nostre no sarìa serto conquiste stelari.
A sto punto, me torna in mente la risposta de on me conpagno de scola al professore che lo spronava diséndoghe: "Mòvete, caro; ’sa farìssito se el mondo te cascasse ’dosso?". E ’l toso pronto: "Farìa on passo pi ’n là". Mi credo che anca questa la sia na beatitudine.
Quando on omo come mi, sensa pretese, se mete a pensare in sta maniera, alora ghe vien in mente anca calcossa de pi alto, par esempio "I fioriti de San Francesco" e de quisti uno in particolare, quelo de la "Perfetta letissia", l’otavo. Tra l’altro el invita a: "Vincere se medesimo, e volentieri per lo amore di Cristo sostenere pene, ingiurie e obbrobri e disagi". Ma questo lo sa fare solo i santi.
A sto punto, eco la storia de Tonin, on toso de sédase ani, martirizà e fusilà da i tedeschi nel ’44.
Valpiana jera on paeseto de sentotrenta ànime: done, tusiti e veci; i òmini jera tuti su i monti co i partigiani. La contrà jera fata de vece case in piera e la se catava in fondo a na verde vale che se inserìa tra i monti Lessini. Soto on speron del monte e in meso a na fita vegetassion, nasseva on fiume, che lì altro no ’l jera che on fosseto de aqua ma che avansando a bissa par la vale el se ingrossava con altri fossi de altre sorgive.
Confinà là in fondo, foraman e dismentegà, Valpiana dava da magnare ai partigiani. Tuti lo savéa. Tedeschi in paese se li gavéa visti poche volte: la paura de inboscate e visto che mai i jera stà bersalià, i lo gavéa quasi ignorà. Ogni fameja, anca sensa òmini, gavéa tre vachete in stala e on mas-cio sol staloto tacà casa ma, sconti in fondo l’orto, anca altri porsèi e altro bestiame come ochi e cavre.
A la fine del ’44 la guera se gavéa fata crudele. I partigiani se faséa senpre pi ativi e i tedeschi, ciapà da la paura, i se gavéa fati crudeli e feroci. Bastava poco par èssare messi al muro, sensa distinsion, zóvani o veci. Tonin el jera senpre riussìo a scapare da le retate de i tedeschi par menare i tusi a riparare le strade o el canpo de aviassion continuamente bonbardà. Tonin el jera diventà el portaórdini de i partigiani e ’l tegneva in contato quisti con el paese, màssime par i vetovaliaminti.
Un dì però che con l’amo e la negossa in spala el se portava verso el canale, fasendo finta de nare a pescare, na patulia tedesca lo ga blocà e, par so disgrassia, rento na sgàlmara i ghe ga catà on folieto con frasi convensionà, parole che lu no ’l ga savudo dire cossa le valesse (in efeti gnanca el lo savéa). I lo ga prima bastonà e dopo fusilà ai piè del canpanile, soto i oci de so mama che sigava, tegnù ferma da altre done e da i fusili spianà.
Valpiana ’desso i la ga ricostruìa su par el monte e de la vecia contrà xe restà, tra i pra e vissin a on fosso, on canpanile abandonà che pende da na parte, tanto che tuti speta che on tenporale o l’altro lo ridusa a on mucio de sassi. Par quelo l’è anca recintà. Ma chel canpanile storto mostra na làpide, anca se la xe invecià tanto da far fadiga a lèsarla, ma che la ga senpre on masseto de fiuri freschi, magari de canpo, e na corona de aloro ogni 25 de aprile. La ricorda el sacrifissio de Tonin, on bocia generoso, fiolo de la nostra pora gente, eroe a sédese ani, martirizà e fusilà par on ideale tanto sublime che solo i so zóvani ani podéa mirare.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Che aria tira?
Da che mondo xe mondo, l’omo ’l ga senpre ’vùo el so cao de mato, ma ogni tanto el se ferma a vardare el disastro del so progresso
de Mario Klein
Salute
Mario Trivellato
cardiologo-spia a fin de ben
de Mario Galdiolo
|
