|
Da Schio (VI)
El pesse de aprile
 |
| 'Na sèra de "Campanile Sera" de quei ani (dal 1959 al 1961). |
Giorni fà, quando che go girà el folio del calendario, me son dita co’ un gran sospiro de soliévo: "Marso ze rivà, dando un bon tajo a l’inverno; po’ vegnarà aprile e ..." e lì me son fermà. Sì, parché me zera vegnù in mente che el primo giorno de sto mese na volta costituiva motivo e scusa par fare, da parte de chi zera provisto de spìrito burlon, de i scherzi che de sòlito podéa èssare inocenti, ma serte volte, invesse, propio pevarini.
Me son ramentà quelo che, un colega d’uficio un poco sbalengo, ga fato a mi. Penseve na pora inpiegatina de sédese ani, senpre co’ la paura de no’ èssare a l’altessa del posto che da tre mesi la gavéa ‘vudo la fortuna de avere. Quela son mi che,tornando in uficio dopo èssare andà a consegnare de le carte, me sento dire da uno de i coleghi: "La vada suìto dal diretore, che prima la ga sercà."
Podì imaginarve el me timore: "Cossa voralo mai?" go pensà. Go messo zo quelo che gavéo in man e son corsa a bàtare a la porta de l’uficio del grande capo. Có son nà dentro el me ga vardà co aria interogativa. "Cosa vuole?" el ga dito. Tuta trepidante go risposto: "Mi hanno detto che doveva parlarmi."
Quel sior severo, elegante ma co’ l’aria de aver senpre pressa e poco tenpo de badare ai altri, el me ga dà n’ocià de traverso, po’ el ga dito secamente: "Ha guardato il calendario? Sa che giorno è oggi?"
Me se vegnù in mente ‘lora che zera el primo de aprile e credo de èssare vegnù rossa come un pomodoro. Gavarìa vossudo sprofondare in tera, ma me son limità a dire: "Scusi..." e son nà fora.
Tornà ‘ntel me uficio, sensa vardare in facia nessuni, me son messa a scrìvare a machina, ma dovéa avere n’espression...! E el tissio che me gavéa zugà el scherso ze vegnù a scusarse e po’ el ga dito che, par penitensa, el sarìa stà tuta la matina co’ un pésse de carta tacà su la schena.
A propòsito de sti schersi, che na volta se faséa co’ na serta frequensa, me son ricordà de uno veramente "madornale" e che go leto ‘nte un libro scrito dal scledense Stefano Tomasoni ‘ndove ze descriti i fati pi notevoli sucessi a Schio ‘ntel decenio 1960-1970.
Sto periodo el ze stà inportante par la me cità, parché la ga visto nàssare industrie e atività varie, che ga anca richiesto la costrussion de case nove e condomini.
Dunque, conta Tomasoni, un giorno e precisamente vènare 27 genaro 1961, riva in Comune na telefonada diretamente da la RAI Televisione Italiana, che fa na proposta inportante: interessarìa partecipare a la trasmission "Canpanile Sera"?
In municipio i resta sbalordìi. Ciò, "Canpanile Sera", ‘lora zera el giojelo de la RAI, condoto gnintepopodimeno che da Mike Bongiorno, diventà el personajo pi noto e pi vardà in television dopo che, ‘ntel 1951, el gavéa lancià la stòrica trasmission "Lascia o raddoppia?". Anca "Campanile Sera" zera inportante parché el metéa, una de fronte a l’altra, do cità italiane, ‘nte na fraterna ma spesso calda conpetession.
La telefonada del funsionario de la RAI mete in agitassion l’Aministrassion Comunale; no’ ghe ze tenpo da pèrdare in quanto se tratarìa de partecipare a la puntata del 12 febraro, solo do stimane dopo. El sìndaco convoca d’urgensa el Consilio comunale. La Giunta scolta la proposta, la discute animatamente e la trova interessante; ma ghe ze de le dificoltà da superare e la prima ze el poco tenpo disponìbile par riussire a organisare tuto ‘ntel mèjo de le maniere. Vien invità la Pro Loco parché la diga le so inpression; questa, a so volta, el giorno sucesivo 28 febraro, la cònvoca i rapresentanti de le associassion de categorìa, che sarìa industriali, artigiani e comercianti, par capire quanto i podarìa colaborare e se i fusse disposti a dare de i contributi econòmici (infati pare che, par la partecipassion, sia stà richiesti sinque mlioni).
Se pensa e se discute come trovare i soldi e la maniera pi giusta par organisare tuto sensa córare el ris-cio de fare, par la pressa, na bruta figura. Se riva a decìdare de dire de sì a la RAI a la condission che la data vegnà spostà. Ma le dificoltà le vien senpre pi grande e la mobilitassion de la cità la porta scarsi fruti; de i sinque milioni necessari se riesse a trovàrghene solo uno. Infine, capìo che la trasmission la trova scarso entusiasmo da parte de enti e categorie econòmiche, la Giunta comunica a la RAI che ze stà deciso par el "gran rifiuto".
Questi ze i avenimenti, ma la storia no’ finisse lì. Infati, poche stimane dopo le cronache de i giornài le riporta la notissia che pare sia partìa dal mondo del spetàcolo. Sul quotidian "Gazzettino", par esenpio, el giorno 30 marso, antivigilia del 1° aprile, ghe ze un artìcolo che anuncia, sensa precisare el nome de chi lo ga scrito, che na parte de la troupe cinematogràfica che sta girando i esterni del film "Barabba" la sarà a Schio sabo matina par efetuare le sequense da inquadrare ‘nte la famosa pelìcola. Par la circostansa se gavarà bisogno de conparse, adornà de na folta barba, che le vegnarà siélte sul posto. Chi fusse interessà e gavesse i requisiti richiesti, ze invità a trovarse sabo matina, a le ore 10, davanti al teatro Astra de Schio ‘ndove i tècnici provedarà a fare na siélta. Naturalmente i presselti ricevarà n’adeguata riconpensa.
No’ se ga mai savudo quanti se ga presentà a l’apuntamento fracàndose soto el pòrtego d’entrata de l’Astra, acuratamente sarà.
A l’ora precisà, de i tecnici de la RAI no’ se ga visto gnanca l’onbra. Man man che ‘l tempo passava, i aspiranti atori ga tacà a dare segni de nervosismo, brotolando qualche protesta. L’atmosfera se ga fato senpe pi calda finché uno de i presenti ga sussurà poché parole a la recia del so vissin. Questi ga fato altretanto co’ quelo che zera de fianco e po’ co’ altri finché finalmente se ga sentìo dire: "Ze el primo d’aprile, ancò."
Qualcheduni ga tentà de alsare la vosse ma po’ ze calà el silensio. E i òmini, pian pian, i ga inissià al ritorno. Par fortuna i gavèa la barba cussì i ga possudo scóndare l’espression smorbà che i gavéa sul viso.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Che aria tira?
Da che mondo xe mondo, l’omo ’l ga senpre ’vùo el so cao de mato, ma ogni tanto el se ferma a vardare el disastro del so progresso
de Mario Klein
Salute
Mario Trivellato
cardiologo-spia a fin de ben
de Mario Galdiolo
|
