|
Da Thiene (VI)
Ricordando Checheto
 |
| Checheto davanti al so "casotelo", posà a la vetrineta. (Foto Bruno Dalle Carbonare) |
La gera na giornata de nibia cossì fissa da tajare col cortelo, tornavo co la coriera da Maròstega dove lavoravo, e smontà a la solita fermata in piassa Cesare Batisti, dove me zio Checheto gaveva un "chiosco" fornìo de tante robe bone a seconda de la stajon, no go sentìo in te l’aria el profumo de i maroni spaelà che de solito a quel’ora se spandéa in tuta la piassa. De sicura calcossa gera sucesso, difati vissinàndome al casotelo, in meso a la nibia go intravisto la scrita "lutto di famiglia". El gera mancà inprovisamente quela matina nebiosa de genaro 1968, quaranta ani fà.
Qualche giorno dopo, un trafileto de giornale diseva:
"è morto Checheto, amico dei bambini...
I bambini che alla domenica passando per viale Bassani, si fermavano ad acquistare dolciumi e frutta secca d’inverno, granatine e sciroppi d’estate, non troveranno più il loro amico Checheto, dal sorriso tranquillo e dalla paterna sopportazione. Purtroppo in questi giorni, silenziosamente, come era vissuto, se n’è andato. Con la morte di Francesco Dalle Carbonare è scomparsa una figura cara a tanti thienesi e con lui un ricordo simpatico della nostra infanzia".
Gera da poco passà la Stria (6 genaro) e inpirà su le stanghe del bancheto, rente ’l casotelo, te podevi amirare le "corone" fate de maroni e mandarini infilà te un spago: el burielo che i toseti se meteva al colo la matina de la ’Pifanìa.
Quarant’ani i pararìa tanti pa ricordare, ma a mi me pare ieri có de doménega, siori de la mancia de 50 schei, che me mama ne dava a noaltri più pìcoli, trenta pa ’l cinema, el resto par "conprarse" dal zio Checheto.
Me par de védarlo col so "bancheto", atento e premuroso co i pìcoli "clienti" che ’l sercava senpre de "conbinare", e me zia Angelica che ghe dava na man ne i momenti de "ressa".
Se gavì na s-ciantinela de passiensa, vorìa lustrarve le robe dolse custodìe drento na vetrineta co la rabalsa che se versèa de continuo ( par tore i "poci" ca conpràvimo).
Scomissiemo da le spumilie de ciara de ovo e sùcaro, bianche e maronsin parsora, guarnìe de denti de vécia (i pignuli): le se desfava ’pena messe in boca; pecà che le durasse poco.
Vissin che quasi se tocava, i bastonsini de sùcaro filato rodolà te la carta velina colorata, molegati, color mielasso; i se tirava co i dìi cofà on tira-mola, ma tanto boni. I pevarini de du colori, quei rosa "becava" manco, gera biscoti sechi de forma bislunga che mastegàndoli se sgranava lassàndote un pissigore ’te a lengua. Invesse i tortoni, pìcoli retàngoli grossi do dèa, gaveva la pasta del macafame e i te restava in tel stomego se te ghin magnavi pì de on paro.
Da rente, i sachetèi de "rataji" (tochetèi de biscoti de tanti tipi), na vera delissia risservà ai "siori", i costava massa pa’ e nostre scarsele, ma se consolàvimo co i rataji de le paste, che co diese schei, me zio, t’in dava na brancà.
No ve digo de ’a bontà de i "ciucioti" de sùcaro "varissia" che t’inpastrociava de nero man e boca, e del gusto che se provava, quando el dolse-garbo del ciucioto ficà drento al limon te spaventava i dente, ma lo ciuciàvimo istesso e tante volte no restava gnanca la scòrsa (del limon s’intende).
De liquorissia, ben destirà, ghe gera i "spaghi" col buso in meso, e naltri boce li doparàvimo par tirar sù el castagnacio, farina molesina de castagne messa te le bustine che le costava solo mesa palanca (5 schei).
El pi de ’e volte, a la prima tirada se sofegàvimo e ne vignéa da tossire, parché sta polvareta tanto fina la ne ’ndava drita in gola. Par no ’vere sto fastidio bisognava tirar sù pian pianelo, ma la voja gera tanta ca se desmentegàvimo.
Te on cantonselo i bonboni de rosolio che ne ’a bona stajon gera i più bersalià da le ave e altri bài che zolava, parché ramenàndoli qualchedun se ronpéa, e el liquore dolse e tacaisso se missiava co i bonboni, mandando on profumo che li faséa girare de continuo cofà móscoli.
Più in là, una sora l’altra, do pile de scatolete de banda, rotonde piene de "teracatù", bonbonsini neri coverti de porpora argento. I vignéva fora da on buseto uno par volta girando el coverceto: la scatoleta, purtropo massa picinina pa i nostri gusti, la finiva in pressa.
E ancora, al riparo de ’a vetrineta, strucà parché mancava el spassio, te catavi: mentine, zuzùbe, pastilie de anice, siliete de tanti colori, le "scarpete" gomose e le "more" che se tacava in te i dente, e altri che me scapa de mente.
E fora de ’a vetrineta in bela vista tante altre "robe" bone, ma me pare che basta quele mensonà sora in ricordo de me zio Checheto a quarant’ani da la so sconparsa. Ciao, zio!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Calma! On poco a la volta!
Ogni ano, có taca l’Ano Novo, se roversa na brentana de auguri che, se par caso i dovesse realizarse tuti, el sarìa on bel problema
de Mario Klein
Memoria viva
’Na storia de Cese e Conventi de Padova che ’no esiste più
Na bea passejata in te i borghi che gera San Bartolomeo e Braido. La conversassion piena de cultura de un vecio prete. La storia de monumenti colpevolmente distruti
de Gigi Vasoin
Da Rovigo
La ripetizion de Davide
de Gianni Sparapan
|
