|
Da Isola Vicentina (VI)
Luigi Manea, dito Bijo Poncio
 |
| Luigi Manea, dito Bijo Poncio (1929-1977). |
El moro Manea de ’a contrà de vale, ’l staséa a on tiro de s-ciopo da ’a romantica ceseta de san Roco, ’ndove, gnanca i se godesse, se inmuciava i pi poareti del paese. Sto omo, grando poco pi de on naneto, inverno e istà el portava ’dosso ’a stessa roba: on par de braghe de fustagno tegnù sù da on sogatelo, scarpe du nùmari pi grande, na camisa felpà e, sora, na jacheta senpre de fustagno a sbrìndoli, taconà. A quel tenpo, so ’e vece case de i poareti, nessun gavéa l’aqua in casa, lu gnanca se preocupava de doprala, sto lusso ’l lo riservava al so musseto che, quando ’l gavéa sen, el savéa lu come farse sentire.
El moro gavéa maridà Maria, na doneta a la man che se prestava so i laori co elo, trascuràndose so ’l vestire e tuto ’l resto tanto da èssare pi mora de so marìo che no par gnente i ghe ciamava "moro". Quasi ogni matina, dopo ’verse ’n po’ goernà, sentà insima ’l careto, el musseto tacà davanti che pianelo tirava, i se portava so i du canpeti e lì, fra quatro fime, do suche par ’l mas-ceto, on poche de tegoline da ’a fasolara, na sbrancà de erba, i tornava casa.
El moro e la Maria col so far de vita, sensa volerlo, i gera ’l specio vivente de quel mondo chieto, insonacià, ultimo spirajo romantico che da lì a poco ’l progresso gavarìa scancelà. A luri bastava poco par vìvare sereni: tre fetele de poenta conpagnà col salado, na menestrina lesiera da gustarse insieme, dopo che insieme gavéa spartìo la fadiga... Se no jera felissità sta chì, poco ghe mancava. Difati, a le volte, a la note ’l moro sentìa i sospiri de ela che, sveja, se girava sol leto sensa parlare. A luri ghe mancava on fiolo, cossì, visto che no ’l rivava, i xe ’ndà da ’l pàroco del paese e... da ’l Logo Pio de Vicensa e on bel dì i ga portà casa on toseto che i ga ciamà Luigi.
Nantri toseti có, dopo la guera, lo gavemo coonossesto, Luigi gera ormai grando e fin da suito se ghemo inacorti quanto el fusse stranbo, tanto da farne parfin paura. Cossita có lo vedìvino spuntare da sora ’a vale, so na corsa scapàvino zugare so ’a cavalerissa de là de ’a Giara. Capitava anca che ’l ne fasesse de i dispeti rovinando i nostri zughi; ’lora lo cojonàvino ciamàndolo Bijo Poncio, come faséa i grandi, anca se a dir ’l vero, no gavemo mai savesto parché i ghe gavéa tacà sta nominaja che col tenpo ga sostituìo ’l so nome.
La prima grossa marachela che ricordo de lu xe capità a fine giugno del ’46. Quea note jera stà traversà da na burasca de vento e piova, cossita na matina, so ’n drio-vanti, la jente curiosa come no mai l’andava vardare sta gran brentana che sfiorava parfin l’óro de l’àlzare. El sole caldo e on celo lindo sensa nuvole ’ndorava ogni angolo de siesa e ’nte ’a piasseta nantri boce zugàvino co ’e poce de aqua che ’a piova de la note gavéa inpienà. Qualcun de nantri se onsava rivare fin a bagnarse i pie so ’a s-ciuma de aqua che l’onda de ’a brentana spuava fora sbatendo ’dosso le grosse prie de l’àlzare. Có gavemo sentìo la vosse de Bijo Poncio, sensa volerlo se gavemo sercà streséndose uno so l’altro. Lu, tuto baldansoso, el xe rivà disendo: "Cossa femo, toseti, ancò?" Ma no sentendo risposta el se ga vardà ’torno e on soriso furbesco ga traversà el so viso. Da ’a curva de ’a Lorensa on careto, pien de sachete de farina del munaro de Castelnovo, procedéa dasieto tirà co fadiga da on griso cavalo da tiro. Có ’l xe rivà davanti a Poncio, lu co ’n sguinso se ga tacà sù co ’e man so na stanga e, dopo ’ver fato briscolare le ganbe, so na sconsa el ghe ga molà do scarpà so ’a pansa del cavalo, proprio ’ndove no bate mai ’l sole. Ghe xe stà on fià de silensio suito spacà sù da on lagno sofegà, po’ xe stà solo s-ciantisi de fogo e so ’n zighe-zaghe da far paura, el cavalo come ’l fusse deventà mato ga infilà la Giara sprofondàndose so ’l bòjo fondo de ’a brentana.
Ze sucesso el finimondo, tuti sigava corendo a sercar calcossa pa’ salvare almanco el munaro. Nantri toseti, tuti spaurà, batendo i denti come gavìssimo fredo, semo coresti rento el forneto de ’a nona che, dopo ’ver infornà l’ultima ciopa de pan, staséa metendo ordane a la roba doprà.
Drio nantri xe capità anca el Poncio che, infilàndose soto ’a mesa del pan al ga sigà: "Guai a chi che fa la spia." Cossita, có xe vegnesto rento i carabinieri, nessun ga verto boca. Luri, dopo ’ver spiocià tornovìa, i ne ga intimà: "Se non ci dite dov’è questo brigante, vi portiamo tutti in prigione." Solo ’lora Bijo Poncio xe spuntà criando da soto ’a mesa disendo de no ver volesto far del male, lu voléa solo zugare.
Ancor ’desso lo vedo davanti i me oci che, a testa bassa, inmanetà, fra du carabinieri che se strassina verso la preson.
Da quel dì paréa che sta esperiensa ghe gavesse verto la manìa che se no ’l faséa calcossa de strano no ’l staséa ben. Altro che la teneressa e l’afeto che i sui sognava có, streto fra i brassi, se lo gavéa portà casa da Vicensa. Le stravaganse che ga conpagnà Bijo Poncio tuta ’a so vita xe stà ’nfinità e no bastarìa on libro par contarle. Cossì scrivarò solo una de ’e so ultime matità.
El benèssare che se gavéa realizà tra i ani Sessanta-setanta, xe stà fruto de sacrifissi e rinunsie de tanta brava jente, però anca sto toso co ’a so furbissia, intrufulàndose fra associassion e sindacati, el ga savesto fare tanto da ’ver senpre qualche bea palanca in scarsela, schei che servìa a frequentar senpre de pi le ostarìe del paese.
Quel vènare, marcà in piassa a Isola, come ’l solito xe rivà meodì che lu jera ’n po’ trabalante e, có ’l xe vegnesto fora da l’ostarìa de Ceba, sensa badare al trafico de moto e machime, el ga traversà la strada. Girolamo co ’a so Vespa el ghe ga petà rento rabaltàndolo in meso ’a strada. Có i so amissi xe coresti torlo sù, lu li ga fermà disendo: "Fermi, tusi, che sto morendo, ciapè na machina e porteme a l’ospedale." Co ’a sonarìa tacà in pressa i xe rivà fin vissin a l’ospedale, ma so na confusion de trafico ghe ga tocà nar pian. Uno de i so amissi, vardando fora dal finestrin el ga sigà: "Mariavèrcola, che polastra!" Bijo Poncio de colpo xe saltà sù in senton disendo: "Vè pian, tosi, ca possa gustàrmela anca mi."
La pèso la ga vuda el poro Girolamo che, se anca el Poncio no se gavéa fato gnente, el ga dovesto sborsare diversi schei.
Parché ’lora come ’desso vale el dito... "soldi e amicissia orba la justissia."
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Calma! On poco a la volta!
Ogni ano, có taca l’Ano Novo, se roversa na brentana de auguri che, se par caso i dovesse realizarse tuti, el sarìa on bel problema
de Mario Klein
Memoria viva
’Na storia de Cese e Conventi de Padova che ’no esiste più
Na bea passejata in te i borghi che gera San Bartolomeo e Braido. La conversassion piena de cultura de un vecio prete. La storia de monumenti colpevolmente distruti
de Gigi Vasoin
Da Rovigo
La ripetizion de Davide
de Gianni Sparapan
|
