|
Da Rovigo
La ripetizion de Davide
 |
| Inteligente e anca furbo e bravo in te 'l fare quelo ca ghe piase a elo...ß |
Davide l’è oramai diventà grande, tanto che ‘l va a le medie. L’è tanto inteligente e anca furbo e bravo in te ‘l fare, e pien de volontà ca ghe piase laorare manualmente, co tanto ocio, manovrando co facilità i atrizi de la mecànica, de la eletrònica e de l’idràulica, co on senso pràtico ca meravéja.
Ma pur s’a xe passà i ani, el so raporto co la cultura libresca l’è senpre quelo, "problemàtico" a se dirìa, cussì tanto che so mama la ga pensà de mandàrmelo a casa, parchè ca ghe daga na qualche ripassadina a le so conossenze.
E cussì da qualche setimana a so’ drìo vardare quelo ca se pol fare.
De storia gnan parlarne: "No la me piase, e basta. Gnanca se i me lo òrdena , mi no la studio."
"E de geografia?"
"No la m’intaressa. A mi a me piase stare a casa mia, e no me intaressa savere chi ca sta qua, chi ca sta là, indove ch’i va..."
Vorà dire ca faremo on poco de italian.
"El varda che me mama la ga parlà de fare on paro de ore de lezion, ma mi a penso ca xe mèjo ca femo on’oreta in tuto, sinò a se stufemo."
Va ben. Scumiziemo subito co on detato muto, par védare puntegiatura e ortografìa.
"Parcossa gato messo l’acento sora el qua? No te sa ch’i dise che ‘su qui e su qua l’accento non ci va’?"
"L’è la prima ca sento!"
"E alora femo sta prova. Lezi la parola qua co l’acento!"
E Davide: "Qua."
"Adesso cava via l’acento e lèzila ancora."
Alora sto ragazeto, strucando spale e boca par cavare fuora un suono longo e senza consistenza, el me spìpola on "qua" strifelà e tirà come quelo che ‘l dirìa uno drìo morire sofegà.
"Chi gato sentìo che ‘l diga ‘qua’ come ca te ga dito ti?"
"Insuma, a go capìo che lu el vole senpre avere rason."
A taso, par no coparlo.
"Passemo a l’anàlisi gramaticale. S’a te vidi scrito la parola ‘la’, come fato a savere se ‘l xe on artìcolo o on pronome? Presènpio, in te la frase – Io vedo la nonna e la saluto – dime quando che ‘la’ è pronome e quando è articolo."
Davide el mena la testa in qua e in là: "Lu, no ‘l xe contento se no’l me cata in castagna, ero eh?"
Passemo al tema.
"Ma come? Nantri a ghemo fato tri temi in tuto l’ano, e lu el vole ca in faga uno in te la prima ora ca se catemo!"
"Dài, scrivi qualcossa so on argomento qualsiasi, ca vuojo védare come ca te scrivi!"
Ma sto fiòo el me mostra el folio del detato: "Eco come ca scrivo, no ’l vede miga?"
"A vuojo ca te me scrivi le to idee, presènpio so la libertà."
"El xe on argomento da scuole superiori, questo, no da scuole medie!"
"E alora scrivi qualcossa so l’inquinamento. Cossa gh’è de più inportante de la natura?"
"I schei!"
"E cossa t’in fato de i schei s’a gh’è l’aqua inquinà?"
"A me la cronpo al supermercato."
"E cussì, secondo ti, i schei i sarìa i valori più inportanti de la vita?"
"Ma lu dove valo senza schei? No ‘l vede mina ca ghe vuole schei dapartuto?"
"Senti, Davide, dime ti cossa ca te vuò fare onquò. Cossa fémogna?"
"Par onquò basta – el me fa – no ‘l vede miga ca xe passà l’ora?"
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Calma! On poco a la volta!
Ogni ano, có taca l’Ano Novo, se roversa na brentana de auguri che, se par caso i dovesse realizarse tuti, el sarìa on bel problema
de Mario Klein
Memoria viva
’Na storia de Cese e Conventi de Padova che ’no esiste più
Na bea passejata in te i borghi che gera San Bartolomeo e Braido. La conversassion piena de cultura de un vecio prete. La storia de monumenti colpevolmente distruti
de Gigi Vasoin
Da Rovigo
La ripetizion de Davide
de Gianni Sparapan
|
