Mestieri novi

Falchi e falconieri

Paolo Venuleo co 'l so falco.

Più de qualche volta gavemo visto e sentìo par television o leto so i giornài casi de ’reoplani che, in fase de ateragio o ’pena partìi, i ga ris-cià de smaltarse par tera a causa de s-ciapi de osèi che ghe intrajava la linea de volo, sbaténdoghe ’dosso pericolosamente. Da qualche ano però pararìa che al grosso problema i fusse riussìi a catarghe rimedio. Ne le zone a ris-cio xe stà messa in òpera la cacia co ’l falco amaestrà: ’na maniera curiosa e poco conossuda da i più, che però dà i so fruti. A l’arivo de on grosso s-ciapo de osèi el falconiere de guardia "ammansitore", istrutore e custode del falco, ghe orsa drìo molando in volo el so proteto e i osèi a la vista del "caciatore" spaurìi in un bàter d’ocio i scanpa e i se desperde.
Par profondire el discorso so come se deventa falconiere, ’na passion che romai par tanti xe deventà profession e par altre robe, semo ’ndài a trovare Paolo Venuleo, on zóvane ’passionà falconiere de Padova, diplomà a la Scola de Falconeria de Maròstega – la prima in Italia – istituìa nel 2005.
Dise Venuleo, spiegàndone, che l’opera "benefica" del falco caciatore amaestrà, no se ferma solo ai aeroporti, ma la cacia xe inportante anca par tegnere neti palassi, vile, cese, statue e monumenti stòrici de le çità e soratuto so i ospedài, dove oltre al sporco osèi e colonbi podarìa èssare fonte e portare in giro malatìe. In quanto a la storia, dise l’amigo, la cacia co ’l falco ga orìgini antichìssime. Se sa che la vegneva praticà in Mongolia e in diverse parte de l’Asia e de la Cina oncora domìe ani a.C., anca se el documento stòrico più antico che esista xe del 1700 a.C. Se trata de on bassorilievo dove xe rafigurà on falconiere co ’l falco, scultura che xe stà catà tra le rovine de la çità de Khorsbad in Mesopotamia.

Re Manfredi, fiolo naturale de Federico II de Svevia e de Bianca Lancia, te na antica miniatura, col so falcon.

In Europa la cacia co’l falco pare che la sia rivà con i arabi nomadi oncora prima de Maometo e risulta che ne l’VIII sècolo d.C. la gavesse za ciapà pìe in Inghiltera, mentre in Germania la ga scumissià co Federico Barbarossa (1121-1190) e in Italia la xe stà portà da Federico II de Svevia (1194-1250) nevodo del Barbarossa. El periodo che la ga vudo el magior svilupo xe stà el XIV e XV sècolo. A quel tenpo i falchi gera tegnùi in altissima considerassion; par dire in Giappone ghe gera ’na lege del 1487 che obligava chi che tegneva on falco de darghe da magnare carne de mamiferi e osèi, guai se i ghe daseva serpenti e tartarughe. Se a sgarare la lege gera i samurài (soldài giaponesi de l’època feudale) ’na casta privilegià, ghe vegneva cavà via mèsa paga; mentre la zente comune vegneva copà.
Anca in Europa la considerassion gera alta. Regnanti e nobili faseva a gara ne l’inparare tèniche nove e par ’vere el falco più mèjo e adestrà e par de più i falchi stessi gera deventài on segno de distinssion e non tuti podeva ’vere el falco che ghe gavarìa piasso. L’aquila reale podeva ’verla solo l’inperatore, el girfalco el re e via via el falcon gentile el principe, el falco pelegrin el conte, el pelegrin tersuolo el baron, el falco sacro el cavaliere, el lanario el nobile de canpagna, el "smeriglio" la dama, el lodolaio i pagi, el sparviero i chierici, e l’astore i picoli paroni de tere.
Dopo la bea quanto svelta caminada storica, el nostro esperto ne ga parlà de la Scola e de cossa che bisogna fare par deventar falconiere. La Scola prima in Italia come za dito, xe nata nel 2005 e la ga sede al Museo Ornitologico de Marostega. El corso riconossudo in tuto el teritorio europeo xe curà da Salvatore Foglio, diretore del Museo, coadiuvà dal diretore didàtico Francesco Lanzieri, maestro falconiere, presidente de l’Ordine dei Falconieri d’Italia e canpion italian de Falconeria. El prof. Foglio, maestro falconiere, biologo de i rapaci e documentarista, xe stà el primo in Europa a vìnsare par tre ani drio fila la Borsa de Studio del Peregrine Furd – World Center for Birds of Prey (Usa) – l’ente ’merican più inportante del mondo par la riçerca so i rapaci.
Ritornando al corso par deventar falconiere femo presente che ’l xe riservà a chi xe in possesso de on diploma de maturità e ’l ga la durata de 350 ore de studio, tegnùe da insegnanti qualificài in specifiche materie: telemetria, biologia, alimentassion, adestramento e patologie viarie, ecc. A la fine l’alievo ciapa l’abilitassion de "ammansitore e addestratore" del falco; falco che l’alievo bison che ’l se lo cronpa. I pressi varia a seconda de la rassa, de l’età e de la qualità. I più comuni e economici i va da i 800 ai .1000 euro e via via senpre più in alto. Par esenpio ’na fèmena de bianco de Groenlandia poe costare anca 15 mila euro. Par no parlare de i incroci de rasse speciài, come quei che ga i emiri arabi, che i porta so canper co l’aria condissionà a adestrare e a cacia so ’l deserto, che vien a costare anca 350-400 mila euro.
Ringrassiemo Paolo Venuleo par le interessanti notissie e par la so disponibilità; e par chi che volesse savérghene de più poe telefonare al numero 0424-471097 o mandare on e-mail a l’indirisso museornitologico@libero.it.

[torna sopra]