Memoria viva

’Na storia de Cese e Conventi de Padova che ’no esiste più
Na bea passejata in te i borghi che gera San Bartolomeo e Braido. La conversassion piena de cultura de un vecio prete. La storia de monumenti colpevolmente distruti

El chiostro de la antica Cesa de S.Bartolomeo tra via Altinate e via Carlo Cassan. El resto xe stà distruto a cavalo fra el 1700 e el 1800.

"’Sto posto un tenpo se ciamava Borgo san Bartolomeo", ne dizeva in te l’autuno de ’l ’45 un vecio prete tanto preparà ne la storia e ne l’arte de la nostra sità. I me amissi Ferruccio e Raffaele, insieme co ’l prete, gera vignù a torme a casa in Via Eremitani. La me fameja gera ancora in canpagna dove che gèrimo sfolài par la guera. I go visti co’ piassere parché gavaréssimo magnà la sera un bocon in conpagnìa, come che fasévimo de solito dopo un giro par la sità. Gera sabo dopo pranso e le strade scominsiava, dopo la guera, a popolarse come ’na volta.
Gèrimo in via Altinate quando la nostra guida storica e artistica ne parlava. Gèrimo in silensio parché bevévimo ogni so parola par savere queo che a scola no’ i ne gaveva insegnà su Padova. Questo no’ ne ga cavà el corajo de domandarghe notissie su ’l nome de ’l Borgo. Mi po’, personalmente, gero interessà più de tuti a saverlo parché in casa de i Zii in via Altinate gavevo trovà più de qualche riferimento a San Bartolomeo.
"La storia xe longa e vecia – ga dito el prete – parché fin a la fine de ’l 1700 a Padova ghe gera più de ’l dopio de le cese e più de ’l triplo de i conventi de ancò. Vignì co’ mi che ve mostro."
Ghemo fato co’ lu qualche dezina de passi, senpre in Via Altinate, fin al canton de via Carlo Cassan.
El prete se ga messo davanti a l’inboco de la strada e el ne ga spiegà che sul canton de sanca ghe gera la Cesa de San Bartolomeo. "Questa gera una de le tante cese de Padova distrute o da i francesi o da i austriaci o da i padovani in te i primi vint’ani de ’l 1800. Pare che la so costrussion sia stà fata in te la seconda metà de ’l 1000, quando che Padova gera feudo vescovile. Drìo de la Cesa xe stà fato un convento de mùneghe benedetine che in te ’l periodo fra el 1509 e 1510 xe scapà da Montagnana quando che l’esercito de la Lega de Cambrai, in guera contro la Serenissima Rapubblica de Venezia, ga invaso el teritorio padovan, assediando prima Padova, po’ Monselice. El convento, distruto da un incendio verso la fine de ’l 1500 e rifato da le mùneghe subito dopo, xe stà sarà in te ’l 1797 quando che Padopva xe stà ocupà da Napoleone I Bonaparte. Ma resta ancora calcossa de ’l convento. Vignime drìo." Ghemo fato pochi passi zo par via Cassan e da ’na grande porta su la sanca de la strada el ne ga mostrà un bel chiostro quadrato, anpio e arioso.

Qua a l'angolo fra via Rinaldo Rinaldi, al posto de sto condominio ghe gera l'antica Cesa de S.Biagio che xe stà visità in te i sècoli da tante personalità polache e greche. Distruta co 'l Convento a cavalo fra el 1700 e el 1800.

"La Cesa – el ga continuà – gera intitolà fin da le origini a l’Apostolo Bartolomeo – i so resti mortali xe a Roma. – Dentro, in te ’l periodo che va da ’l 1400 al 1600, xe stà messe fra quadri e statue tante pressiosità. Ga lavorà artisti de tuto rispeto come el Ricchi, de caràtare artistico "fiammingo", po’ el Zanella, el padovan Mantova e Luca da Reggio."
El prete ga concluso che dentro a San Bartolomeo gera stà sepelìa verso la metà de ’l 1500 la famosa Morosina, che gera conpagna e amante de ’l grande umanista Pietro Bembo, che stava in via Altinate in te ’l bel palasso che corentemente ciamemo Camerini e ’desso xe la sede de un comando militare. La Morosina, che ghe gaveva dà al Bembo do fiòi, gera morta de malatìa prima de i quarant’ani.
A ’sto punto el nostro prete ne ga dito che ’l voleva mostrarne, dato che gèrimo da quée parte, i loghi dove che esisteva altre cese andà distrute e el ne ga conpagnà par bona parte de via Altinate, svoltando par via Rinaldo Rinaldi, faséndola tuta fin a l’ultima casa da la parte drita.
El se ga fermà proprio là: "Qua ne ’l tenpo antico ghe gera la Cesa de S. Biagio, martire cristian morto fra i spasimi in te i primi ani de ’l 300 dopo Cristo in Grecia, dove che ancora ’desso el xe ricordà da le corporassion artigiane. La Cesa xe stà fata ne i primi ani de ’l 1200 e in te ’l 1510 su ’l dadrìo xe stà creà un convento de mùneghe benedetine. Cesa e convento xe stà visità par devossion da la muiere del re de Polonia, Sigismondo I e da tanti esponenti de ’l mondo storico, politico, culturale e popolare greco. Dentro ghe gera un belissimo presepio co’ tante statuete, oltre che de S. Giuseppe, de la Madona, de ’l Bambin Gesù, de la muca e de ’l musso, de i Re Magi, de i tanti pastori e pastore, co’ piègore, cavali, cameli, e ’na decorassion profondamente spirituale de tuto l’anbiente."
Dopo de averne ilustrà le grandi opere de arte che adornava la Cesa, opere de ’l grande pitore padovan Varotari, dito el "Padovanino", de ’l Tintoretto, de Luca da Reggio, de ’l Damini e de ’l Maganza, più statue e decorassion pressiose, el prete ga concluso dizéndone che el convento de le mùneghe xe stà sarà in te ’l 1797 e la Cesa butà zo pochi ani dopo ne ’l novo secolo.

El chiostro de la Cesa de S.Bernardino, distruta ai primi de 'l 1800, dove che gera sepelìo el grande pitore padovan Guariento di Arpo.

El ga svoltà a sanca par via S. Biagio fin a l’incrozo co’ via Santa Sofia. "Qua se dovarìa fare un longo discorso a onore de ’l Comune de Padova e un altro discorso particolarmente storico che anca ’desso praticamente ne tormenta. El Comune de Padova, ne la seconda metà de ’l 1200, ga deciso de fare ’na Cesa-ospedale, dove ricoverare i putini sbandonà. Se verificava più de qualche volta che la zente trovasse neonati ancora vivi o za morti par le strade, in canpagna, longo i canali. Da qua la decision de métare soto el pòrtego de la Cesa la famosa ‘ruota’ dove le mame o chi par lore podeva lassare liberamente i putini apena nati co la sicuressa che i sarìa stà curà e alevà. La xe stà ciamà Ca’ di Dio e dedicà a la Madona de la Salute. Dentro opere artistiche de Palma el Giovane e del pitore padovan Stefano dall’Arzere. La Cesa-ospedale xe stà distruta verso la fine de ’l 1700 e la cura de l’infansia sbandonà xe stà trasferìa prima a S. Giovanni da Verdara, po’ verso la metà de ’l 1800 ai Ognisanti."
El nostro amigo ga continuà co ’l so discorso, queo stòrico, contàndone che fasendo le fondassion de la Ca’ di Dio, i muratori ga trovà i resti antichissimi de un gueriero. El grande preumanista Lovato dei Lovati, dopo un esame de i resti, ga dito co’ sicuressa che i gera de Antenore, el fondatore de Padova. El Comune ga deciso giorni de festa e la corstrussion verso l’ano 1280 de un bel monumento in piera che xe stà posà ’dosso el muro de la Cesa de San Lorenzo ne la atuale via S. Francesco. Co ’l passare de i secoli xe stà fati de i esami de i resti de ’l gueriero e verificà co’ metodi sientifici che no’ podeva èssare de Antenore.
El prete ga concluso dizéndone do robe: la Cesa-ospedale e el so convento xe stà distruti verso i primi de’l 1800; qualche studioso pensa che i resti mortali trovà fin che i muradori gera drìo costruire la Ca’ di Dio poe èssare de ’l capo de un esercito de Ungari, morto soto le fortificassion de’ Padova in te ’l’ 899.
Ghemo fato tuta via San Biagio fin al canton co’ Via Zabarella. Vardando l’entrada de la Intendenza di Finanza, el prete ga dito: "Qua ghe gera la Cesa de San Bernardino, dove che i ga sepelìo el grande pitore padovan Guariento di Arpo, nato in contrada Scalone, ancò Gregorio Barbarigo. El ga lavorà tanto a Padova, ne la Basilica de Sant’Agostino, ne la Reggia Carrarese ai Eremitani, po’ el ga finìo la so cariera co’ un stupendo afresco a Venezia, ne la Sala de ’l Maggior Consiglio a Palazzo Ducale. Purtropo el xe morto tanto zóvane e la so salma xe stà portà sinquant’ani dopo la morte in ’sta cesa che xe stà fata verso el 1440, co’ un convento de mùneghe francescane. La Cesa gera tanto bela par la richessa de le sculture in piera che adornava i altari laterali e queo centrale. Ghe gera anca un dipinto de ’l Damini. Xe stà tuto distruto ai primi de ’l 1800. Resta un chiostro co’ i ufici de l’Intendenza."
Gavévimo fato tardi e, insieme, semo ’ndà in quea laterìa "Contin" che ’na volta gera in via Marsilio da Padova, dove che ’l paron ne ga servìo ’na pastasuta co ’l ragù e ’na bona pana co’ i storti.

[torna sopra]