Salute

Luigi Calza
Pioniere e maestro de l’Ostetricia a Padova

L'Ospedale de San Leonino in Pra' de la Vale a Padova (da na stanpa antica).

La ga da èssare stà on fiantin dura par Luigi Calza, on zóvane mèdego ostetrico rivà a l’Ospedale de Padova pien de idee e tanta voja de fare, inporse e dimostrare le so tante qualità inte i stessi ani che a l’Università tegneva banco el grande anatomista Giambattista Morgagni (1682-1771), considerà el fondatore de l’Anatomia Patologica.
Luigi Calza jera nato a Bologna nel 1736; el se ga laureà in Mediçina a Padova e, a gnancora 29 ani, el xe rivà a la Càtedra. Difati el 20 aprile del 1765 vien fondà el primo Gabinetto Ostetrico e se invìa la Càtedra "De morbis mulierum, puerorum et artificum", tegnùa dal Calza.
Nel canpo de la dissiplina ostetrica no ’l gera secondo a nissun, almanco qua a Padova: el saveva el fato suo e el gavéa le idee ciare nel come voler modernisare i studi in materia, liberàndoli da i mètodi tradissionài romai sorpassài. Anca se ’l jera za bravo, par profondire e inpratichirse, el faseva la spola tra Padova e Bologna, frequentando la Scola del so maestro de senpre, Antonio Galli (1798-1782).
El periodo storico lo favoriva: ghe jera on poco dapartuto la volontà de canbiare le robe e de ’ndare ’vanti ne la ricerca. Lu ga ciapà al volo l’ocasion, colaborando co i luminari de altre dissipline: con quei de l’Orto Botanico, alora al massimo de l’eficensa, par ricavare da le piante nove mediçine; col Teatro Anatomico, Osservatorio Astronomico, la Scola Agraria, co i stessi alievi del Morgagni. Tuto ghe serviva par portare aqua al so molin, cioè ai studi de la dissiplina ostetrica.
De stima, Luigi Calza, el ghe ne gode da subito anca fora Padova: lo dimostra el fato che, prima de entrare a far parte de la Scuola degli Artisti, el xe stà ciamà a Venessia da Marco Foscarini, che deventarà pi ’vanti doge, parché l’insegnasse materie de Ostetrica in quela sità. Certo che el ga da èssare stà non solo conpetente ma anca "convincente" so l’inportansa de métare in piè na scola del gènare. Difati, dopo qualche ano, le autorità sanitarie de Venessia, con decreto del 2 Magio 1770, le ga deliberà de vèrsare la prima Scuola per Ostetriche a Venessia. A Padova invesse, seben se ghe ne parlasse da tenpo, par na serie de disguidi e inconprension, par ’vere na Scola se ga dovudo spetare naltri quatro ani. In un primo tenpo la ga scomissia privatamente a casa de Calza e qualche ano dopo la xe deventà pùblica par tuti, mèdeghi, levatrici e ostetriche, ne l’Ospissio de San Leonino, in Pra’ de la Vale.

Uno dei modèi fati fare da Luigi Calza

A difarensa de la magioransa de i grandi luminari, el nostro personagio el ga lassà poco de scrito, par no dire gnente. Le uniche robe che xe restà le xe tre comunicassion presentàe bocalmente da Calza a l’Accademia de Padova e messe par iscrito da altri e publicàe dopo la so morte. Forse par questo no ’l xe tanto ricordà. Quelo che invesse lo farà ricordare par senpre xe i modèi de cera e de tera crea, ideài e fati fare da lu, rancurài nel Museo de l’Istituto di Ginecologia e Ostetricia de Padova: i modèi rapresenta in sezion l’apparato genitale feminile ne le varie fasi de la gravidansa, sia quando che la xe normale o che ghe xe de le malformassion o malposission de la creatura che ga da nàssare. Par creare sti modèi el se ga fato jutare ne i disegni e ne i consili da Antonio Scarpa (1747-1842), alievo del Morgagni, che al tenpo el gaveva poco più de vint’ani e che in seguito el deventarà on chirurgo e on oculista de fama e maestro a l’Università de Pavia. El belo de sti modèi, fati da i artisti Manfredini e Sandri de la Scola bolognese, co cera d’api e colorài a varie tinte secondo quelo che i rapresenta, xe che no i xe solo perfeti in aparensa, ma i xe fati in maniera che i organi interni pol mòvarse come dal vero, in maniera che le ostetriche e i mèdeghi podesse alenarse a far vìsite so ’l modelo prima de farlo dasbon so la dona.
Tegnendo presente che na volta a l’Ospedale partoriva soratuto le fémene pi poarete, Calza el ga dimostrà na profonda sensibilità verso ste pore done. Pecà che ’l gabia vudo el destin de morire apena a 47 ani. L’8 agosto 1783, poco distante da casa sua, el jera drio caminare insieme a do amissi, quando el se ga sentìo male e, come che scrive l’abate Giuseppe Gennari, "... lo abbiamo perduto per un fiero colpo di apoplesia... e vani tutti i più efficaci rimedi applicatigli dalla perizia de’ due suoi amici, Caldani e Bonioli."
Qualche mese prima, el gavéa fato testamento col desiderio de èssare sepelìo co i so familiari ne la cesa de Santa Caterina, la so parochia in via Cesare Battisti a Padova. E cussì i ga fato.

[torna sopra]