Memoria viva

Vittoria Aganoor e Giacomo Zanella do grandi poeti padovani
La laurea de me fiolo Giovanni. ’Na bea sena co i parenti al ristorante "Aganoor". El me raconto fin a le tre de note

La Casa in Prà de la Vale dove che xe nata verso la metà de 'l 1800 Vittoria Aganoor, un tempo ciamà la Casa degli Armeni.

Quando che se ga laureà in te ’l ’75 me fiolo più vecio, Giovanni dito Nani, in lege co’ 110 e lode, discutendo ’na tesi "sperimentale" in "diritto penale" a l’Università de Padova, co’ i oci che me lagrimava par la felissità e la emossion so’ ’ndà dentro ne la sala de le lauree, go sentìo la nomina e el voto. Ghe go butà i brassi al colo e me so’ basà ‘sto toso che me ga dà e me sta dando tante sodisfassion par la bravura e la serietà che ’l ghe mete in tute le so robe.
Fora ghe gera me mujere, i do fradèi, me fradèo Franco, qualche parente, tanti amissi. Questi ghe ga messo intorno al colo la corona de aloro e semo ’ndà in strada. Me lo tignevo sotobrasso, pien de orgolio e de amore. Gavevo conbinà par subito un rinfresco da Orione Missaglia ne la "Tavernetta dei Poeti" e, trionfanti, ghe semo ’ndà co’ tuti quei che gera presenti a la laurea. Tartine co’ la salata russa, co ’l parsuto, co’ i ganbareti, panini, olive, patatine frite, dolsi, paste e vin, tanto vin. I zóvani magnava a crepapansa e mi... bevevo. Pa’ la contentessa, bevevo tanto, un goto drìo l’altro, fin che quea benedeta de me mujere me ga fermà, parché gero drìo rancurare, come che i dizeva al Portelo, ’na bala "scorezona".
Tornà a casa, me so messo subito a pensare cossa che dovevo fare par festejare l’avenimento co’ tuti i parenti, come che gaveva fato la Mama quando che se gèrimo laureà mi e me fradèo. Quea volta ghe gera, par mi in te ’l ’51, tre zii Vasoin co’ le mujere e tanti cugini, ma purtropo mancava el pòvaro Papà, morto ancora zóvane in te i primi giorni de ’l ’46. La persona che gavarìa vossudo de più, tacà de mi. Go de lu, in più de ’l grande amore, un infinito rinpianto parché el xe stà la "pietra miliare" de la me maturassion spirituale e culturale.
Beh! ’Ndemo ’vanti! Dopo la laurea de me fiolo, me so’ messo a telefonare a drita e sanca pa’ invitare i parenti, anca quei che no’ stava a Padova. Ma el problema gera dove? A casa mia, par quanto granda, tuta quea zente no’ ghe stava. Un amigo me ga consilià un posto novo dove che no’ gero mai stà: el ristorante "Aganoor" a Vale San Giorgio. So’ ’ndà, conbinà tuto. El posto gera fin, elegante, servissio parfeto, garansìa de magnare ben. Go fissà pa’ un sabo sera par el comodo de tuti. Se ghemo trovà in ’na sinquantina.

Vittoria Aganoor, padovana, ne la so maturità oramai famosa de la so produssion leteraria. La xe morta 'bastansa zóvane a Roma par on tumore.

Ghe gera me Mama, cara, bea anca se la gaveva passà i otantasinque ani, me mujere, i me tre fiòi, me sorèa Maria Teresa co’ i fiòi, el Zio Toni, l’ultimo fradèo de ’l Papà, tanti cugini e parenti da la parte paterna e materna. Aria de contentessa da ’l primo minuto a l’ultimo. A la fine brindisi abondante e discorsi.
Mi go leto ’na me poesia in dialeto padovan che gavevo preparà par la ocasion, dedicà a me fiolo. Ricordavo quando che ’l gera nato, ne ’l ’53, un ano dopo de ’l matrimonio, la so vita da putin, putèo, giovinoto, i so studi senpre tanto brilanti. E ghe go consegnà el me regalo, un regalo morale pa ’l momento: ’na targa tolta da l’uficio de me Papà, co’ scrito "dott. Giovanni Vasoin". Gero tanto comosso che me so’ fermà.
A ’na serta ora i ospiti ga scominsià de ’ndare via. Tanti basi e abrassi, e a revéderse par Nadàe. Mi però so’ restà co’ la me fameja, sentàndome in giardin par respirare un poca de aria fresca. Gera anca ‘na splendida note de luna piena. Ciacolàvimo co’ piassere, fasendo comenti su la sena, su i vari piati. A un serto momento ’na cugina me ga domandà: "Gigi, da dove vienlo fora el nome ‘Aganoor’ de ’l ristorante?" Mi quea sera gavevo la ciàcola fàssile e no’ me ga parso vero de rispónderghe: "Ricordo che ’na doménega prima de la guera, tornavo co ’l Papà da la partìa de balon e el ga fermà la machina in Prà de la Vale, mostràndome un palasso otocentesco fra l’angolo de via Luca Belludi e el Campo Tre Pini. El me ga dito che in te l’alto Medio Evo là ghe gera "lo Stallone" un enorme magasin dove che i meteva de note le bestie che i marcanti portava a Padova pa’ la Fiera de ’l Santo. El magasin in te la seconda metà de ’l 1700 xe deventà el ‘Teatro Vacca’. Tacà ghe gera la Cesa de San Leonino, che i padovani ciamava San Violin. Al posto de ’l Teatro, Abramo Aganoor, un persian pien de bessi, ga tirà sù la Casa de i Armeni".
"E alora?" la me ga dito. Alora mi go continuà contando che un fiolo de Abramo Aganoor, sposàndose, ga ’vudo sinque fiole fémene. Fra queste, Vittoria Aganoor, una de le più grande poetesse italiane de ’l 1800. La gera nata a Padova in quel palasso poco dopo la metà de ’l 1800, e la gaveva mostrà, fin da picola, ‘na granda vocassion par le letere e in particolare par la poesia. La ga fato studi profondi e quei più inpegnài co ’l grande leterato e poeta Giacomo Zanella che frequentava continuamente la casa e la so fameja.
Mi, senpre contando queo che me gaveva dito el Papà, go precisà che Zanella ghe ga dedicà a la zóvane qualche verso pressioso, prevedendo el sucesso de ela come poetessa. Quea sera go recità i primi versi de la poesia de Vittoria: "Casa natale"

"Vecchia casa lontana,
aperta su quel Prato
che il fiumicel chiudea come un monile,
tremulo, rispecchiante
statue brune dal muscoso plinto..."

El grande leterato e poeta Giacomo Zanella, de origine visentina, ma vissudo par tantissimi ani a Padova. El xe stà Preside de 'l Liceo e Retore de la nostra Università.

So’ ’ndà ’vanti dizendo che Vittoria, dopo aver conposto varie opere fra queste la più inportante "Rime sparse" e dopo qualche delusion amorosa, anca se la gera bela, rica, inteligente, la se ga spostà a Venezia, po’ a Napoli, infin a Roma. Invità ne i anbienti più fini e eleganti, famosa par la so opera leteraria, la ga conossudo in te la capitale un omo famoso e inportante: el deputato de Perugia, Guido Pompili, che se ga inamorà e la ga sposà che la gaveva squasi quarantasie ani. El matrimonio xe stà tanto felisse, ma el xe durà poco parché nove ani dopo, in te ’l 1910, Vittoria Aganoor xe morta par un tumore. El marìo, Guido Pompili, che alora gera Vice Ministro ai Affari Esteri, xe stà ciapà da la disperassion e, dopo i funerali de la Vittoria, se ga suicidà co’ un colpo de pistola.
Senpre quea sera ne ’l giardin de ’l ristorante "Aganoor", dato che i altri me ’scoltava volentiera, go contà: "El Papà, dopo de averme dito tuto questo, co’ la machina ga ciapà via Luca Belludi, Piassa e via de ’l Santo, po’ via Zabarella. Dopo poco el me ga mostrà un palasso, dizéndome che ne la metà de ’l 1800 ghe stava quel grande leterato e poeta che gera Giacomo Zanella, insegnante privato de la Vittoria Aganoor!"
Go contà ai presenti che quea doménega co ’l Papà semo tornài a casa e a la sera, in tola, ghe go domandà che ’l me disesse calcossa de più su ’l conto de Giacomo Zanella. "Volentiera – el me ga risposto – se te me lo domandi vol dire che el me discorso de ancò te ga interessà e questo me piase. Vorìa che te fossi senpre cussì!" E, tra un bocon e l’altro, el xe ’ndà ’vanti spiegàndome che ’l gera nato ne la vale de ’l Chiampo in te ’l 1820; fato prete, el ga studià a Padova, laureàndose in Letere. Po’ el ga insegnà a Vicenza, a Venezia e a Padova, deventando preside de ’l Liceo Ginasio, queo che ancò xe el "Tito Livio". Ciamà da la nostra Università a la catedra de leteratura italiana, el xe anca deventà Retore. El ga scrito tanti sagi, fra questi "Storia della letteratura italiana dalla seconda metà del Settecento ai nostri giorni". Ma queo che lo ga fato deventare famoso in Italia e in Europa xe stà la ode "Sopra una conchiglia fossile" considerà da i esperti la mèjo poesia italiana de ’l 1800, dedicà al so amigo Luigi Luzzatti, grande e inportante omo politico, in ocasion de le so nosse. Questo intorno al 1864-65. El xe morto dopo più de vint’ani.
Quea sera ne ’l giardin de ’l ristorante, ghemo fato le tre de note. Alora no’ savevo, anca se lo pensavo, che me fiolo Giovanni sarìa deventà un bon avocato.

[torna sopra]