|
Teatro e Teatri
El Teatro de i Obizzi... ’desso Cinema Teatro Concordi
 |
| L'atore Cesare Rossi ne la stajon teatrale del 1884 al Teatro de i Concordi. |
Prima de parlare de ’sto teatro, penso che sia mèjo spiegare da dove xe saltà fora ’sto nome. Obizzone de Borgogna (po’ dopo ciamà Obizzi), la jera ’na nobile fameja ’rivà in Italia al sèguito de l’Inperatore Enrico II. In prinsipio la se xe fermà a Lucca, po’ dopo, par rajon politiche e matrimoniali, la se xe trasferìa a Venessia, indove ghe xe stà conferìo el marchesato e, có xe stà el 1285, la xe ’rivà inte ’l Padovan, ciapando sistemassion a Albignasego, drento ’na gran corte domenicale. Là, oltre ai rusticani e a l’abitassion del gastaldo, ghe jera anca la vila padronale, indove che xe stà ospiti anca San Gregorio Barbarigo e el Cardinale Rezzonico (dopo deventà Papa co ’l nome de Clemente XII) e che ’desso la xe deventà la sede del Comune. Se conta anca, che Beatrice de i Obizzi la se ga fato costruire el so Castelo (co’ ben 350 stanse) a Bataja Terme, ai pie del monte Ceva, che la ga ciamà Catajo parché fato secondo la descrission de Marco Polo de la abitassion estiva de l’inperatore del Catài (Cina). De ’sto castelo ghe sarìa da dire tate robe ma el ghe entra poco co ’l teatro.
Uno de i dissendenti de ’sta fameja xe stà Pio Enea I de i Obizzi (el sarìa stà lu a inventare i "obici", i grandi canòni che da lu gavarìa ciapà el nome), nominà Collaterale Generale del Dominio Veneto (carica tanto inportante a Venessia), el se jera sposà co’ la nobile padovana Lucressia Dondi de l’Orologio: dona virtuosa che xe stà copà el 14 novenbre 1654 da Attilio Pavanello (un so deluso pretendente) e sepelia (po’ dopo anca el marìo e so fiolo Ferdinando) inte la Capela de fameja al Santo: quela che ’desso xe ciamà de la "Madona Mora" (che prima la jera de i Rogati e dopo de i Negri), che se trova sul dadrio de l’Arca, e che la xe adornà co’ piture de Giusto de Menabuoi e forse de Altichieri da Zevio. Su la lapide se leze "Nefarie iugulata" ossìa "Nefandamente sgossà".
Pio Enea I de i Obizzi el jera inamorà del teatro, tanto xe vero che inte ’l 1652 el ghe ne ga fato costruire uno de suo: el "Teatro degli Obizzi". La costrussion, tacà al Domo (’desso la se ciama via S. Martino e Solferino), la xe stà fata su un toco de tera indove sora ghe jera do palassi de fameja. In ‘sto teatro, che el jera colegà a la so abitassion ‘traverso un passajo soto tera, in prinsipio ghe vegneva rapresentà spetàcoli còmici, ma po’ dopo, anca opere più serie.
Inte ’l 1662, a la morte de Pio Enea I de i Obizzi, el teatro xe passà in proprietà al fiolo Ferdinando, che el ga pensà ben (a oto ani da la morte) de vendicare so mama, copando el Pavanello (che el jera stà bon de tore par el sésto la justissia e farse assòlvare dal Tribunale Veneto), ma costreto a scanpare a Vienna, dove el xe deventà un celebre generale de l’Inpero Austro-Ungarico.
Xe sta cussì che el Teatro de i Obizzi el xe passà in man de altri paroni; ultima xe stà, inte ’l 1821, la fameja Concordi, e da chel momento el xe stà ciamà co ’l novo nome de Teatro dei Concordi. Po’ dopo, co l’evento de el cinematografo, ghe xe stà zontà anca el nome de Cinema diventando cussì el Cinema Teatro dei Concordi... ma de teatro, ’desso, se ghe ne fa ben poco, par no’ dire gnente de gnente.
Da quanto me xe stà possibile lèzare, inte ’l 1695 xe stà rapresentà "Adone" de Claudio Monteverdi e "Ciclope" su libreto del padovan Girolamo Frigimelica; più ’vanti anca opere de Carlo Goldoni e de Vittorio Alfieri; el 19 dicenbre 1821 ’na comedia che la gaveva par protagonisti do atori padovani: Giacomo Bonfio e el sordomuto Antonio Podrecca, e el 19 lujo 1837 un sogeto che ’l contava la storia de Lucressia Dondi, che go più sora mensionà.
Se conta che inte ’l majo 1855 el gran atore Ernesto Rossi, dopo poche rèssite, el ga lassà la piassa de Padova parché el publico no ’l ’ndava più a vardarlo al Teatro dei Concordi par ’ndare al Teatro Garibaldi a védare i spetàcoi popolari de Luigi Duse (spece quei co’ la màscara de Giacometo Spasemi, tirà fora da un personajo de la comedia "Imbroglio de le tre muger" de Giacomo Bonfio, più sora mensionà). Da ’lora el Rossi, có ’l vegneva a Padova el voleva ressitare solo al Teatro Garibaldi, ’vendo ben capìo l’inportansa de ’vere el favore de chel pùblico.
Inte ’l 1884 el Teatro dei Concordi el ga organizà ‘na memorabile stajon teatrale ospitando anca la conpagnìa Cesare Rossi, indove ghe fazeva parte Eleonora Duse, che i padovani considerava come concitadina par merito del nono Luigi, ma, difidenti ne i confronti de atori e atrici tanto aclamài da altri pùblici, prima de lassarse ’ndare a entusiasmi i ga preteso de rèndarse conto de persona de la so bravura. L’entusiasmo xe stà tanto grando che a la rapresentassion de "La signora delle Camelie" i la ga ciamà a la ribalta par ben 30 volte; altretanto sucesso la ga ‘vudo par "Cavalleria Rusticana" de Verga: ’na gran novità par chel’ano, no’ solo par el teatro, ma anca par el mondo culturale e leterario italian.
Dopo l’ultimo restauro, ’na targa in marmo tacà fora del Teatro ghe ne ricorda un poco la storia... e 356 ani ’sto Teatro el li portà ’ncora ben.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Maledeti cortèi!
Ormai la xe deventà na bruta moda: braghe larghe, scarsele fonde e el cortelo no ’l se vede pi. Na parola storta, on rinpròvaro, na osservazion... pronte do cortelà e la facenda xe sistemà!
de Mario Klein
Memoria viva
Vittoria Aganoor e Giacomo Zanella do grandi poeti padovani
La laurea de me fiolo Giovanni. ’Na bea sena co i parenti al ristorante "Aganoor". El me raconto fin a le tre de note
de Gigi Vasoin
Teatro e Teatri
El Teatro de i Obizzi... ’desso Cinema Teatro Concordi
de Piero De Franceschi
Salute
Luigi Calza
Pioniere e maestro de l’Ostetricia a Padova
de Mario Galdiolo
|
