|
Editoriale
Maledeti cortèi!
Ormai la xe deventà na bruta moda: braghe larghe, scarsele fonde e el cortelo no ’l se vede pi. Na parola storta, on rinpròvaro, na osservazion... pronte do cortelà e la facenda xe sistemà!
Sistemà on corno: el pi de le volte ghe scapa el morto e magari de 16 o 18 ani! Te cati uno sentà sora el còfano de la to màchina, te ghe domandi de spostarse e quele le deventa... le to ultime volontà, parché do cortelà al pèto o a la gola e te vè a fare tera da pitari!
No passa giorno che no se senta casi come questo: la cultura del cortelo a portata de man e pronto a l’uso no la xe pi na novità. Dire che questo el xe un problema preocupante, xe ’ncora poco. Se se domanda cossa xe che ga fato armare la man soratuto de tosi e de minoreni. On toso zóvane dal cortelo fàcile el ga confidà che co on cortelo te te senti piassè sicuro e po’ se no te ghè on cortelo indosso el grupo no te aceta. Come dire che la lege del branco la inpone le so règole e guài a no rispetarle: lama longa, capucio e fazolo par scóndare la facia in caso de bisogno.
Dà preocupazion el fato che xe i adolessenti a darse a la violenza e che chi comanda el branco el ga pi potere de on genitore; genitore che, ne la pi parte de i casi, no ’l ghe xe e, se ’l ghe xe, xe come se no ’l ghe fusse. Separazion e divorzi tra le prime cause, insieme a droga e sesso lìbero. E i genitori i continua ingenuamente a scóndarse dedrìo a la domanda: "Dove xe che ghemo sbalià? Parcossa xe che sucede ste robe?"
El fenòmeno esiste e le cause no le xe poche. Alora se domandemo: "Quali xei i modèi de vita che ga davanti sti tosi? E se i ghe xe – parché i ghe xe! – chi xe che li mete in risalto, tra giornài, cinema e television?"
Dunque, cativi alievi de cativi maestri. E el sangue soratuto de tosi zóvani el continua a mescolarse al catrame de l’asfalto, so le strade de le nostre sità e de i nostri paesi.
A xe capità che du vìgili urbani i ga dito sù a na toseta de 15 ani e i ghe ga dito de rancurare le carte che la gavéa butà par tera. No i lo ghesse mai fato: la toseta ghe xe saltà ’dosso a on vìgile e la ghe ga morsegà la facia; se ga fato ’vanti on branco de so amissi coetanei che ga assalìo i "tutori" de l’órdine co spranghe e cortèi.
Questo xe el clima de tension e de paura che se sta zontando a le tante preocupazion per la sicureza, anca parché sta epidemìa la ga tacà a colpire dapartuto, conpresa casa nostra.
La manìa del cortelin, de la bricoleta in scarsela, la esistéa anca có jèrimo tosati noaltri: el cortelin ne servìa par procurarse na bachetela o le canete par farse l’aquila o na forcela pa ’l tirasassi. Tute robe ben diverse da i cortèi de i tosi de ’desso, che col cortelo no i va in zerca del rameto de salgaro in amora par farse on subiolo o del sanbugaro par costruirse na s-ciopetarola, ma de farghe del male a qualchedun.
Forse, anca questo fa parte de l’ipocrisìa de la nostra socetà civile: a femo armi e po’ volemo che no le vègna doparà par copare; a femo pastele e "pasticche" che, come mìnimo, le inturbia el zarvelo e no volemo che la zente ghe ne faga uso; metemo in comercio lame da guera pi gajarde de quele del becaro che taja la carne, e vorìssimo che nissun se fesse male. Alora se domandemo: "Ingenua, ipòcrita o soratuto menefreghista e violenta, sta nostra soceta?" Sarà ben pensarghe e cavare da le scarsele, soratuto da quele de i nostri tosi, sti "maledeti cortèi"!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Maledeti cortèi!
Ormai la xe deventà na bruta moda: braghe larghe, scarsele fonde e el cortelo no ’l se vede pi. Na parola storta, on rinpròvaro, na osservazion... pronte do cortelà e la facenda xe sistemà!
de Mario Klein
Memoria viva
Vittoria Aganoor e Giacomo Zanella do grandi poeti padovani
La laurea de me fiolo Giovanni. ’Na bea sena co i parenti al ristorante "Aganoor". El me raconto fin a le tre de note
de Gigi Vasoin
Teatro e Teatri
El Teatro de i Obizzi... ’desso Cinema Teatro Concordi
de Piero De Franceschi
Salute
Luigi Calza
Pioniere e maestro de l’Ostetricia a Padova
de Mario Galdiolo
|
