|
Mestieri sconparsi
Le "Canolare"
 |
| Le scominsiava da pìcole a ciapar confidensa co la gerla... |
Na volta, quando se rajonava par canpanile e ogni canpanile sonava le so canpane, qualchedun gavéa el corajo de portare anca chel proverbio che 'l disea: "Dal Furlan, né bon vento, né bon cristian." Altri tenpi. Dopo ghemo inparà a far qualche viajo pi in là de l'onbrìa del canpanile, conóssare altra gente e riconóssare che ogni rassa o region ga le so bone e valide qualità. Guai se tuti gavìssimo la stessa testa!
Ancò semo sofegà da la plastica che, tra l'altro, savemo che la xe quasi indistrutibile. De plastica xe piena la cusina e tanta parte de le robe usà in medissina come siringhe e tanto altro. In casa po' no ghe xe che plastica, parfin la tovaja che querse la tola.
A la Fiera de i Santi de Arzegnan, me son fermà a vardare on banco del tuto particolare e me son inmagà a védare quanta roba el gavéa e tuta in legno. Go assà da parte altri banchi e vardando tute chele robe in legno, anca colorà, son tornà indrìo co la mente de almanco sinquanta ani. E me se ga presentà el ricordo de le "Canolare" che in primavera o al primo istà le passava par le nostre strade co na gerla stracolma e che le ofrìa de tuto. Te podevi domandarghe quelo che te ocoréa, anca se no te lo vedivi co i to oci e te paréa inpossìbile che 'l ghe fusse rento chela gerla. Come on prestigiatore, lore le jera svelte a tiràrtelo fora.
Le "Canolare" le ciapava el nome da i "canói", speciali arnesi sbusi che le done le portava ligà a l'altessa de la vita. Ai "canói" le infilava i feri par tuti i lavori a malia. Le canolare le se presentava sol porton de le case de canpagna dove jera pi fàssile contentare fameje numerose e da la vita ligà ai lavori de i canpi, ma anca par le strade de i nostri paesi e le osava: "Canolare, canolare con cànole de ogni tipo, par tuti i usi."
Le jera tute done alte e robuste, co la pèle brusà dal sole e da l'aria, con du oci che te fulminava, senpre par strada anca col maltenpo, co na resistensa che no conosséa soste. Le jera soratuto "furlane", da l'Alto Friuli, ma ghe ne jera anca che vegnéa da i monti Lessini. Solo na volta go visto una de lore, sicuramente de na serta età, posare el culo so na mureta par solevarse dal peso de la gerla. Drio strade anca da on paese a l'altro, senpre a piè e co na gerla tanto pesante che le costringéa a caminare piegà in vanti. La gerla, pi lunga e larga de la schena, le la tegnéa ferma co cinghie o corde torno le spale e in vita. Le vece jera vestie de moro, co le còtole larghe e lunghe, la traversa, on malion e la testa rento on fassoleton, anca quelo moro, che ghe scondéa i caviji e riparà le rece. Le pi zóvane, tra l'altro anca atraenti, le gavéa vestiti scuri ma ricamà a fiorami e te ghe inmaginavi do ganbe lunghe e forte. Le portava grosse calse de lana e i sòcoli; qualche volta invesse le go viste, co 'l bel tenpo calsare pantòfole de veludo o de tela e co la sòla de corda.
Rento la gerla le gavéa anca el posto par le so misere robe par canbiarse. Le girava de solito in copia. De note, col consenso del paron e secondo el tenpo, le dormìa in stala o anca sol pajaro, ma le se tegnéa senpre tacà la gerla.
Quelo che le ofrìa el jera ricavà dal legno con scopèi, subie, cortèi o al tornio. De le volte te vedivi che gavéa lavorà la man de l'artista e ricavà da l'umile materia, robe de valore. I lavori inpienava i lunghi inverni al caldo de la stala, iluminà dal canfin. Se dava da fare i veci, le done e i tusi pi grandeti. I òmini invesse i jera a l'èstero, anca al de là de l'oceano o, i pi fortunà in Svissera e in Germania e parfin ne le miniere del Belgio da dove i tornava, se i jera fortunà de portar casa la pèle, colpìi da la silicosi.
Provemo a nominare on poche de le robe che le canolare ofrìa. Par la cusina: panari e panariti, méscole par smissiar la polenta, guciari e forchete de ogni tipo e lunghessa, méscole par le tajadele, tajapan, martèi con ponte par morbidire la carne, pestasale, piati e scudele. Par i lavori de le done: fusi par filare a man la lana, lino e cànevo, uvi de legno par ramendare, batipani, spàssole e scoete de ogni tipo, canói par infilare i feri da lana, scagnèi posapiè. Par i contadini: i famosi scagnèi a na ganba sola, tegnùi ligà in vita par quando i dovéa mónsere diverse vache, sèssole, spine e coconi par vesùi e boti, canolini par spilare el vin fati come on rubineto che, dàndoghe meso giro, i assava passare el vin e, co naltro meso giro, el se sarava. Se la cànola perdéa la giossa, ghe jera senpre soto na scudela o na pianeta. Come se podéa pèrdare anca na sola gossa de vin, la droga de i porican?
A sto punto me ricordo de Fausto, on me conpagno dal servelo on poco inibià. Na volta el ga fato córare so pare parché el vin alagava la cantina. Nantra volta i lo ga catà inbriago indormessà soto na onbrìa, tanto che i ga dovesto métare el lucheto anca a la porta de la cantina. Nantra volta i lo ga brincà par le strasse quando, da la tesa, el jera drio butarse zo sora na brancà de fen par tera sol pòrtego.
Volemo conclùdare, pensando a le "Canolare" de on tenpo: done gajarde e senpre a piè, curve soto el peso de la gerla, ma done co na dedission amiràbile par el sacrifissio, la costansa e l'amore incondissionà par la fameja, senpre bisognosa e, inoltre, afetuosìssime par la prole che spesso le se portava drio, tegnéndola par man, rosegando magari na grosta de pan discalso. Semo ciapà, credo, da la maraveja par la generosa e umile figura de ste done de na volta, quando la vita gavéa fini ben diversi da quei de ancò, done cressù ne la miseria, da le poche parole, ma fémene de fede, dedission, sacrifissio continuo e totale altruismo.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Adotare Quatro Ciàcoe...
L'Ano 2008 ga dà le consegne a l'Ano Novo che ghe someja a on canpo 'pena arà: ghe vegnarà somenà fromento o erba spagna, colza o ravazon, biétole o zinquantin...e lu, giorno dopo giorno, el dovarà procurarghe sole, onbrìa, piova, neve e sgoaza, e stare 'tento che no vègna le zéleghe o s'intana le zecarole
de Mario Klein
Da Verona
Sù e zo, a pié e in moto
de Giacinta Dall'Ora
|
