|
Editoriale
Adotare Quatro Ciàcoe...
L'Ano 2008 ga dà le consegne a l'Ano Novo che ghe someja a on canpo 'pena arà: ghe vegnarà somenà fromento o erba spagna, colza o ravazon, biétole o zinquantin...e lu, giorno dopo giorno, el dovarà procurarghe sole, onbrìa, piova, neve e sgoaza, e stare 'tento che no vègna le zéleghe o s'intana le zecarole
 |
| Verzemo l'ano co un soriso: el porta ben! |
Anca el 2009 ga la so bela responsabilità: tuti se speta calcossa de bon, de mèjo, de giusto, de manco Borse che va sù e zo, de manco fàbriche che sara, de manco gente che resta senza posto e operai che more sul laoro, de manco aumento de prezi de i gèneri de consumo: pan, pasta, carne, verdura, luce, gas, trasporti...
Ma da solo anca el 2009 no 'l farà gnente: ghe vorà senpre la testa de chi dirige la baraca, la man de chi fa nar 'vanti el treno de l'atività umana, la volontà de i sìngoli, la generosità de i tanti.
E so on postesin pìcolo, pìcolo ghe xe anca la realisazion de la nostra rivista che, pa 'l 27° ano la afronta tuti i problemi che conporta on giornale come el nostro. Purtropo l'oferta culturale e el restauro conservativo de le nostre origini, el recùpero struturale de i valori e la rivalutazion de la nostra lingua veneta i ga un prezo, un prezo massa alto par èssare pagà da i pochi che ghe sta a cuore ste robe. E par fortuna ghe xe qualche Ente pùblico – no ocore fare nomi – che ne dà na man. Ma no basta: el pensiero de no poder pi continuare sto bel "sogno" el tormenta i sòni de chi tien de ocio la cassela de la farina...
El primo dolore lo ghemo provà có ghemo dovesto (da otobre 2008) ridure le pàgine, ma oncora no ghe semo. Par questo, a malincuore, l'Editoriale Padova ga tolto la decision de domandare aiuto, ancora na volta, ai letori, ai abonati novi e a chi rinova l'abonamento: dal 1° genaro 2009 el prezo passa a 4 Euro, quelo de l'abonamento in Italia a 40 e a l'èstero 80.
Questo che ve vien domandà, cari letori, el xe on sacrificio che insieme a tuti st'altri el podarìa portarve disturbo. Savemo però, che si massa inteligenti par no capire sta situazion e che pitosto de pèrdare Quatro Ciàcoe a rinunciarì a on chilo de pomi... Bravi! El vostro esenpio xe da copiare e da moltiplicare par tuti quei che ghe cata gusto a rumare tra le parole che parla del nostro èssare veneti e de la nostra grande tradizion umana e culturale.
Capire questo, vol dire adotare Quatro Ciàcoe, sentirla come na propia creatura e, de conseguenza, sentire el bisogno de "alimentarla", de farla créssare, de cocolarla, de tirarghe le rece... insoma sentirse el mèrito de portare 'vanti na iniziativa che ne rapresenta degnamente e che ne fa fare bela figura in giro par el mondo.
Par adozion intendemo non solo restare abonà, ma anca, có se ga da farghe on regalo a qualchedun, abonarlo a Q.C., avisando in redazion parché a la persona ghe vègna mandà na létera par farghe savere chi xe l'oferente; adozion vol dire farghe fare la publicità a qualche parente o conossente su le pagine de Q.C.; adozion xe parlàrghene in giro... L'idea no la ne pare na proposta "indecente", anca parché no la porta gnente de novo nel mondo che vivemo, dove ghe xe l'adozion de putèi (che ga da 'vere la precedenza!), l'adozion de òpere d'arte, de spiage, de cani, gati, foche, lupi, àlbari secolari... Quindi pol starghe anca sta sensibilità verso l'unico mensile che no inquina la mente...
Se permetì, l'augurio de sto ano ghe lo femo, anca a nome Vostro, a... Quatro Ciàcoe.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Adotare Quatro Ciàcoe...
L'Ano 2008 ga dà le consegne a l'Ano Novo che ghe someja a on canpo 'pena arà: ghe vegnarà somenà fromento o erba spagna, colza o ravazon, biétole o zinquantin...e lu, giorno dopo giorno, el dovarà procurarghe sole, onbrìa, piova, neve e sgoaza, e stare 'tento che no vègna le zéleghe o s'intana le zecarole
de Mario Klein
Da Verona
Sù e zo, a pié e in moto
de Giacinta Dall'Ora
|
