|
Robe de Ciósa
La Madona del variolo
 |
| La statua de la "Madonna del vaiolo" che se vènera a Tajo de Po (RO). |
Su l'antica strada, ancùo deventà strada statale, ciamà 'na volta Via Romea, apunto perché ghe passèva i "romei", i pelegrini, provenienti da Venessia e da l'Oriente, nel trato fra Ravenna e Pomposa, che andèva a pie a Roma per devossion a pregare su la tomba de San Piero, a un sentenèro de passi da la cèsa parochiale de Tajo de Po (Taglio di Po), in provincia de Rovigo, el paese che à ciapà el nome dal storico "Taglio di Porto Viro", ordinà da la Serenissima Republica de Venessia nel 1604, ghe ze un basso e vecio edifissio, carateristico de l'edilissia polesana de sènto e pi ani fà. A ze el "Lazzaretto", usà un tempo anche come ospeàle e adesso del tuto abandonà. 'Sto rùdere ze stà testimonio nel 1887-88 de un terìbile flagelo che s'à abatùo sul paese: un'epidemia de variolo (in dialeto polesan: varòlo). Pare che el teribile morbo nero sia stà portà da l'equipagio de un pescherecio che tornèva, dopo la pesca d'autuno, da le coste de la Turchia ne l'otobre-novembre del 1886. In poco tempo a s'à difuso tra la popolassion bassopolesana.
Anche se Tajo de Po ze in provincia de Rovigo, ghe ne parlemo lo stesso, perché la ze una de le pi grosse parochie in diocesi de Ciósa.
El 27 zenaro de oni ano se celebra in sto paese la "Festa votiva de la Madona del variolo", stabilìa fin dal 1887 per ringrassiare la Madona per avere salvà i abitanti da l'epidemia variolosa.
La storia de 'sta festa ze 'na storia de vera fede, 'na storia del tempo che fu. In chel'ano un veceto, un serto Glorioso Soncin, morto verso i ani '70 del 1800, col viso buterà dal variolo nero, fortunosamente a s'à salvà per avere mosso un brasso quando che a gera dà ormai come morto e a stava per èssare trasportà sora un caro funebre verso el simitero.
La festa ze scomissià nel 1887 quando el sindaco de l'epoca, el curato e i capi-famégia del paese i à deciso de organizare 'na solene procession co la statua de la Madona de la Salute, che se trovava in cèsa, per implorare el suo agiuto afinché la fasesse finire la teribile epidemia, che continuava e semenare vìtime tra i stessi abitanti de Tajo de Po e de i paesi vissini. La malatìa infuriava cossì tanto che chi se malava a la matina, za a la sera del stesso giorno a gera trasportà in semiterio. La zente terorizà no aveva altra speransa che la fede ne la Madona. Lassando a casa i moribondi, done e òmeni corèva in cèsa a pregare, sensa preocuparse se i gera descalsi o no. A la visilia, de sera i fedeli, radunà in cèsa per impetrare la misericordia del Signore, i s'à incorto che el viso de l'imagine de la Madona pareva che a se ategiasse al pianto. I à sigà al miracolo. Un segno sicuro che la Madona partessipava a le soferense de 'sta zente e assicurèva la so intercession presso so Fio. Adiritura, vegnindo fòra da la cèsa, tanti - i dise - à savésto che i so malài scomissièva za a guarire... E cossì ze stà...
El morbo a poco a poco à calà la so virulensa fin a sparire. Da alora oni ano, come za dito, el 27 de genaro (nel 1987 ze stà selebrà el sentenario) se festegia la "Madona del variolo" co 'na procession per le strade del paese, che nei primi tempi se fasèva co la statua de la Madona portà a spala da òmeni, e po', pi tardi, messa su un caro adobà e trainà da sie o oto cavài bianchi, e infine trasportà da un veicolo a motore. La zente, 'na volta, concludeva la festa votiva, secondo l'uso de alora, magnando e bevendo in alegria su i pra vissini a la cèsa.
Testimoniansa artistica de 'sta Festa ze pure la formèla de bronzo, incastonà su la faciata de stile neoclassico de la cèsa parochiale de "Tagio de Po": la ze divisa in 12 quadri, e i conta co tanta espression el storico voto fato a la Madona: la statua ze custodìa in cèsa in te 'na capela , scomissià nel 1944, quando se temeva che le autorità militari tedesche, per frenare l'avansare de le trupe angloamericane, decidesse de far saltare in aria i argini del Po. In 'sta capèla risalta la belissima statua de la Madona, in grandessa quasi naturale, vestìa co' un bianco abito ricamà da done del paese esperte a ricamare e a cusire. El so viso e quelo del Bambin che ela tien in brasso ghe somégia a quei de tante done e de tanti bambini de 'ste umili tere bassopolesane..., che se trova proprio nel teritorio de la diocesi de Ciósa.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Adotare Quatro Ciàcoe...
L'Ano 2008 ga dà le consegne a l'Ano Novo che ghe someja a on canpo 'pena arà: ghe vegnarà somenà fromento o erba spagna, colza o ravazon, biétole o zinquantin...e lu, giorno dopo giorno, el dovarà procurarghe sole, onbrìa, piova, neve e sgoaza, e stare 'tento che no vègna le zéleghe o s'intana le zecarole
de Mario Klein
Da Verona
Sù e zo, a pié e in moto
de Giacinta Dall'Ora
|
