|
Da i Coli Euganei
La sena del mas-cio
 |
| Tuti gera inddafarà a far sù el mas-cio... |
In te chel nostro tenpo de tusiti, pien de curiosità par tuto quel che ne capitava 'torno, anca sentir parlare de la sena del mas-cio, gera na roba che ne metéa in alerta, spetando sto momento con inpassiensa. Qua però, bisognarìa cumissiare dal prinsipio, disendo par esenpio, quanto gera inportante in chei tenpi el mas-cio par na fameja de canpagna. Partimo alora da quando el nono 'ndava a la fiera de San Lorenso a conprare el mas-ceto picenin, e có 'l tornava a casa, el contava che el negossiante el gavéa dito: "A vu, Giacomo, che si un galantomo, ve lo dago anca a soldi spetare..." e ste paròe le ghe faséa slusegare i oci, anca parché invesse el lo gavéa pagà, cavàndose ogni pensiero. Dopo pranso, có rivava l'omo col mas-ceto, tuti coréa là 'torno a védarlo, e ognuno diséa contento la sua. Difati (na volta pi grandeta) mi gera stà rinproverà parché no gavéa dimostr° on gran interesse. Beh, dal dì che el gera rivà, eco che el faséa parte (insieme co le gaine, le arne, i cuniji e la cavara) del nostro vìvare. Par tuto l'arco de tenpo che ghe voea par diventare grosso, la fameja se preocupava par lu. In special modo quando no 'l magnava, parché ghe gera in giro a volte, el mal rosso, che faséa proprio paura. Me ricordo che on dì, che i gavéa ritardà a portarghe da magnare, el ga sforsà la porta del porsile, e el ne xe capità in casa el ma-scio, corendo soto la tola. E lì, se ga visto na confusion che ga ciapà tuti, dàndose da fare par farlo tornare in tel porsile, inpienàndoghe el so albio de magnare. "Curi, ciàpeo", diséa le zie, "che in te na fameja qua arente, na volta, el mas-cio ga rabaltà la tola co tuto el magnare de sora." E va ben, tuto invesse gera finìo co na bea ridada.
Có rivava i primi fridi, e se avissinava el tenpo che el mas-cio, ormai beo grosso, el dovéa èssere copà. Eco, sta roba no ghe faséa piassere a nessun, parché se ghe gera anca afessionà al nostro mas-ceto, ma quea purtropo gera la so fine. Chel dì, non gera par gnente alegro, e noantri tusiti se vegnéa alontanà, parché non se vedesse gnente, e non se dovesse sentire el mas-cio sigare. Mi, po', la pi spaurìa de i tre fradèi, i me inviava a casa de parinti, e quando che i sighi rivava fin là, me tapava le rece con le man.
Del mas-cio se rancurava proprio tuto: co la carne se faseva i saladi, i musiti, le mortadèe, roejà col radisèo, e la lugànega. El grasso (lardo) servìa par consiero e cussì anca l'onto (strutto) che, na volta desfà, vegnéa fora le famose grasàpoe, bone co la poenta e anca drento la fugassa. Vegnéa messo da parte par vèndare, anca el pelo e le onge. A noantri, quando passava el strassaro sigando: "Strasse, ossi, fero vecio, megóe de suca, peo de mas-cio..." i me spiegava che col peo i faseva i bruschiti e co le onge, i pètene.
Ma rivemo al dì famoso e beo par tuti, de quando vegnéa fato sù el mas-cio. Par tuto chel dì, ghe gera in casa un giramento de gente, come se ghe fosse 'torno on semarolo de ave. Ognuno gavéa el so lavoro, e le done de casa, dopo aver destacà da i pòese na porta, le ghe destirava sora el sae grosso, che co na botilia de vero, el vegnéa infranto par farlo deventare fin. Dopo, le ghea el so da fare par pareciare la sena de la sera. Che bon che gera chel magnare! Me ricordo, la carneta, la parte pi bona del mas-cio, messa sù in sofegheto, drento na teceta de tera cota, col limon e el sùcaro, che se ciamava "la carneta dolse". Da alora mi no ghin'ò sentìa pi de cossì bona. Finìo tuto el lavoro, eco che rivava le persone invità par la sena del mas-cio. Se tratava, de qualche parente e tri, quatro amissi, i pi cari. Tuti alegri 'torno la tola, se parlava più o meno del mas-cio, e de come che 'l gera cressù ben, col lardo pi alto de na spana. De quante brasòe se dovéa darghe ai vissini, che za ne gavéa dà la brasola del so mas-cio, e bisognava ritornàrghea. De qualche tochetin che bisognava darghe a le persone pi poarete. Ma 'ndando avanti col magnare, eco che ogni ano se spetava che el Barba Gigio disesse le so filastroche. Me ricordo, che una la parlava del novo "tranvài" che portava in sità e che gera stà inaugurà. Vedemo se me ne ricordo qualche tocheto: "Ghe gera on bòssolo, al capitèo, / che parlava de bruto e de beo.../ Adesso che i ga inventà el tranvài / i caretieri cossa farai? / Ghe tocarà, porca la cagna / ciapare le vanga e 'ndare in campagna..." E se rideva tuti co ste filastroche del Barba Gigio, che le finìa cussi: "Mi son vecio / go oto crosare / sento che de pi non posso portare. / Via, contentémose de quel che vien, / e alora el mondo 'ndarà pi ben." E in sto momento me vien da pensare, che a modo suo anca el Barba Gigio, gera on pochetin poeta. Ma prima che la famosa sena fusse finìa, ghe gera senpre qualcun che schersando, faséa finta de voler tajare tri, quato saladi, e dopo magari anca na panseta e na sopressa. E qua el Barba el se rabiava sul serio, el 'ndaséa fora par la porta disendo: "Magnè tuto, magnè, e doman noantri se magnarà poenta e séola, madonine de gesueo." Tuti se rideva de gusto, anca se le zie faseva fadiga dopo, a farghe capire che el gera tuto on scherso. Schersi che alora i ghea el posto che adesso ga la television.
Senpre durante sta sena, vegnéa cantà tòchi de vita vera. Me ricordo el discorso che alora (cussi i diséa) gera 'ndà farghe a la sepoltura de on familiare, che on fradèo gavéa fato, disendo cussì: "Caro fardèlo, gèrimo in du fardèli, ma ora tu sei là e io sono qua. Gèrimo in due fardeli, e ora, e ora, la morte ti hanno imbrogliato..." Sto fradèo vivo, pareva che el bevesse qualche onbra in pi, e penso no sia difìssie da capire, sentendo sto discorso.
Come xe canbià i tinpi, gente! Quanto tenpo xe passà! Certo che alora el divertimento gera difarente e de tanto, da queo de oncò. I grandi se divertìa con poco, e i tusiti i staseva a scoltare a boca verta e a oci incantà, domandando a la fine, tanti parché. Sti racunti de vita vera, a la gente de adesso non ghe par veri, e i tusiti (e questo me xe capità a mi) i se li fa lèsare da so nona, come se i fosse fiabe. Chissà, me vien da pensare, come sarìa contento el nono Giacomo, de èssare rivà drento na fiaba, come quee che ne contava lu on tenpo, parché ne rivasse el sono. "Siabe" come le ciamava lu, che ne ga insucarà l'età pi bea, e le ricordemo ancora con comossion.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Adotare Quatro Ciàcoe...
L'Ano 2008 ga dà le consegne a l'Ano Novo che ghe someja a on canpo 'pena arà: ghe vegnarà somenà fromento o erba spagna, colza o ravazon, biétole o zinquantin...e lu, giorno dopo giorno, el dovarà procurarghe sole, onbrìa, piova, neve e sgoaza, e stare 'tento che no vègna le zéleghe o s'intana le zecarole
de Mario Klein
Da Verona
Sù e zo, a pié e in moto
de Giacinta Dall'Ora
|
