|
Da Adria (RO)
Mi molo i mi gai...
 |
| Prima de l'istà Toni i l'à ciamà a soldà. |
Fra tanta zente zóvene in Borgo, jera pussìbile che saltesse fora – a ogni primavera – qualche cubia nova. E le robe le se faseva serie in poco tenpo. La mare de la fiola ciapava in parte quela del fiolo ch'a ghe staseva drio e, sensa torla tanto in largo, la ghe domandava che intension ch'a gheva el mas-ceto. St'altra jera costreta a parlare a so fiolo faséndoghe la so mata paternale: "S'a te ga intension serie co chela fioleta, ben; si no, mòlela sùbito che la vaga pa 'l so destin, che mi no vojo question par done." E sto chì el jera costreto a tor la so decision: andare in casa o molarghe dal tuto. Ma no l'è senpre andà cussì. A rónpere la règola ga pensà Tulo Crocale. El se portava drio sta nomenaja no parchè el fusse poco svejo, che ansi el jera uno di chi birbi che s'a no ghe se sta 'tento el te magna la marenda int'el sestin, ma parchè la jera el marchio de fameja: Nane Crocale jera so nono; Berto Crocale jera so pare; de conseguensa lu no 'l podeva èssere che Tulo Crocale. Quando che l'à smesso le braghe curte e ghè cressù i primi peli soto 'l naso, l'à scuminsià a starghe drio a la Mariàngiola, la fiola de Gigi Tron, ch'la staseva zo par la contradela inte la casa tacà a quela de Gisto falegname. Le prime volte che sti du fiòi i à scuminsià a stare squasi tute le sere d'istà sentà su i scalini de l'àrzere de la strada, com'jera abitudine par tuti i fiolati del Borgo, squasi gninsun ga fato caso. L'è stà la vecia Ginevra che par prima, in botega da Cesare casulin, a ghè scapà.
"Ma ne ve pare che Tulo Crocale e la Mariàngiola Tron i staga massa sentà arente tute le sere su i scalini? Te vidi st'altri fiòi che ora i è sentà chì, ora i è sentà là, ma luri du i è senpre lì cicì cocò. Mi digo che quìi i è drio conbinare chelcossa." è bastà questo parchè tuti i oci de le done del Borgo i abia scuminsià a puntarse su la cubia, conpresi quìi de la Rosa Tron. Cussì l'à ciapà in parte la fiola. "Ne te sarà mina drio cunbinare chelcossa ti e chel bel gegin de Toni Crocale?" "Ma mama, cossa dito?" "Digo, digo, parchè gh'è zente co i oci più verti d'i mii. Varda ti ch'a ne m'incorza ch'a te scuminsi a smorosare. E po... propio co Toni Crocale?! No te ghe ne n'ivi mina de mèjo? S'a te vedo ancora sentà incoste a chel bel tomo ghe lo digo mi a to pare..." Se capisse che la fiola ga d'aver parlà col merlo parchè no i s'à più visti sentà su i scalini. Na sera gh'jera lu, n'antra ela, n'antra ancora gninsun d'i du... Pareva che la Mariàngiola ghesse da da mente a so mare. Ma pareva! Tuti i minuti de la giornata i pol deventar boni par védarse quando du morosi i lo vole e cussì faseva luri. Passa l'istà, riva l'autuno, più gninsun se senta su i scalini e de chi fioi ne se n'à più parlà, parchè ormai i s'jera talmente sbirbesà ch'i ghe la faseva a so mare, so pare e a tuti i curiusi del Borgo. Mam man che 'l tenpo passava però deventava senpre più difìssile tegner logà tuto. Se sa che "amore, tosse e pansa, no i se sconde". Qualchidun a i eva visti al cinema insieme, qualche altro el i eva incontrà a spassesare pa'l viale de la stassion, 'n antro el i eva catà int'un cafè, sentà al stesso tavulin. Ne ga volesto tanto a far do più do e cussì tuti in Borgo i à scuminsià da novo a tegnerli par morosi, anca se luri no i se faseva védare insieme. Le do mare, có le se catava a la ponpa le faseva finta de gninte, ma le gheva chel'anda de mi sò quelo che anca ti te sa e fra l'altro no me despiase; cussì, come gnanca, le ciciolava fra de lore do più che co tute st'altre. Ogni tanto, squasi par caso, el discorso cascava su i fiòi. "Toni, adesso el lavora in oficina da Ponteselo. El paron l'è tanto contento. El dise che có el ghe mete le man lu su na machina a ne ghè gnanca bisogno de controlare: a s'è sicuri che 'l lavoro l'è ben fato!" "Anca la Mariàngiola, sala, l'è tanto brava: sia in casa che a scuola, sì, parché, sala, la va a scuola da sarta da la Maria Sucheta." "Me fa tanto piassere..." "Eh sì, i è propio du bravi fiòi..." "Pecà ch'i sia massa zóveni." "Mi có me so' tacà col mi Nane a gheva disissete ani." "Ma vorla métere ai nostri tenpi. Gèrimo purassà più maturi che no fà i fiòi de 'desso..." E le 'ndava 'vanti senpre fasendo finta de no savere quelo che saveva tuti.
Prima de l'istà Toni i l'à ciamà a soldà. 'Pena partì i l'à mandà in Sicilia, po a Roma e finalmente a Bologna. Int'i primi tenpi in licensa i ghe lo mandava poco e po el viajo el jera massa lungo e el costava na stramenara de schei: Toni vegneva casa ciare volte. Có l'è stà a Bologna el vegneva zo più spesso, però qualche volta, co la scusa che la licensa jera massa curta, no 'l se faseva védere più de tanto da la Mariàngiola, che, come ch'la vegneva a savere che 'l jera a casa, la scuminsiava a sbrinsolare su l'àrzere o co p'r andare a la ponpa o p'r andare dal casulin o p'r andarse a tore el "Grand Hotel" o el "Sogno". Naturalmente ste distrassion la le vedeva solo ela e al massimo la ghe le cuntava a la Verbena, ch'la jera la so amiga, quela vera, ch'a te poi confidarghe i to segreti sicura che no l'andarà a dirli ai quatro venti. Finisse el militare, Toni el torna a casa, el cata da novo el so posto in oficina e pare che tuto vaga cofà prima; tuto propio nò: prima jera lu che coreva drio a la Mariàngiola, 'desso jera ela ch'l'andaseva in serca. Jera ciaro che 'l militare chelcossa l'eva canbià. Lu diseva de nò ma le done par serte robe i è come le ave che le sente l'odor d'i fiuri a distanza de chilometri. Defati a Bologna, un fià spinto da i conpagni, un fià par provare l'emossion, un fià par farse védare omo, oltre a i normali gireti co quele che co i militari le se ciapava un franco, l'eva brincà la strada de n'antra ragasseta, più birba, più svelta e più fàssile de la Mariàngiola. Se sa che có uno el ga petà el naso, el fenisse par ciaparghe gusto. Cussì al ritorno no'l jera più tanto caldo verso la morosa vecia ... Sta chì l'à scuminsià a inmusonarse, a tola la spelucava, a so mare la ghe rispondeva indrìo, co i so fradèi la jera senpre pronta a radegarse e no se podeva dirghe na parola storta ch'la saltava via cofà na cavaleta. A pareva ch'la fusse insustà co tuto el mondo. Cussì l'à fato el sbalio più grosso che la podeva fare. Na volta che la jera co Toni, invesse de sercare de tondarlo e tore le robe in dolse, la ga intimà a muso duro e breta fracà: "O te vien in casa, si nò ciàpate sù e va par la to strada!" L'è stà come vèrzerghe el ponaro a le galine: Toni, sensa fàrselo dire n'antra volta, el ne ga più vardà. E ela l'à scuminsià a disperarse. So mare, che da vecia birba, l'eva capì tuto, prima l'à sercà de tirar sù la fiola e dopo, có l'à capìo che non gh'jera altro da fare, l'è 'ndà in casa da la Dele strapegàndose drio la fiola e l'à fato un sancassan cussì grande ch'è saltà fora tuto el Borgo. A un serto punto la Dele l'à parà fora de casa vaca e vedela, portando la barufa in meso a la corte. Le robe ch'è vegnù fora da chele boche no le se pole riferire. Se una l'in diseva una grossa, st'altra ghe rispondeva con una più grossa. Có la barufa l'è rivà al colmo, la Dele la ghè saltà sù a la Rosa, che la tegneva par man la Mariàngiola pianzente come na vinarola, "Sato cossa ch'a go da dirte: mi molo i mi gali e ti tien sù le to galine!" E lì le s'à ciapà pa'i cavì ch'a s'a no gh'jera i òmeni a stramesarle, andaseva a finire ch'i s'in dava un fraco tanto grande da fenire tute do a l'ospedale co' la suca rota.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Adotare Quatro Ciàcoe...
L'Ano 2008 ga dà le consegne a l'Ano Novo che ghe someja a on canpo 'pena arà: ghe vegnarà somenà fromento o erba spagna, colza o ravazon, biétole o zinquantin...e lu, giorno dopo giorno, el dovarà procurarghe sole, onbrìa, piova, neve e sgoaza, e stare 'tento che no vègna le zéleghe o s'intana le zecarole
de Mario Klein
Da Verona
Sù e zo, a pié e in moto
de Giacinta Dall'Ora
|
