|
Editoriale
Poro dialeto!
Mai el gavarìa pensà de deventare el "tormentone" estivo. Xe bastà na proposta polìtica in quel de Roma, par descadenare on putiferio che el dialeto, ogni dialeto no ’l se meritava
 |
| On documento del 1924, quando se partiva dal dialeto par inparare l’italian. |
Quante ciàcole, o mèjo, ciàciare inùtili, quante pagine de giornài, quante sentenze spuà anca a spropòsito, scomodando ministri e ministeri, presidenti e assessori, leterati, scritori, opinionisti, linguisti... Però, mai dito de la gente qualunque, quela che lo parla, quela che lo scrive non par creare on musèo de le parole, ma par tratare, registrare, testimoniare quelo che on dialeto rapresenta anca oncò, "specio de na realtà che no esiste più" (secondo Gian Pietro Favaro, il mattino di Padova de l’1 agosto 2009), ma scrigno, cassaforte, tabernàcolo de valori e de na cultura che, in bona parte, ga generà quelo che semo oncò.
Da sto anbaradan se semo sentìi tirà in balo e credemo propio che Quatro Ciàcoe la possa dire na parola in piaza, no avendo mai esaltà e inposto na parlata (el dialeto veneto) a spese de naltra (l’italian), semai, in 27 ani de vita, soltanto zercà de colmare el vodo lassà da l’istruzion nazionale che mai la se ga preocupà de insegnare anca la storia, la leteratura, la sienza che ga raise profonde so ’l teritorio. Ne i ultimi ani ghe xe stà qualche timido contributo a livelo regionale: ghemo tri documenti uficiali, che porta la firma del nostro conpianto prof. Manlio Cortelazzo.
E, come che disévimo, in tuti sti ani Quatro Ciàcoe la ga portà in granaro la memoria de na caterva de veneti apassionà de dialeto, che co i so scriti no i ga mai dito de volere far deventare el dialeto materia de studio ne le scole, ma i ga salvà pàgine de storia, de vita, de cultura orale, che de sicuro sarìa nà perse. Se po’ tuto questo dovesse in qualche modo deventare materia de conossenza anca ne le scole, no dovarìa far nàssare polemiche e no la dovarìa èssare vista come na violenza, gnanca ne i confronti de i putèi vegnù da fora, parché se i xe qua, xe giusto che i conossa on poco el "qua", la tera dove i xe drio inpiantar raise.
La socetà "globalizà" la dovarìa èssare riconossente a sti generosi cultori del dialeto, che, senza èssare de i Meneghello, Barbarani, Dino Coltro o de i Zanzotto, tuti co la so variante linguistica, no i ga inteso métare in moto la "machina del tenpo" par riportarne indrìo, ma i ga inpizà on lume a petrolio parché se veda el nostro passato recente, fato de usi, costumi, tradizion e na s-cianta de pi bona educazion.
No entremo nel mèrito de i "docenti qualificati" parché no ’l xe de nostra conpetenza e parché la question de l’insegnamento del dialeto ne le scole la xe pi conplicà de quelo che se pensa, a tacare dal nostro veneto, dove no ghe xe una, ma sete lingue e na stìrola de varianti. Preferimo sfiorare el problema grafia, dove sarìa ora che tuti capisse che, có se parla de grafia, no se intende voler "codificare una lingua", cioè "unificare i suoni delle parole", ma regolamentare el modo de esprìmarli co i segni de la scritura. Ghe xe stà chi ga protestà sonando le canpane (se fa par dire!), quando xe vegnù fora, da parte de la Region, el Manuale di Grafia Veneta Unitaria, e ghe xe oncora chi se ne frega de le "regole de grafia" che Q.C. ga publicà a pag. 16 e 17 del nùmaro de febraro 2006, anca se le xe regole valide par tute le sete o le... setantasete lingue venete.
Distanti, quindi, da "test, mozioni e emendamenti", solo confermemo el nostro amore al dialeto e a le parole che ne ga fato vegnere grandi e che ne ga conpagnà so la strada de la conossenza.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Poro dialeto!
Mai el gavarìa pensà de deventare el "tormentone" estivo. Xe bastà na proposta polìtica in quel de Roma, par descadenare on putiferio che el dialeto, ogni dialeto no ’l se meritava
de Mario Klein
Salute
Giornata del medico 2009
de Mario Galdiolo
Ciàcole visentine
Le zornade ìtalo-norvegesi de Sandrigo
La manifestassion de fine setenbre, che valoriza el bacalà, se farà par la prima volta sensa el so stòrico fondatore, l’av. Benetazzo
de Giordano Dellai
|
