|
Zente de Padova
Speronella Dalesmanni
 |
| Speronella Dalesmanini e Olderico Fontana te na rievocassion storica de i giorni nostri a Monselice (PD). |
No xe veramente fàssile distinguere fra storia e legenda quando se parla de Speronella Dalesmanni o Dalesmanini o ancora Dalesmanin nata a Padova nel 1149. Fiola de Dalesmanno e Mabilia Dalesmanni, a so volta mare de Zamponia e de Jacopo da Sant’Andrea. La ga vudo un fradèo, Dalesmanino, che nel 1183 el xe sta nominà Console de Padova e nel 1204 adiritura Podestà de la nostra sità.
Pararìa che za tra el 1163 e el 1164 Speronella fusse sposà co Jacopino Da Carrara e che la ghesse divorsià da lu par unirse (o sposarse?) co el vicario inperiale de Padova, el conte Pagano della Torre, ’ndando a stare sul castelo de Rocca Pendice, ne i nostri coli. Le cronache dize che el divorzio sarìa stà fra le riche dame de l’època na selta bastansa comune.
La legenda conta in modo diverso el fato. I dize che el conte Pagano nel 1166 la gabia rapìa de bruto contro el so volere e che el se la gabia portà a Rocca Pendice.
El fradèo de Speronella, Dalesmanino, par lavare l’onta e par vendicarse el ga alora organizà l’assedio al castelo insieme ai nobili de Padova, tra i altri ghe jera Alberto da Baone e Azotto degli Altichieri. Sto assedio ga durà fin al 23 giugno 1164, vigilia de San Giovanni, e el se ga concluso co la sconfita del conte Pagano, rapresentante de l’inperatore Federico Barbarossa. Chi dize che el conte Pagano dopo che el se ga areso el gabia lassà Padova, chi dize invesse chel sia sta copà dal pare de ela, Dalesamanno. Sta vitoria ga determinà la nàssita del libero comune de Padova e parché restasse el ricordo de sto fato ogni ano, a la vigilia de San Giovanni, vegneva fati de i zoghi popolari par tuta la sità.
Xe vero, no xe vero? A darghe manforte ai nobili padovani contro el conte Pagano e de conseguensa contro l’inperatore Federo Barbarossa, se gheva mosso tuti i nobili de la Marca. Da qua ga scominsià tutto chel movimento che se ga concluso col pato de Pontida.
Xe vero, no xe vero? Dal rapimento de na bela dona xe nato un fato de dimensioni storiche?
Pararìa che in efeti Treviso, Vicenza, Verona e altre sità su l’esenpio de Padova se gabia ribelà al Barbarossa, diventando anca lori liberi comuni.
Ma tornando a la nostra storia vegnemo a savere che Speronella, liberà dal conte Pagano, la xe stà maridà a Pietro, fradèo de Alberto da Zaussano de la fameja Traversari. La storia amorosa de sta nobile padovana no finisse miga qua. Dopo Pietro i dize, anca se no xe certo, che la gabia sposà un serto Pietro da Gennaro. Ma nel 1170 el ga molà anca questo par maridarse co Ezzelino II, "il Monaco" de la fameja de i Ezzelini, castelan de Onara, uncò frassion de Tombolo.
Secondo el storico padovan Giovanni Brunacci (1711-1772) Speronella scanpando de note da Ezzelino dopo ver sentìo vantare proprio da so marìo, oltre a la richessa, a la nobiltà d’animo, anca le prestanse amorose fora del comune de Olderico Fontana la se ga rifugià da lu, sposàndolo.
Riporto el comento de un so biografo che dize che Olderico xe sta el so ultimo marìo, e chi sa quanti altri ghe ne saria sta, se no la fusse morta...
Speronella Dalesmanni la xe morta el 24 dissenbre 1199. La xe ricordà per el so testamento che xe conservà presso la biblioteca capitolare de Padova. In sto documento la nomina erede el fiolo Jacopo da Sant’Andrea, ricordà da Dante ne la so Commedia pa le so man sbuze.
Ma in sto testamento la xe stà generosa co tuti. Col marìo, co la fiola Zamponia, co un tale Spinarello di Zulinigo, co cese, conventi, ospedali.
La nostra sità no se ga ricordà de ela intitolàndoghe na strada o na piassa e invesse el Comune de Borgoricco si, intestàndoghe na strada nel graticolato romano.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Poro dialeto!
Mai el gavarìa pensà de deventare el "tormentone" estivo. Xe bastà na proposta polìtica in quel de Roma, par descadenare on putiferio che el dialeto, ogni dialeto no ’l se meritava
de Mario Klein
Salute
Giornata del medico 2009
de Mario Galdiolo
Ciàcole visentine
Le zornade ìtalo-norvegesi de Sandrigo
La manifestassion de fine setenbre, che valoriza el bacalà, se farà par la prima volta sensa el so stòrico fondatore, l’av. Benetazzo
de Giordano Dellai
|
