Salute

Giornata del medico 2009

Al centro ne la foto, la prof.ssa Maddalena Munari col prof. Giuliano Lenci, atornià da autorità e coleghi.

Qualche mese fà ne l’antica e splendida Abbazia Benedettina de Praglia, a Teolo (PD), xe stà fata come romai tradission vossuda da "L’Ordine dei Medici Chirurghi e degli Odontoiatri della Provincia di Padova", La Giornata del Medico. L’interessante incontro riunisse ’na volta a l’ano, in te on clima de festa, mèdeghi e chirurghi insieme a amissi e familiari. On’ocasion fata a penèo par far comunèa, conóssarse e discórare de argomenti e problemi ligài a la categoria mèdego-chirurigica.
La "Giornata" xe scumissià in te ’na sala stracolma de pòpolo co ’l saludo ai presenti e l’introdussion ai lavori del Segretario de l’Ordine, dot. Riccardo De Gobbi. Dopo de lu ghe xe stà dà la parola a le autorità presenti: fra e altre Milvia Boselli e ’l prof. Giuliano Lenci (ani indrìo Presidente de l’Ordine) in rapresentansa del Comune de Padova.
El dot. Maurizio Benato, atuale Presidente de l’Ordine, nel so intervento ga ricordà a grandi linee la strada fata da l’associassion in tuti ’sti ani e ga messo so ’l piato proposte e programi par el prossimo futuro. Al discorso del Presidente e de altri relatori, xe seguìa la premiassion de ilustri mèdeghi e chirurghi che xe rivài al conpimento del 50° ano de laurea; ognun, ricevendo l’atestato de benemerensa, diseva do parole de circostansa, condìe da anedoti e ricordi vissudi in prima linea ne le corsìe, sale operatorie, anbulatori e laboratori ospedalieri. Interessante tra i altri xe stà l’intevento del relatore, el prof. Mario Lise, uno de i luminari premiài, che ga parlà de la storia de la Chirurgia a Padova, inmessonando i mitici, grandi professori, docenti ne la nostra prestigiosa Università patavina e operanti ne i nostri ospedài, da la seconda metà de l’800 a tuto el ’900 fin a rivare ai grandi traguardi de i trapianti d’organo (rene, core, fegato, polmoni, ecc.) de i quali anca lu xe stà uno de i protagonisti.
Dopo el giusto riconossimento ai mèdeghi e chirurghi "anziani", se xe passà a la presentassion de i zóvani neo-laureà, scomissiando co uno de lori che ga leto al microfono, rivisto e agiornà ai nostri tenpi, el "Giuramento di Ippocrate" e drìo man, finìa la letura, i novi laureà in fila, passando davanti el microfono i diseva ognun el so nome e cognome e in risposta al Giuramento la frase: "Lo giuro!", ricevendo de seguito da i rapresentanti de l’Ordine’na pergamena in ricordo.
Altro bel momento xe stà la consegna de la Targa d’argento e del Premio "Augusto Colle", benemerensa istituìa da l’Ordine nel 1998 in memoria del stimatissimo Presidente de l’Ordine, morto ansitenpo. I riconossimenti, decisi da ’na Comission, vien dài a Mèdeghi e Associassion che se ga distinto par inpegno costante e concreto. Sto ano la Targa xe ’ndà a la prof.ssa Maddalena Munari co la ’sta motivassion: "Per aver valorizzato la cultura e tradizione tipicamente femminile di assistenza al malato quale principio, nella prassi professionale per aver felicemente espresso rigore morale nell’ambito della Medicina del Lavoro padovana, promuovendo i dettami del Codice deontologico."

El prof. Massimo Dal Bianco... a contato col "meritato" Premio. (foto GaMa)

A parlare de la prof.ssa Munari e de le alte cariche diretive che la ga coverto in tanti ani de atività e de le mi no sò quante publicassion sientìfiche publicàe ne le pi grande riviste in materia de lavoro, no bastarìa ’na pàgina. Noaltri de Quatro Ciàcoe, che gavemo vudo el piassere e l’onore de conóssarla e de publicare ’na so intervista nel numero de aprìe 2008, se congratulemo co la professoressa par la Targa, a parer nostro, stradelà de merità.
El Premio riservà ai laureati in Mediçina, Chirurgia o Odontoiatria, iscriti ai Ordini Professionali de la Region Veneto, che sia titolari de on Progeto o/e de ’na inissiativa umanitaria in canpo sanitario, par el 2009 xe stà assegnà al prof. Massimo Dal Bianco, Presidente de l’Associassion "Padova Ospitale senza confini" par el Progeto de cooperassion socio-sanitaria in Sierra Leone, uno de i Paesi tra i più poareti del mondo, devastà in ’sti ultimi ani oltre che da calamità naturali, malatìe, ecc., da ’na guera civile che ga causà oltre 200mila morti.
In ’sto Paese martorià l’Associassion benemerita ga deciso de organizare presso l’Ospedale de Lusnar, località de Mabesseneh nel Nord de la Sierra Leone (gestìo da i Padri Giuseppini del Murialdo de Padova) de le mission medico-umanitarie. De le squadre costituìe da on chirurgo generale, on anestesista, on ginecologo, urologo, dentista e do infermieri, che oltre a far diagnosi, assistensa e curare i pori desgrassiài che ghe càpita soto man, i se dà da fare par organizare e insegnare a persone del logo, in maniera de pareciarli e giutarli fin che ’na volta infrancài i possa cavàrsela da soli, rangiàndose, e co la fiaca liberarse par senpre da ’na vita de inferno.
On bel esenpio de solidarietà umana, ben messa in luce da na splendida "Giornata".

[torna sopra]