|
Ciàcole visentine
Le zornade ìtalo-norvegesi de Sandrigo
La manifestassion de fine setenbre, che valoriza el bacalà, se farà par la prima volta sensa el so stòrico fondatore, l’av. Benetazzo
 |
| ’Nte la foto l’avocato Michele Benetazzo. |
Xe donca rivà le zornade ìtalo-norvegesi, che se svolge a Sandrigo ’nte l’ùltima setimana de setenbre de i ani dìspari e che tradissionalmente finisse in... gloria ’nte i ùltimi tre zorni co la festa de ’l bacalà a la visentina, có vien nominà i novi "Cavalieri" de ’l pesse de ’l Baltico, che vien fato pipare a fogo lento ’nte le pignatone messe in piassa a Sandrigo.
Ma st’ano, in tuto sto anbaradan de apuntamenti e manifestassion, a pareci no podarà no scapare na lagrimeta par via de la sconparsa, el scorso 20 aprile, de l’avocato Michele Benetazzo, morto de infarto a casa sua, a otanta ani conpìi (el 7 febraro, dì de ’l so conpleano, Sandrigo ghe gaveva fato na bela festa), presidente de la Pro Loco de Sandrigo fin da la so fondassion, creatore de raquante manifestassion culturali famose, come ’l "Teatro in corte" e ’l premio "Basilica Palladiana", oltra naturalmente a le stesse zornade ìtalo-norvegesi co la festa de ’l bacalà a la visentina.
Michele Benetazzo ga lassà la fiola Cinzia, l’adorata nipotina Bianca e i fradeli Antonio, Francesco e Marilena. Ma "l’avocato" (cussì el gera conossùo da ste parte a ’l punto tale che su sto argomento solo Sandrigo fin qualche ano fà podeva paragonarse a Torin) ga lassà anca un universo de persone che gravitava ’ntorno a lu cofà satèliti, parché i ghe dava na man a organisare tute ste manifestassion e po’ anca altre che ghe vegneva in mente, senpre co l’obietivo de diféndare e valorisare la cultura e la tradission vènete.
Donca, in mancansa de l’avocato, tra quei che se tirarà pi su le màneghe, parché sia tuto a posto, ghe sarà anca el cogo Antonio Chemello, titolare de la tratoria "Da Palmerino" de Sandrigo, che xe stà el primo a inacòrzerse dramaticamente de la morte de Benetazzo la matina drio, dovendo ciapare na telefonata da l’avocato e insospeténdose par na dimenticansa che no gera serto da lu. Chemello l’è ’ndà a casa sua e lo ga trovà morto ’ntel divano. L’eventuale dimenticansa gera parecio strana parché se tratava de ’l bacalà a la visentina, el piato che ga fato deventare Sandrigo capitale ’taliana de ’l stocafisso, riceta che Chemello qualche giorno prima gaveva servìo a ’l G8 de l’agricoltura che se gera tegnùo a Cison de Valmarino, ’ntel Trevisan.
Tra le creassion poco conossùe de l’avocato ghe xe anca el svolgimento, senpre a Sandrigo, da ’l 1964 a ’l 1971 de ’l Festival de la Canzone Veneta, co la partecipassion de un fraco de cantanti conossùi e de presentadori de ’l càlibro de Corrado, Mike Bongiorno e Enzo Tortora. Dopo oto ani de laoro organisativo drio sto fèstival, có no ’l ghe la faseva pi, Benetazzo el ghe ga visto oltra e ’l ga vendùo i diriti de rapresentare sto spetàcolo a Castrocaro, che da ’l 1972 inbastisse el so Festival de la Musica Zòvane.
Insoma, Sandrigo se prepara co ’l magon a sta festa, ma la Pro Loco, dovendo tigner sù el spetàcolo e tute le altre so inissiative, ga giustamente eleto un novo presidente ’nte la figura de Fausto Fabbris, inprenditore ’ntel canpo de la moda. E pensare che, gnanca se lo sentisse, Benetazzo ga fato ’pena in tenpo el scorso 2 aprile a far aprovare el bilancio de l’associassion che ’desso, sensa de lu, ga na eredità difìssile da gestire.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Poro dialeto!
Mai el gavarìa pensà de deventare el "tormentone" estivo. Xe bastà na proposta polìtica in quel de Roma, par descadenare on putiferio che el dialeto, ogni dialeto no ’l se meritava
de Mario Klein
Salute
Giornata del medico 2009
de Mario Galdiolo
Ciàcole visentine
Le zornade ìtalo-norvegesi de Sandrigo
La manifestassion de fine setenbre, che valoriza el bacalà, se farà par la prima volta sensa el so stòrico fondatore, l’av. Benetazzo
de Giordano Dellai
|
