|
Robe de Ciósa
El Palio de le Balestre
 |
| Balestriere impegnà nel tiro. |
Penso che tanti de quei che lèze ’sta rivista conossarà el "Palio de la Marciliana", una sorta de rievocassion de la vita ne la Ciósa medioevale che se tien ogni ano la tersa doménega de zugno. Questo perché proprio in quel periodo Ciósa ze stà liberà da l’assedio de i Genovesi per òpara de i Venessiani, capitanài da Vittor Pisani, durante la storica "Guera de Ciósa" del 1380, a la fine de la quale ghe ze stà l’ingresso trionfale in sità del doge Andrea Contarini.
Durante sto "Palio de la Marciliana" se tien un altro Palio, che se ciama el "Palio de le Balestre o dei Arcadori".
L’uso de le balestre xe documentà a Ciósa da la metà del XIII secolo e el Palio de le Balestre ze stà istituìo dal governo de la sità, su l’esempio de Venessia, per mantegnire in esercissio i propri balestrieri.
Sto Palio de le Balestre se disputava dó volte l’ano, a Nadale e ne le feste de magio. La Comunità ofriva premi ai mègio tiratori: sti premi consisteva in un "balestro fulcitum croco" da tre ducati e mezo e da ’na pèssa de pano scarlato.
Ancùo i balestrieri, oviamente vestìi in costume del Trezènto, i use ’na balestra da posta o "da banco", un strumento che pesa 15 chili e che a svilupe ’na forsa de carico ne l’arco che ariva fin a 1.000 chili. La frecia, che se ciama "veréta", se punta contro el bersalio o corniolo sistemà a la distansa de 36 metri.
La balestra gera ’na tipica arma da corda, mondo usà prima de l’invension de le armi da fogo. La gera fata cossì: la gera formà da un arco de solito d’aciaio fissà trasversalmente e in sima a un fusto de legno, deto "tenière" (perché a se tegniva co la sinistra, streto sóto el brasso, "soto el scagio" se dirave in ciosòto); sul fusto ghe gera de i congegni per aplicarve le frece, i dardi o i veretoni (dardi più grossi) che se doveva tirare; altri congegni serviva per stèndare la corda de l’arco (o nervo), per fermare sta corda (’na nose in osso o in aciaio) e per farla scatare nel momento del tiro premendo la ciave o manéta: questa la gera ‘na spèssie de grileto de i fusili de adesso.
Le balestre, perfessionamento de l’antico arco, ma co un lancio pi potente e preciso, aveva diverse misure e le gera destinà a diversi usi. Quele portatili gera pi manegevoli (ciamà le "manesche"), quele da postassion pi pesanti e de pi grandi dimension (a tornio o mulinelo).
Serte balestre lanciava anche ghiande de piombo o de teracota per la cacia ai osèi. La gitata de l’arma podeva rivare fin a 150 metri.
La balestra ze stà usà a scopo de guera a partire dal IV secolo, tanto che la ze stà una de le armi pi in uso durante la storica "Guera de Ciósa" del 1379-80.
Tornando al "Palio de le Balestre", che se dìsputa ogni ano a Ciósa, bisogna dire che le so origini vien da Venessia, quando per contrastare la difusion del ziogo d’azardo, el governo de la Serenissima à deciso de organizare e favorire competission che contribuisse a rinvigorire el corpo e a "fare grupo". Al Palio de Ciósa partessipava molti balestrieri, che caricava le so balestre a la presensa del podestà. I gera divisi in quatro "squadre" corispondenti a le quatro contrade de la sità (S. Andrea, S. Giacomo, S. Maria e S. Martin de Sotomarina) e i se misurava in gare de abilità, de forsa e de resistensa, indossando diferenti costumi per poderse distìnguare.
La Compagnia Balestrieri de la Marciliana de Ciósa s’à costituìo nel 2000 e la ze stà amessa a la LITAB (Lega Italiana Tiro alla Balestra Antica) nel 2003. La ga partessipà per la prima volta ai Campionati Italiani de tiro co la Balestra, che s’à disputà a Barga in provincia de Luca el 21 setembre del 2004, conquistando la medagia d’argento ne la gara a squadre e la medagia de bronzo nel tiro individuale. Inoltre la Compagnia à conquistà l’oro, cioè el titolo de campione d’Italia a squadre nel 2004 a Iglesias (Cagliari), ancora l’oro a squadre a Terra del Sole nel 2006 e la s’à classificà tersa a Ciósa nel 2007 al XXIII campionato nassionale balestre da banco.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
On laoro qualunque...
par sbarcare el lunario
Par come xe drio ’ndare le robe, tanti òmeni e tante done i se xe catà a spasso.
Cussì ’desso va ben anca laori che prima ghe faséa schifo
de Mario Klein
Teatro e Teatri
Curiosità storiche del Teatro padovan
de Piero De Franceschi
Da Verona
La sena de pesse
de Giacinta Dall'Ora
|
