|
Da i Coli Euganei
Continui miràcoi
 |
| On tochetin de celo e, drento ogni graspo, na brancà de sole, par far on eviva a la vita. (foto G. Bellotto) |
Stavolta son portà a parlare de dolcessa parché sto ano le zìzole ga maturà na dolcessa mai sentìa e cussì anca i cogni che par fare el "vin cotto", la famosa marmeata che conossarì, i gera cossì dolsi che no servìa gnanca el sùcaro, che invesse bisogna métargheo istesso, senò no le se conserva.
No gavì gnanca na idea de quanto sia bon el nostro"vin cotto". La gera na speciaità de la mama che la ne la faséa co tanto amore, sercando de métarghe le giuste dose de mosto dolse, de cogni, pumi, e piri dal legno, ma che i fusse smissi. Par smissi se intendéa che i piri i fusse cussì fati (maturi) da deventar de on colore scuro, tanto che verzéndoi, se sentiva on smaredo (odore) pi bon del miele, che savéa parfin da fiuri de seresara. Bojendo, sto "vin cotto" el spandéa sto odore tra i fruti e el mosto, che insucarava l’aria, faséndone voja de respirarlo a boca verta, come se fa co l’aria de montagna.
Lo ghemo fato anca sto ano, sensa piri dal legno, che i xe ’ndà in estinsion, ma bon istesso, co l’odore de quei che adesso xe deventà rari, ma no inpossìbii.
I pumi ingranà anca sto ano i xe lì che i ride tacà le rame, aricordarne che xe passà nantro ano e puntuàe la natura ne regala i so fruti pieni de miele.
Pensè che anca sto ano a xe fiorìa la bronbara, che noantri ghe ciamemo anca susin. Ghe ne go parlà qualche ano fa de sta pianta che la fiorisse proprio quando che scumissia a deventar zale le foje piturà de l’autuno. La paréa na nevegada la prima volta che se ne gavemo incorto. Beh, e mi sti fiuriti picenini che conparelì sora la rama quasi nuda, me dà na contentessa, ca sento l’ànema solevarse come se la volesse sugerirme tante paròe, par farme capire el valore de ste cose picenine, ma vive, che vien su par noantri ca ghemo senpre manco tenpo de acòrsarse de sta spece de continui miràcoi che ne respira ’torno. E me vien in mente le me rime dedicà a sta fioritura. ècoe: "Malinconia / di un mattino freddo / senza voci. / Ansia di un grigior / di una nebbia / che ci ruba il sole. / Anima, non tremare / nell’angolo della siepe, / c’è la quiete, guarda! / C’è un fior di susino / sull’albero nudo. / Un fior di susino! / Non è morta, / la natura dorme, vedi? / Mi ha regalato nel sonno / un suo sogno."
E in sto momento, me acorzo che, al de là de i veri, on mare de sole se ga destirà sora le vegne, dando l’inpression che le sia tute bagnà e che ogni perla de sole, sia na giossa de aqua. Le vegne le xe quasi ormai tute despojà de i graspi. Ghe ne xe restà solo qualcun soto le foje incolorìe da i primi respiri de l’autuno, de tanti coluri. Ghe gera on gnareto l’altro dì sora na vegna, col so spagheto ligà. Pararìa inpossìbile che na creatura cussì picenina, podesse fabricarse cussì ben la so caseta, ricamàndoghe dentro le pajete, on nastrin, on spagheto o on tochetin de velo de na bonboniera: quel che ste seleghete le trova, insoma.
E mi ve digo el vero che ste robe le me incanta, pensando che se tanti altri se fermasse a vardarle ste robe che par che no le conta gnente, invesse i podarìa contentarse de pi e deventare pi otimisti e soratuto manco inmusonà. A volte, serta gente i ga tuto e no i vede gnente!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
On laoro qualunque...
par sbarcare el lunario
Par come xe drio ’ndare le robe, tanti òmeni e tante done i se xe catà a spasso.
Cussì ’desso va ben anca laori che prima ghe faséa schifo
de Mario Klein
Teatro e Teatri
Curiosità storiche del Teatro padovan
de Piero De Franceschi
Da Verona
La sena de pesse
de Giacinta Dall'Ora
|
