|
Editoriale
On laoro qualunque...
par sbarcare el lunario
Par come xe drio ’ndare le robe, tanti òmeni e tante done i se xe catà a spasso.
Cussì ’desso va ben anca laori che prima ghe faséa schifo
 |
| Uno de i laori che farà le nostre done, sarà anca questo... (foto da Vita Civile) |
La storia e l’esperienza ancora na volta le ne xe maestre: quando l’aqua la toca la parte de la schina che canbia nome... se inpara a noare.
La xe senpre stà cussì. Ve ricordèo, na volta? "Sta minestra chì, se no te la magni ’desso, te te la sbafi stasera!" E cussì la jera. "Sto laoro o te lo fè ’desso o te lo fè dopo. Entro sera el ga da èssare fato!"
Tentà dal progresso, lusingà da l’dea de na paga pi alta e on mestiero manco onto, via tuti in fàbrica, basta i laori ùmili de la tera.
Narghe drio a le bestie in stala... che ghe vaga i paroni! Portar fora ziliere de loame te i canpi? Slevare coneji, pascolare i ochi, preparare el pastume par i ànari o pa ’l mas-cio, nar rancurare la scalieda o le antece: robe de l’altro mondo, de altri tenpi. Xe mèjo magnare pezo, ma fare manco fadiga e ónzarse de manco!
Fare le càmare o el seciaro, darghe la papa al vecio, lavarghe el culeto al bocia... Par carità! Xe mèjo catarse na dona de servizio... E la dona de servizio, magari da distante, da tanto distante, co i oci a màndola o co la pèle nera la xe saltà fora. E xe stà on ben. Par tuti. Ga miliorà la nostra vita e xe saltà fora el modo par jutare de la pora zente che se catava ne la stessa nostra condizion miseranda de prima e del dopo guera: in do parole, de quando jèrimo poareti.
Ma i tenpi canbia: de le volte in mèjo, altre volte in pezo. ’Desso, rispeto a "prima", xe el tenpo del pezo. Se sfanta tanti sogni, se riduse le pretese, se se contenta de manco e, sicome bisogna sbarcare el lunario, se torna a zercare tanti laori che no se jera pi bituà a fare.
No se trata pi de nare a portare sù sachi in granaro o spanpanare pisso te i canpi, pa i òmeni; no se trata de lavare mastèi de roba o tirar sù el cànevo da i fossi, par le done. I òmeni pol tornare a fare i salariati in canpagna ma co i mezi mecànici che ghe xe oncò, e le done tornare ai laori de casa (oncò se dise "fare la colf") o a fare le "badanti", el mestiere che za faséa le nostre brave spose quando madona e messiere i tirava le lache te ’l so leto, in casa soa.
Nessun disonore e nessuna vergogna, solo che, naltra volta, sarà mèjo canbiare co prudenza, parché senpre se sa come se parte, ma mai come se riva. Anca parché no xe che dal dito al fato se risolva el problema. Zercarse on laoro "qualsiasi" ’desso, vorà dire scontrarse co la manodòpara "foresta" che laora, el pi de le volte, par na pipa de tabaco e "in nero".
Ben, co la disocupazion a le stele, al momento, contentémose che se gabia capìo che ogni laoro onesto mèrita rispeto, anca se ’l xe "on laoro qualunque".
[torna sopra]
|
