Da Isola Vicentina (VI)

So’ tornà

La Vila fata costruire da la contessa Isabella Velo tel 1827-1831.

So’ tornà so chel posto a mi tanto caro, fra chée vece mure sgresendà de na volta, có, ancor picoeto, la miseria me spintonava rento a sercar calcossa de bon, che fesse taser chel brontolar de pansa che mai paréa finire. So’ tornà da chéa strada spinà da ’ndove, rapegando come scoiàtoli, saltàvimo rento al parco de Vila Guardini pa’ mirar ’e beésse de sto regno che nantri tusi de contrà gèrimo inamorà. So’ tornà so chée piante de brunbi e àmoli che ne gustava tanto da mètersene in tel sen e po’ via de pressa, prima che rivasse Ernesto, el majordomo tuto fare, co ’l so can.
So’ tornà volentiera so sto bel paradiso proibìo, pa’ rinverdir chel’arfio de mistero che a ogni passo el parco paréa spartir insieme al nostro. So’ tornà e... quanti ricordi xe spuntà, spunciando l’ànema, contando ’n fià de storia, curioso dopo pi de sessant’ani de cossa jera restà de quel che nantri on dì se gavéa tanto "bramà".
’Lora come ’n sogno, passando soto l’arco del vecio porton de ’a Vila, on gropo de comossion ga traversà ’a gola, sùito indolsìo da ’a grassia e gentiéssa de ’e bèe tosate che, so ’n soriso de dolcessa, ne ofrìa la bona ’coliensa. El scartabèo picà via so ’a bacheca del Comune parlava ciaro: "Vien in Vila" a conóssare: vigne, òmani e cantine, so na degustassion enogastronòmica de ’a tera veneta. Funsionarà la cucina de i produti locài.

24 majo 2009. Festa enogastronomica so ’a Barchessa de Vila Guardini. (foto Maria Giovanna Fioretto)

Cossi, domènega 24 majo 2009, jèrimo in tanti torno ’e tole, davanti ’e barchesse de Vila Guardini, a gustar de i boni boconsini de formajo e prossiuto, fati slissigare so ’l palato da òtimi giossiti rafinà, a scomissiar dal Proseco, ai romàtici baricà, finendo co ’l sior ecelensa che xe l’Amarone de Valpolicela. Sentà a l’onbrìa de grandiusi morari, le ciàcoe ga raforsà le amicissie e... le storie ga ciapà el sentor de chi voléa savèrghine na pagina pi del libro.
A métare tuti d’acordo xe rivà el maestro scritor Albano Berlafa che ne ga conpagnà davanti a la Vila, disendo che, sto posto, insieme a tanti canpi lo gavéa conprà la nòbie fameja de i Conti Negri in tel XII secolo. Sto posto xe stà sircondà da alte mure e adibìo a uso contadin e come jera de moda, i se ga costruìo la casa dominicale, mentre sto tòco de tera vignéa ciamà "Brolo de soto".
La xe stà la contessa Isabella Velo e so mario el conte Scroffa, na volta estinta la fameja de i conti Negri, a conprare sto "Brolo de Soto". Isabella Velo, dona de cultura (la savéa parlare sia l’Inglese che ’l Francese, vendo rissevù na educassion signorìe da ’e suore de Parma), stufa de i saloti de sità, la gavéa pensà de ritirarse so ’a chiete canpagnola de Isola Vicentina, projetando de ’ngentilir sto Brolo co ’n grande parco co Vila. I laùri xe scumissià tel 1827 e, soto la so diression, sia ’a Vila che ’l parco jera quasi ultimà có, tel 1831, causa na bruta malatìa a soli 45 ani ’a xe vegnesta a mancare, seguìa puchi misi dopo e par el stesso male, da ’l so sposo, ’l conte Scroffa. ’Lora, de sta maraveja de ’ncanto, a xe deventà paruni Fogazzaro-Biego e po’ la fameja Guardini.

La contessa Isabella Velo-Scroffa. (da "Isola di Malo - Ricordi", de D. Lorenzo Salin)

Finìo de scoltare sto pìcolo scandajo de na longa storia, vardando co comossion chel grande sogno che Isabella gavéa solo caressà, la figura de sta dona se ga podesto ’mirare in tuta la so maestosa grandessa, so l’armonia de ’a Vila e la sintonia che ’l parco espriméa. Co ’a teneressa tel core da ’a grande vasca, na volta piena de fiuri, semo partìi drìo ’l stroso che rìsiga ’e mure, a visitare ’l parco e so’ stà colpìo có, rivà so ’l boscheto de ’e canevere, che na volta vegnéa fin lì tòrghene par fare ’l drago, chée piantine cossì fine e eleganti se jera trasformà in te na boscalia de grosse piante. La delusion pi granda la go vuda có me so’ portà so chel spiasso de i amolari e bronbari e... al posto de chée piante jera restà solo quatro scanuci, sichi, sparpanà.
’Lora, dopo ’verli sfiorà come ’n calcossa de tanto caro, el bocia che jera rento de mi se ga meso contare de chéa volta che, co i altri tusi de contrà, se gera insima sti frutari drio gustarse àmoli e brunbi e xe rivà Ernesto co ’l can. Tuti ga sercà de scapare ma ’l can co ’n salto ne rabaltava e Ernesto, co ’e so manone, ne ga fato vegnere ’e culate rosse. Pensare quanto amissi dopo se xe deventà, cossì on dì, sto fato ghe lo go ramentà.
"Ah, sior Giani, quanto me despiase" el ga seità dire, come fusse lu in colpa. Poro Ernesto, nel tenpo go capìo quanto bon fusse ’l so core. ’Nte ’l vissinarse a ’e barchesse, el vociar festoso de ’a jente, ne ga fato dar ’n’ocià distrata al vecio gazebo meso sconto fra i maciuni. Jera fin lì che nantri se onsàvimo rivare, sbrissiando rento in pressa a vardare ’l regno de i siuri che se voléa conóssare.
On saludo ai amissi e po’ de novo soto l’arco del vecio porton. Ormai ’e onbrìe de ’a sera gavéa fato ’npissare ’l ciareto a pi de calche stela.
"Na jornata da incornisare" go dito a la me sposa, ’ndando verso casa. "Proprio" la ga risposto ela. "Na domènega speciale."

[torna sopra]