|
Teatro e Teatri
Curiosità storiche del Teatro padovan
 |
| Pantalon, figura teatrale nata a Venezia intorno a la metà del ’500: la rapresenta el tipo de vecio mercante avaro e lussurioso. |
Me xe capità tra le man do artìcoi tajà fora da un giornàe, che come vedaremo più ’vanti, i xe de sicuro del 1928, indove xe riportà de le curiosità storiche del teatro padovan, che le mèrita de èssare fate conòssare.
El primo artìcolo, co’ el titolo "Un comico maniaco", el conta che inte ’l 1700, a Padova, jera famosa ’na conpagnìa filodramàtica ciamà "Accademia degli Uniti" indove, inte la parte de Pantalon, jera famoso el zóvane padovan Antonio Maria Piva, che el xe stà, po’ dopo, ciamà a Dresda, in Sassonia, dal Principe de chel tenpo.
Là el xe deventà, e el xe stà par tanti ani, un idolo del Teatro italian, interpretando prima parti de amoroso e, po’ dopo, la vecia màscara de Pantalon che lu ga senpre preferìo. Tornà in Italia inte ’l 1748, dopo ’ver ressità a Venessia inte ’l Teatro S. Luca (’desso Goldoni), el xe vegnù a Padova par métarse insieme a la Conpagnìa de Onofrio Paganini, che la ressitava inte ’l Teatro de i Obizzi (po’ dopo deventà Concordi).
Oltre a èssare un valente comico, el Piva el jera anca un bon poeta e el ga scrito diverse comedie in versi come "Il Paronzin" che xe stà vivamente aclamà.
Par so desgrassia, el se ga inamorà de ’na dona de alto rango ma no’ el xe stà bon de farghe conóssare el so amore e èssare corisposto; par ’sto motivo el xe ’ndà via un poco de testa al punto che, come ga scrito Bertoli, un storico de chel tenpo, có el vedeva de le oche el ’ndava su tute le furie, parché el dizeva che ’sti animài, che lu ciamava "moscoviti", i jera i precursori de la guera. Le jera però manìe da poco, che le ghe permeteva de ressitare istesso inte la parte de Pantalon, fazendo rìdare ’ncora de più el pùblico. El ga ressità par l’ultima volta a Padova inte ’l Carnevàe del 1763 e el xe morto inte la Quarésema de subito dopo.
El secondo articolo, co’ el titolo de "L’attore Gaetano Vestri" el conta che inte la Quarésema del 1848, inte ’l nostro Teatro Concordi ressitava la Conpagnìa dramàtica direta dal famoso artista Alamanno Morelli de Bressia, che la gaveva tra i so atori anca el bravo Gaetano Vestri.
La sera de el 17 marso, xe ’rivà a Padova Andrea Meneghini, patriota e scritore, ’pena molà fora da la prezon austriaca de Venessia, indove che el jera stà sarà co’ Niccolò Tommaseo, Daniele Manin e el padovan Guglielmo Stefani.
In chei zorni, Padova la jera in piena lota contro l’Austria, e par conpagnare a casa el Meneghini, se ga formà un gran cortèo de zente che ga traversà tuta la çità; co’ el xe ’rivà in via Vescovado, tuti xe ’ndà drento al Teatro Concordi e co’ grandi aclamassion a l’Italia i ga reso inpossìbie la rapresentassion teatrale za scominsià e i atori stessi, dal palco, ga zontà i so aplausi a quei del pùblico. La sera dopo, le dimostrassion le xe stà anca più entusiastiche, xe stà sventolà bandiere nassionài e, da i palcheti, tuti ga messo fora fassoeti tricolori.
Inte ’l palco se ga presentà l’atore Gaetano Vestri, vestìo a l’italiana e, có tuti ga fato el conpleto silensio, el ga ressità un poche de poesie patriòtiche, che xe stà aclamà co’ delirante entusiasmo.
Le autorità austriache e i uficiài presenti, ciapài da la paura, i ga fato finta de gnente e inte ’l resoconto che i ga dovudo fare al so Governo, par no’ fare ’na magra figura, i se ga inventà de dire che le poesie no le jera stà tanto aprovà dal pùblico, sensa spèndare ’na parola in mèrito ai tanti aplausi che jera stà fati, ma che i se gavarìa conportà severamente inte i confronti de el Vestri, par la so temerarietà che gavarìa merità de èssare arestà la sera istessa. Risulta però che gnanca inte i zorni dopo el Vestri sia stà perseguità.
Ciapà da inproviso entusiasmo, un atore, anca lu de la Conpagnìa Morelli, el venessian Luigi Bellotti-Bon, el ga molà el Teatro e el xe partìo co ’l batajon de i studenti universitari padovani par conbàtare contro l’Austria.
Inte ’l roverso de ’sto stesso ritajo de giornàe, che come go più sora scrito, el xe de sicuro del 1928, ghe jera un articolo più pìcolo indove jera scrito che par devoto omagio a la morte, capità in chel giorno, de Armando Diaz, "Duca della Vittoria" e "Maresciallo d’Italia", al Teatro Garibaldi, indove vegneva rapresentà l’òpara "Il matrimonio segreto", tra un ato e st’altro l’orchestra la ga sonà "La canzone del Piave", che el pùblico, tuto in pie, ga ’scoltà comosso.
La sera dopo, par istesso motivo, un altro teatro padovan, indove doveva èssare rapresentà l’òpara "Don Pasquale", el xe restà sarà.
Tre storie diverse, ma de sicuro curiose, in particolare le ultime do, che mete in risalto el spirito patriòtico de i padovani.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
On laoro qualunque...
par sbarcare el lunario
Par come xe drio ’ndare le robe, tanti òmeni e tante done i se xe catà a spasso.
Cussì ’desso va ben anca laori che prima ghe faséa schifo
de Mario Klein
Teatro e Teatri
Curiosità storiche del Teatro padovan
de Piero De Franceschi
Da Verona
La sena de pesse
de Giacinta Dall'Ora
|
