|
Da Verona
La sena de pesse
 |
| ... i 16 bancari, conpreso me marì, i ghe staséa tuti tra taolon e taolin... |
Son al marcà, in coa al banco del pesse, quando sento che i me ciama. L’è la me amiga, che con na ridada e du moti la me fa capir che la me speta al bar. Togo quel che me ocor e coro là, solo par saludarla, parché ghè ancora caldeto e go paura che me vaga de mal la spesa.
Ela, che la ga senpre na solussion par tuto, la me ciapa le sporte e la ghe le fa métar in frigo a la parona del bar. "Par no ber el cafè de strangolon" la me spiega. Po’ la me domanda: "Come mai tuto quel pesse lì?" Staolta l’è ela la curiosa.
Mi, che no son bona de tegner la gente in balansóla, ghe rispondo de boto. "Parché ghe l’ò promesso a me fradèi che i ven a sena da mi stasera e go pressia de nar a prepararlo."
Ela, sensa darme abado, la taca con una de le so solfe. "Pensa che mi sarà dies’ani che no tóco un pesse e tuta colpa de me marì."
"Marisi! ’Sa t’alo fato, dài sentemo!" salto sù mi.
Ela la soride e... la parte: "Donca, a me marì, quan che ’l laoràa ancora, gavéa ciapà el lecheto de invidar i so colaboratori a sena, almanco na ’olta a l’ano. El decidéa el giorno, el ‘menu’ de carne o pesse e el invidàa tuti i inpiegati de l’agensìa ’ndo el laoràa. Mi gavéa solo (secondo lu) da far da magnar e èssar gentile, soratuto con le done parché dopo, dedrìo al sportel, le ghe contàa tuto a tuti e perciò bisognàa far bela figura, senò adìo cariera!"
"Se vede che el gavéa considerassion de ti, come coga e come parona de casa" la interonpo mi.
"Bràa" la ritaca ela. "Te ghè inzuinà. Mi, i primi ani me godéa, ma nando avanti col tenpo e la cariera, scominsiàa a stufarme, parché le agensìe i era senpre più grosse e con senpre piassè dipendenti."
"L’è vera" salto fora de novo mi. "Quando l’era diretor ne la Bassa el gavéa na mucia de colaboratori."
"Bràa do ’olte" la me dise ela. "Ma tasi e ’scolta. Propio quando l’era lì, el gavéa a le so dipendense un bel s-ciapo de inpiegati, che, secondo la tradission, l’à invidà a casa nostra a magnar el pesse. I era in 16 con lu; zónteghe mi e me fiol e fa 18."
"Un spegasso!" la interonpo mi. "’Ndo’ i eto messi?"
"Che no me vegna in mente!" la séita ela. "Donca, atorno al taolon slongà con tre prolunghe ghe ne staséa 14; sul taolin del saloto 2 (i più magri) e fa 16. Mancàa el posto par 2 cristiani. Insoma, me strolegàa ogni note, tuta note. De giorno, incocalìa dal sòno, speràa che qualchedun el se tiresse indrìo. Quela matina lì, ’pena alsà, ò catà la solussion. Ghe l’ò telefonà al me omo, che el m’à dà la so aprovassion."
"Gheto fato cavar la pajeta ai ospiti?" ghe domando mi.
"Maché!" la ritaca ela. "ò pensà che lori, i 16 bancari conpreso me marì, i ghe staséa tuti tra taolon e taolin. Restàa fora me fiol, che l’avaréa magnà el grosso prima che i rivesse e catà sù dopo che i era né via, e mi, che saréa stà digiuna, tirando a man la scusa de i divertìcoli infiamè. Donca, i è le 8, ghè le do tole inasiè da le feste, noantri tri in ‘tenuta di gala’ sentè sul sofà: me fiol za col mal de pansa parché el s’à butà massa avanti col magnar; mi sensa mal de pansa che bison che fàa fenta de avérghelo; el diretor sodisfato parché ghè posto a tòla par tuti (lori). Sona el canpanel, el buteleto el core in bagno a gomitar, mi in cusina a inpissar el fornel, el paron de casa a vèrzar, me pressìpito de là anca mi e man man che i ven dentro i conto: manca do àgate. Le spetemo fin a le 9, quan che sona el telèfono: l’è una de lore che la dise che i ga tanponà la màchina, che no le s’à fate gnente, ma che i è al Pronto Socorso e perciò no le ven mia a séna."
"Manco mal!" salto fora mi.
"Bràa! L’è propio quel che ò sigà mi, brincando la prima carega uda che ò catà" la me dise ela.
"E parché no tóchito el pesse da 10 ani par colpa de to marì?" ghe domando mi.
"Parché, cara, tra slorda e nervoso, ò magnà come un porseleto e son stà mal tuta note. Da alora m’è nà in odio el pesse."
"E parché ghe centra el to omo?" insisto mi.
Vardàndome mal, la me sopia: "Parché, bela, secondo ti, ci elo stà che ga avùo l’idea de la sena de pesse?"
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
On laoro qualunque...
par sbarcare el lunario
Par come xe drio ’ndare le robe, tanti òmeni e tante done i se xe catà a spasso.
Cussì ’desso va ben anca laori che prima ghe faséa schifo
de Mario Klein
Teatro e Teatri
Curiosità storiche del Teatro padovan
de Piero De Franceschi
Da Verona
La sena de pesse
de Giacinta Dall'Ora
|
