|
Da Maran Lagunare (UD)
Antonio Ferrari a bordo el Lloyd Adriatico
 |
| Gerévomo ’pena entrài tel canal de Suez… |
Co in t’ primi ani Sessanta le robe le veva scuminsiò ’ndà mèjo in Italia, me pare Gino el veva fato de duto par convìnseme de sta casa, che no fussi partìo par la Somalia. Se no fussi bastài i so sforsi, in quìi zurni gera vignùi a parlà con mi anca i Mazzola, i siuri de Genova; i me veva proponùo el posto de diretor te la fàbrica t'un paese vissin Udine, Trieste, a Marano Lagunare. Varissi acetò, sol che romai el ghe vevo prometùo a me sàntolo Carlo, che tignivo conto ancora un ano le so fàbriche in Somalia. Invissi de ciapà el roplano, vevo deciso de provà fa el viaso in nave, a bordo del Loid Adriatico.
Montò a Venessia, son restò co a bordo, vevo trovò Angelo Grosso, el me capo reparto e omo de fiducia sardo. El gera vignùo savè che ciapevo la nave, e cussì el ga volesto fame conpagnìa. Gerévomo ’pena entrài tel canal de Suez, un giosso prima de rivà tel porto de Aden, vevo tacò sintì un forte mal de pansa: peningite acuta, veva dito el dotor de bordo, consiliàndome de operala indruman. Prima de sbarcame vevo ciamò Angelo, e a elo ghe vevo racomandò de porta avanti i lavuri in te le fàbriche come che gerévomo d’acordo, che ’pena operò el sarissi rivo là anca mi.
Na volta in tera, vevo fato i lavri storti, vedendo là che i me veva portò. Gera un ospedal militar, inglese, e gnanca tanto pulito. Dopo visitò el dotor el me veva dito che la gera pronta, che gera mèjo operala indruman. No gero contento, l'ospedal no 'l me deva fiducia e cussì el ghe go dito che preferivo operame in Italia, che, se par piasser el podeva dame qualcossa contro i duluri. El dotor el gera stò bravo parché dopo veme messo in guardia che ristievo na peritonite, dàe le midisine, el me veva consiliò de magnà sol verdure cote e riso in bianco. Consegnàe le carte de l'ospedàl a bordo de la M/n Africa, el zòvene medico, talian, el veva dito che la nave la veva na sala operatoria pronta par ogni eveniensa. Le parole del dotorin le me veva tranquilisò, gero rivò durmì duta la note. ’Pena svejò e fato marenda, gera ’ndò ciapà un bocòn de aria sul ponte, co me gero nacorto de la bandiera. Scuasi murivo sul colpo. La gera zala che la sventoleva, là, indelto sul penon. Me gera vignùi i sgrìssuli par duta la vita. Durante la note gera morta na zòvene e i se sospeteva che la fussi morta de vaiolo; na roba che la veva sconbussolò duti. A bordo 'mo tacò fa gara de chi che ciapeva prima l'infermerìa, fasse la puntura contro el vaiolo. De tanta paura me gero parfìn desmentegò de la peningite. Gera rivae là de corsa do caciatorpediniere militari a scortane, conpagnà la nave fora el canal de Suez; le se gera metùe una davanti e l'altra dadrìo. La nutissia che la M/n Africa la gera in quarantena la veva spasemò duti i porti, in quele bande. Dopo un per de zurni, butàe le ancore fora Venessia, scaricada la cassa con la zòvene drento, se gerévomo metùi a spetà, vive in santa rassegnassiòn na quarantena del duto fora programa. Come se no fussi bastùe ste robe me gera tornài i duluri. El pensier che vevo de tignì duro quaranta zurni el me veva butò in tera el moral. Rassegnò, l'indoman matina el gero drio strasiname verso l'infermerìa: romai vevo deciso de operame. Gero vissin la porta co go sintìo sigà; gera rivada la vose che la zòvene no la gera morta de vaiolo ma colpa la sifilide.
Vinti zurni dopo, gera ancora convalessente che gero montò in tel roplano, gero partìo par Mogadissio. Gero massa preocupò de le fàbriche; gera passò un mese, le veva scuminsiò la produssiòn sensa de mi e no vedevo l'ora esse là. Pa furtuna a Mogadissio vevo trovò indruman la concidensa. El vecio Dakota militar talian, anca se un giosso più vecio el gera là a spetame. El zòvene pilota somalo ’pena che 'l me ga cognossùo el veva verto el muso, come de sfida. Me gero metùo a ride, e po' no veva altra insielta. L'ano prima vevò provò fa el viaso a bordo la Land Rover: 1.800 chilometri in meso el gnente, core sora la sabia che me pareva el mar forsa sinque, duti quìi salti i me veva fato sta mal un mese, e po', in te le condissiòn che gero; gnaca de pensaghe a la gip. Dopo duto el Dakota lo vedevo aterà squasi ogni zorno a Habo, e no ghe gera mai capitò gnente. Gero stò na setemana a mete posto le me robe, controlà che duto ’ndissi ben prima de acetà l'invito a sena, a casa del Romeo Salenti. Dopo sena Romeo no i veva fato altro che parlà de so fio Giulio; che in Italia el se gera trovò ben, che ghe piaseva Pordenòn e che 'l veva trovò un bon lavor.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
On augurio? Vegnémose incontro!
Xe qua l’Ano Novo: tenpo de auguri, prevision e promesse.
Se vorìa védare realizà tante robe, ma soratuto la pace, l’armonia, el nare d’acordo
de Mario Klein
Cultura visentina
Italo Righi (1883-1962)
Xe passà sento ani dal debuto de sto gran tenore nato a Sandrigo e famoso in tuto el mondo
de Giordano Dellai
Da Verona
Da Stallavena…
su le péste de i briganti de la Valpantena
de Wanda Girardi Castellani
|
