|
Cultura visentina
Italo Righi (1883-1962)
Xe passà sento ani dal debuto de sto gran tenore nato a Sandrigo e famoso in tuto el mondo
 |
| El tenore Italo Righi con la mojere Emma e la fiola Aida. |
La memoria de i cultori bèrici de musica lìrica no la vive e no la xe flòrida solo de Tito Gobbi. Altri artisti del bel canto, nati prima de lu, xe partìi da un qualche canton del generoso teritorio visentin par frequentare i mèjo teatri del mondo, catando dapartuto considerassion e pache su le spale che, se no pole èssare considerà mèjo de quei tributài a l’ilustre barìtono bassanese, mèrita istesso de èssare almanco mensonài.
Par esenpio Italo Righi, mèjo conossùo come Italo Righi Briani, che ga debutà propio sento ani fà. Italo Righi, nato a Sandrigo ’ntel 1883, xe stà protagonista, ’nte i palcossènici de tuta Italia e anca a l’èstero, de prove lìriche veramente de alto profilo.
Davero la cariera de Italo Righi, che par motivi artìstici ga ciapà anca el cognome de so mama, Natalina Briani, xe stà piena sgionfa de sucessi e sodisfassion. Alievo de Vittorio Orefice a Pàdova, Righi Briani se xe presentà uficialmente su le sène lìriche el 4 genaro 1910 al Teatro Eretenio de Vicensa, riportando un grosso batiman ’nte l’interpretassion de la parte del cavaliere Des Grieux ’nte la Manon Lescaut de Puccini. Ansi, el sucesso in chel’ocasion lì xe stà cussì grando che l’inpresa che gestiva el teatro ghe ga organisà dal dito al fato par el 13 genaro che ghe xe vignù drio na serata de onore, rente a la quale, come che ’l ga scrito el cronista de “Il Giornale di Vicenza” de l’època, Righi ga ’vùo “vive e calorose approvazioni”.
’Nte la so gloriosa cariera ghe ga batùo le man i pùblici de tuta Italia, tra cui quei del Teatro Massimo de Catania, del Politeama Garibaldi de Palermo, del Petruzzelli de Bari, del Marcadante de Nàpoli, de la Pergola de Firense (1918, Ernani de Verdi, co la Russ), del Giglio de Lucca, del Politeama de Gènova, del Municipale de Piacensa, del Municipale de Reggio Emilia (da segnalare le rèssite de Otello vissin a Linda Canneti, ’nte la stajon 1924-1925), del Dal Verme de Milan, del Coccia de Novara, del Sociale de Rovigo (1919, Ernani), del Fraschini de Pavia e altri ’ncora. A l’èstero el ga cantà soratuto in Francia e in Ucraina, al teatro Solodownikoff de Kiev. El so repertorio conprendeva in particolare Otello, Gioconda, Aida, Wally, Ernani, Andrea Chenier, Tosca e Manon Lescaut.
In genere la stanpa xe senpre stà generosa verso de lu e ghe riconosseva na vosse sinpàtica ’ntel tinbro, co na parfeta ugualiansa de registro, bona anca de rivare al màssimo de l’estension tenorile co regolarità. Po’ anca, el tenore nativo de Sandrigo gaveva doti de morbidessa e sfumadure, oltra a na resistensa fìsica che ghe parmeteva de ressitare diese parti de Otello in quìndase sere sucessive.
Trovemo scrito in un tòco de giornale del 1924: “I successi di ottimo cantante sono dovuti alle sue creazioni stupende di arte, di bellezza e di pura verità. L’ammirazione per questo artista è fortissima, e grandissima fra il pubblico, forse perché la bravura dell’artista stesso si fa sempre più grande e sempre più perfetta, certo che il pubblico lo ascolta volentieri, per comprendere meglio le bellezze della sua voce e valutare al giusto valore tutti i pregi di Righi Briani. Ininterrottamente, per tanti anni di carriera egli ha servito le imprese come richiamo sicuro ed infallibile. I risultati di questo ottimo artista è certo che saranno sempre più importanti perché egli vale veramente.”
Dopo ’vere abandonà i teatri, Italo Righi Briani xe morto ’ntel 1962 rente a la Casa de Riposo “Giuseppe Verdi” de Milan.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
On augurio? Vegnémose incontro!
Xe qua l’Ano Novo: tenpo de auguri, prevision e promesse.
Se vorìa védare realizà tante robe, ma soratuto la pace, l’armonia, el nare d’acordo
de Mario Klein
Cultura visentina
Italo Righi (1883-1962)
Xe passà sento ani dal debuto de sto gran tenore nato a Sandrigo e famoso in tuto el mondo
de Giordano Dellai
Da Verona
Da Stallavena…
su le péste de i briganti de la Valpantena
de Wanda Girardi Castellani
|
