Da Verona

Da Stallavena…
su le péste de i briganti de la Valpantena

El sentier che porta a le grote.

El disissete de otobre 2009, a Stallavena de Grezzana (VR), i à inaugurà el sentiér turistico che da via Segai el porta i visitadori a la scoperta de interessantissime testimonianse su la presensa de i briganti ne la Valpantena. Qua se pol ancora védar i ruderi del castel fabricà nel Xll secolo da la fameja Turrisendi e deventà, intorno al 1600, el rifugio de Francesco Falasco, un pìcolo possidente del posto, entrà a servissio de la fameja Cozza.
A quei tempi sucedeva spesso che i nobili con diriti feudali i mantegnesse “al soldo” òmeni ciamadi “bravi” o “buli” pronti a far, al so comando, tute le pèso porcade.
Francesco Falasco, però, no’ l’è miga da confóndar con Paolo Bianchi de Bregantin, deto “Falasco” in memoria de le legende del lógo. ’Sto qua l’èra un fior de farabuto, un brigante da prima fila, ’n autentico assassin. I conta che co’ la so banda par ani el ghe n’à fate de cote e de crue… l’èra, insoma, el teror de la Valpantena andove, sconto de drio ’na qualche macia l’assaltava con pugnài e archibugi i pori viandanti, rapinàndoli o sequestràndoli quando no ’l ghe faseva la pèle su comission de qualche don Rodrigo e nominémoghene du: i Conti Giusti de Santa Maria in Stele e i Conti Alegri de Gressana.
Verso la fine del XVll secolo, diverse bande armade fin ai denti le operava a far, su ordinassion, vendete personali. La tradission popolare la conta che a tegner i contati tra le fameje nobili e la banda Falasco, l’èra un çerto Piélongo, cantastorie nano che l’èra sempre pronto a darghe el so aiuto, tanto a ci ordinava quanto a ci eseguiva.

Veduta da distante de le grote de Falasco.

Ne le longhe sere d’inverno, ne i filò che ancora se srodolava al calor de le stale, fin a la metà del secolo scorso, i veci de la Val i contava la triste storia de l’Anzolina Lonardi e i giurava che l’è stà proprio co’ l’aiuto de Falasco che el conte Provolo de la fameja Giusti de Santa Maria in Stele (un giovinoto da la fama pitosto bruta) l’à organisà el rapimento de la butela. La Anzolina l’èra fiola de un comerciante de formajo che ’l s’avéa trasferì ne la çità scaligera dal Friuli... A la fameja Lonardi, colpì da la “peste manzoniana” che de i 53.533 abitanti che i risultava dal censimento de Verona del 1627 la ghe n’aveva lassà al mondo solo 20.630, gh’èra restà viva quel’unica fiola, de conseguensa unica erede de tuti i beni de casa. Tra i tanti pretendenti interessadi, più che a la fiola, a la dota, a domandarla in sposa ga provado anca el conte Provolo, ma la nostra Anzolina l’èra inamorada e promessa al marchese Sagramoso. El conte Provolo alora el s’à consilià con el nano che ’l l’à fato incontrar, par idear un piano, con el brigante Falasco e la so banda nel segreto del rifugio tra le roce. Cusì qualche giorno dopo Falasco co’ i so “bravi” el ga dà l’assalto a la casa de i Lonardi in quel de Poian e l’à rapì la butela, scapando po’ verso Ferrara, el più distante possibile da la Serenissima. L’intento del conte l’èra de sposar l’Anzolina a la sconta, metendo so pare davanti a le robe oramai fate sensa più rimedio.
El marchese Sagramoso, ’pena che l’à savù quel che era sucesso, l’à scominçià a indagàr meténdose su le péste de la banda. Par so conto,el pare de la rapida, el s’a rivolto a Venessia, domandando giustissia al “Consiglio de i Diese”. Anca “Pielongo”, pentido el s’a messo in çerca de la Lonardi e andando a parlar con el Cardinal Legato, che governava Ferrara, l’è riussido a scoprir la so segreta preson e a liberarla.

I segni de i restauri su i muri in parte rifati. (foto Mirco Castellani)

Intanto i “Bandidori” de la Serenissima i à arestado el conte Provolo che, in seguito, l’è sta decapitado in Piassa San Marco dopo che i gavéa demolido “secondo l’uso dei tempi” el castel avito a Santa Maria in Stele. El Falasco inveçe, caturado, l’è stà impicà soto le mure de Verona.
Fin a pochi ani fà l’era possibile visitar le grote de Falasco, rampegàndose longo un sentier pien de piante de “spinarati”, rente a ’na cascadela “cantarina” che vien zo a ropetoni dal monte Dardera. Ne l’ombra ’na romantica ceseta la invita a la preghiera. No l’era longa sta via e el sentier tuto d’un trato, versèndose a la luce, el mostrava la tóre che traverso la scaleta la portava a le grote dove Falasco l’usava segregar le so vìtime.
Soto a le feste de Nadal su par quel sentier andàvimo a catar sù oltre al “spinarati” el mus-cio par el Presepio.

Come disévimo, el 17 otobre dopo l’inaugurasion e i discorsi de rito, autorità e ospiti i s’a inviadi a piè su par el sentier proteto da 400 metri de balaustra de legno, sistemada per la sicuressa del visitador. Par sta “opera” à contribuido el BIM Adige co’ un contributo de 40.000 Euro. S’à realisado così el progeto de restauro direto da Moreno Dalle Pezze, scominçiado nel 2002, che l’à comportado, la sitemassion de la Tore, a la qual però i à serado l’ingresso, e de i muri che i é stadi anca in parte rifati. Anca se no ’l g’a più l’aspeto “rustego” de prima, el novo sentier l’è de sicuro più comodo e anca panoramico. Andando su par la la salita se pol vardar verso el fondo de la vale, cuerta de case, fàbriche e marmifici, pensando a quel tempo ormai così distante quando ghera solo àlberi e campi, e su le strade piene de sassi, i viandanti a piè o co’ i careti i se afretava al sóno del “vespro” del campanil distante par no catarse a l’aperto sul far de la sera, co ’l ris-cio de incontrar el “teribile Falasco”.

Autorità e ospiti ai piè de la Tore.

Nei articoli de l’otobre 1989 e novembre 2002 su Q.C emo parlà de la bela Anzolina che da oltre 400 anni, involtolà de veli bianchi, la dorme ne la cesa de santa Eufemia soto l’altar del Cristo. Ne la cesolina de l’Alarol a Poian (ciamà el Santuario dei ciclisti) un “ex voto”, po’, el ricorda el rapimento e el ritrovamento.
Le storie ligade ai briganti che a quei tenpi i terorisava la Valpantena, i è stade contade, cantade e scrite come à fato par esempio, l’Abate Pietro Caliari co’ la so “Angiolina” ristanpà nel 1988 e “La vera storia di Angela Lonardi” de Tiziana Marchiori Scarabello (Verona, 1977). L’ultima publicassion l’è stà un fumeto intitolà “La Valpantena ai tempi del brigante Falasco”, autor Aldo Signorini.
Par la vìsita a le grote de Falasco telefonar al Comune de Grezzana, al n. 045 8872513.

[torna sopra]