Da la Bassa Veronese

Cai de aqua a Minerbe

I do autori del libro “Cai de aqua a Minerbe”: Luciana Gatti e Luigi Zuccari.

Bela l’idea de fare na racolta de liriche e ilustrarle, fasendo na spece de censimento de i fossi e de i corsi de aqua del teritorio. E da l’idea è vegnù fora on libro: Cai de aqua a Minerbe, lavoro che à messo insieme l’ispirazion de LUCIANA GATTI co la passion per la fotografìa del marì, LUIGI ZUCCARI. Cussì è vegnù fora on pìcolo capolavoro de frescheza “verbale e ilustrativa”, nata nel mese de agosto 2009, e batezà el 10, giorno de San Lorenzo de la gradela e del pascoliano “pianto di stelle”.
Nel libro oltre ai versi ghè de le imàgini splendide, da la copertina e fin in fondo; se trata de on laoro ben curà, fato co na passion granda assè e tanta, tanta conpetenza.
Ma lassemo parlare, sta volta, l’artista de la fotografìa, che l’à savù tirar fora par tuta la comunità de Minerbe, ne la Bassa Veronese, on servizio straordinario de foto, grazie anca al contributo de Pasquale Fante, presidente del locale Fotocineclub.

– Luigi Zuccari, come ghè vegnù l’idea de sto libro...
“M’è capità de far na ricerca a l’Archivio de Stato de Venezia, ’ndò che ò catà documenti del ’600 e fra questi on vecio toponimo del Minerbe; qua so’ vegnù a savere de on tristo fato, finìo in te on delito capità propio a Minerbe. Cussì, d’acordo con me mojer Luciana (ela la scrivarà on raconto in propòsito) son ’ndà in ricognizion de sti loghi, par documentarme piassè.”

Cao de aqua e ponte al Colonbaron…

– Fotografo e interprete de la natura no se se inprovisa: che lavoro alo fato ne la so vita?
“Son senpre stà incantà, fin da buteleto, davanti al spetàcolo de la belezza de la natura; me perdéa’ia a guardare la maraveja de i fiori, le bestie, l’aqua, i retài de luce. Tuta roba che noantri, stando in canpagna, ghemo senpre avù a disposizion. Valori grandi assè che, el pi de le olte, no ghe dàvene gnanca l’inportanza che i mèrita. Tuta sta passion la m’à orientà a laorar ne l’agricoltura. Son deventà perito agrario e dopo me son dedicà, par vintizinque ani, a la fruticoltura, a l’orticoltura, a la zootenìa in te na granda azienda pilota del Veronese, de proprietà de le contesse Bevilacqua.”
– Belo el termine dialetale “cai”. Quanti ghe n’è a Minerbe?
“Sì, da le nostre parte i fossi i é ciamemo propio cussì; me par che la parola ‘cao’ la voja significar calcossa de inportante che ga na partenza e on arivo, come in efeti ga on corso de aqua. Me son senpre preocupà in modo meticoloso de la cura de i fossi par on ‘efficiente’ scolo de le aque e par l’irigazion de la tera; ò fato tuto questo par otegner da la nostra tera de i fruti boni. Na tera avantagià da tante iniziative, portè ’vanti da vece fameje nobili presenti nel teritorio, ma soratuto grazie al laoro e al sacrificio a colpi de baile de i nostri pari. Lori i à savù creare na grande rete de ‘dugali’, scoli e fossi, come vien ben evidenzià ne la mapa riportà nel libro: ‘cai azzurri che hanno visto gli spruzzi dei miei tuffi di ragazzo; cai per i bucati di mia madre…”
– L’è propio belo e rinfrescante parlare de aqua, spece d’istà. Savemo purtropo che in tanti Paesi, in Kenya, par esenpio, dove ghè ’ndà de recente don Bruno Zuccari, cusin suo, se no sbalio, a catare el missionario del posto, l’è du ani che no piove. Secondo lu, che sti “cai” che lu l’à visto, èi curà, rispetà, valorizà bastanza qua da noantri?
“Beh! Ne la me esperienza de laoro ò rilevà situazion de inquinamento a un punto tale da conprométare zerte colture. ’Desso me pare che staga ciapando pié pi sensibilità par salvaguardar el ben vitale de l’aqua; ’desso se se rende conto de pi del gran valore de l’aqua, soratuto quando la manca. Davanti a situazion de emergenza, col grave problema de la fame e de la sé, come quela riscontrà da don Bruno, penso con rabia ai nostri sprechi, in fato de aqua.”
– Certo che la gioventù de ’desso, no la ga ocasion de fermarse a vardare i fossi, quando inveze na volta i servéa anca par catar sù el magnare...
“Sì, me ricordo có se ’ndava co me papà, a pié descalzi, a pescare con la negossa. Era na sodisfazion granda védar sguizar ne la ‘cora’ luzzi e tenche. Se po’ penso a chele fritajete inprovisè par na zena con i ganbareti rossi…”
– Me par de capire che insieme a l’aqua ne le so foto l’à messo ben in vista anca i coarèi veci de i ponti... Ghè on motivo?
“Dove ghè i fossi, ghe anca de i bei pontesèi ‘particolarmente suggestivi’. Spece quei veci fati con quarèi e piere. I ne ricorda on passato glorioso e operoso e anca na maestrìa oramai persa, ’ndó che à ciapà posto i manufati de cemento, a scàpito de n’armonia architetònica persa col cemento.”
– Quante imagini alo scatà fin ’desso, e quanto tenpo ghè costà par ciapar el momento pi belo?
“Penso che ogni momento el gabia le so onbre e le sue luci da sotoliniare. Mi e la Luciana emo senpre zercà de interpretare tuti i bei momenti che ne se parava davanti a l’inproviso.”
– El me parla de tute le emozion che l’à proà a far sta òpera a quatro man co so mojer...
“Le emozion i è stà veramente tante. Ò rivissù momenti bei, spensierè e fantasiosi de la giovinezza, co el piacere de condivìderli con la persona che amo e che dimostra na gran sensibilità. Sensibilità che emo manifestà, mi co la fotografìa, e me mojer co la so pena poètica, in perfeta conplicità.”
– A propòsito de le so imàgini ne l’anbiente de la natura, che consilio ghe dalo ai letori de Quatro Ciàcoe?
“Uno soltanto: de vardare co amore tute le maraveje che Dio n’à messo a disposizion par condivìdarle con ci ne viaja vizin.”
– Al momento de congedarse da sta incontro, caro Luigi Zuccari, ghe femo tanti conplimenti pi che meritè, in atesa de védar ancora calche altro so capolavoro fotografico.

[torna sopra]