|
Da Isola Vicentina (VI)
El sogno d’amore de Marco e Rosina
 |
| Monumento a l’Emigrante, nel piassale de la vecia stassion de Asiago, dove on dì se fermava la “Vaca Mora”. (foto de Maria Giovanna De Franceschi) |
’Nte le longhe sere d’istà, prima che le onbrìe coersesse el ciaror de ’a corte de i Boaroti, paron Checo, sentà in cao la corte, el se godéa gustar chea dolse vision che la verta canpagna, colma de ogni ben de Dio, ofrìa ai so oci ’passionà.
El jera orgolioso de sto posto paron Checo: on dì, ancora zovaneto, jutando popà e mama, i gavéa svegrà on bel tòco de monte, tirando fora on po’ de boni canpiti che ’desso ghe daséa chel tanto da poder vìvare insieme a la so Irene e so fiolo Marco de quatro ani. Le dificoltà xe vegneste fora có, drioman a Marco, xe rivà altri du fradeìti e anca na soreéta... Paréa che ste bochete no le fusse mai strache de mastegar calcossa de bon. Cossita, có Marco ga vudo l’età justa, insieme a altri zóvani del paese, co la valisa de carton fra ’e man el xe partìo par na tera foresta, so na miniera a cavar carbon. I primi misi xe stà tremindi, là zo in fondo, soto tera, co ansia, fadiga e tanta paura che daséa on malèssare da far mancare ’l fià. Ma on dì xe rivà Toni e... la vita se ga incolorìo parfin de rosa.
Toni, visentin anca lu, el gera on mataran pien de schersi che ’l faséa deventar piasévoe la vita a chi ghe vivéa tacà.
A sera, siben strachi, i se sentava ai pìe del leto, cantussando vece melodìe d’amore e pin pian tuta ’a camerata se inmuciava ’torno a far da coro, fasendo tornare chéa spensieratessa che on dì i arfiava ’nte ’l so paese.
Tri ani xe passà so chea magica amicissia che senpre pi faséa crèssare boni sentiminti, po’ ’n dì, no resistendo pi a la forte nostalgia de i sui de casa e... de la Rosina, el ga ciapà el treno che lo ga portà de novo in Italia.
Có ’l xe rivà in fameja, no i finìa pi de farghe festa, in special modo so mama la seitava caressarlo come na volta da toseto có ’l se sentava so ’a so gaja.
Quanto dolse xe stà, chea note, dormir so ’a so vecia camareta e sognar la so Rosina, pensando a chel’ùltima sera de tri ani prima có ’l ghe ga dito che ’l sarìa partìo: el ga sentìo ’e so man tremar e po’ scapar via, sensa gnanca el saludo de ’n “ciao”.
La matina dopo jera domènega e Marco ga pensà de nar Messa, pa’ ringrassiar la Madona de èssar tornà da i so cari.
Dopo ’ver scoltà Messa, el xe ’ndà verso l’altare par n’orassion a la Vergine Maria e i so oci ga incrosà quéi de ela. Quanto ’a se jera fata granda ’a Rosina, e che bela ’a jera deventà. ’Lora ela se ga ’vissinà ’n po’ tìmida, sussurando: “Marco, caro Marco, te si tornà.” For da ’a ceseta, i se ga abrassà, sentendo el core scopiare da n’emossion cossì granda e ciapàndose par man i se ga promesso che no i se gavarìa pi lassà.
Ai sui de casa, el ghe ga confidà el sogno che ’l gaveva rento, far na caseta par lu e Rosina so ’a corte ’ndove on dì el zugava far la rosta co ’l paltan.
Sinque ani de fadighe e de on driovanti fra la miniera e tornar casa, par star drìo ai lauri de sto gnareto e, finalmente, el sogno se ga realisà.
La matina del sposalissio, Marco e so mama jera drìo far du masseti de fiuri, uno par la Madona e uno par la sposa, có xe rivà l’amico Toni, che se jera prestà a far da conpare de anelo e la sorpresa xe stà cossì granda che a Marco ghe xe rigolà zo du lagrimuni da i oci. Difati conpar Toni jera rivà insima on sarè, co ’a scuria in man, tirà da na pulierina mora.
So ’n passa parola de quéi che tegnéa informà, tuto el paese se ga riunìo drìo ’a strada cossì, có xe passà i spusi, ghe xe stà on diluvio de batiman de auguri e on sigar “Viva i spusi”, da far comóvare anca i sassi.
La felissità de i du colunbi xe rivà ’l colmo có, dopo Messa, Toni ga cantà parfin l’Ave Maria de Schubert.
Chel dì, in corte de paron Checo, dopo ’n matrimonio altolocà, no se ga badà a spese, fasendo servire on pranso da veri “Bacani”
Come in tute le fàvoe che se veste po’ da legenda, anca in quéa de sti du bei spositi a xe mancà solo che Marco fusse stà ’l Prinsipe Azuro, rivà in gropa a on bianco cavalo e ’l se fusse inamorà de ’a pi bela montanara de on paese lontan... Digo, mancava solo sta roba parché ’l resto, l’amor pi grando del mondo, che fa siòra la vita, i lo gavéa: bei i gera bei e la caseta no ghe mancava. Zonteghe i tri angioliti vegnù drioman dal celo, che i gera uno pi belo de chealtro, cossa vulìo de pi?
Purtropo la miniera ga desfà, tuto de on colpo, el pi bel sogno de Marco e Rosina. Difati on bruto dì Toni xe restà soto i rovinassi che ’l gas gavéa fato scopiar e Marco, coresto par salvarlo, i lo ga tirà fora ormai rovinà.
Chi che ga visto Marco gironsolare tacà casa co ’a so Rosina senpre vissin, el conta che... el vegnéa ’vanti pianèo, tacà a le prìe de ’a masiera e ogni tri passi el se fermava, spetando e sperando che ghe rivasse ’l fià.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Semo tuti piassè poareti
Tra crisi econòmica, conti in rosso, manovre coretive, finanziarie e taji a le spese, bufere polìtiche, inchieste e processi a furbeti, ladri e disonesti… có riva sera semo tuti piassè poareti
de Mario Klein
La nostra gente
Daniela Perdonà Guerra
Maestra par 40 ani in t’on paese dove se parla ancora dialeto
de Lucia Beltrame Menini
|
