|
Mondo disonesto
Leo Maran
bidonaro sensa sgrùpoli
 |
| Sfrutando na licensa de vendita ricanbi auto el ga verto la “Vedo-Tutauto” t’on capanon a Arin… |
– Barba, no sò co’ che muso dìrtelo. Scùsame seto, ma quel saputon de Leonardo che ogni tanto ghe scapusso incoste, ogni volta che lo vedo el me domanda de ti e po’ co’ n’anda smalissià da tore pa ’l sésto el ghe zonta: “Me racomando, salùdame to paregno.” E questo m’infastidisse parché no me sento par gnente un fiolo bastardo. Co la so pulegana da lengoa destacà go l’inpression o che ghe piasa filosofare credéndose ’n altro autore de la Gioconda o che’ l voja p?nzarne tuti do. Me piasarìa propio savere come mai el vien fora co sta stranbarìa, pur savendo puìto che ti te si me sàntolo. Me ricordo ben che a la me festa de crésema el gera stà invità anche lu. Go ’ncora l’arlojeto che par l’ocasion el m’à regalà, sto spacon, forse par farse védare da la morosa che ’l gera uno de mànega larga.
– Eh sì, caro Lalo, lo sò ben mi, parcossa Leo Maran el continua menarla ’torno inviperìo pien de astio ne i me confrunti. No ’l vedarìa l’ora de tacarla parché so’ stà propio mi che, dopo quatro ani de smorosaminti inconcludenti, lo ga fato piantare da me zermana Veronica, essendo vegnù a saere che ’l gera on poco de bon. El gavéa messo piè in casa nostra, tuto tirà a coa de finco, dando da intèndare che ’l faséa el comerciante de pelami da scarpe e che ’l servìa tuti i calegari de la Riviera del Brenta. Forsi gera vero e mi credo anca che te i ani boni el gai guadagnà puìto, ma sto can da l’ospia el gavéa le man sbuse. Ghe piaséa massa fare la bela vita. El paréa uno de i vedeloni de la conbrìcola fata sù da Fellini nel so film “La dolce vita”.
Da morosi ancora al scuro par la fameja, sto inbroion el vegnéa tore me zermana in Maserati de colore griso arzento, in chei ani là, quando de ’tomobilone cussì grosse se ne vedéa passare una ogni morte de papa. El gera on marajon, mi te ’l dirò! Pènsate che, ’véndose fato protestare pi da calche canbialeta, le banche ghe gavéa sarà le porte in facia. Lu, cascà in desgrassia, ga ’bù la spudoratessa de dare da intèndare a noaltri de fameja che ’ncora lo credévimo on galantomo, che ’l gavéa sarà botega sentendo a naso ca gera drio rivare la prima crisi de la scarpa. Alora gèrimo te i ani ’60 e, co le robe girava pa ’l verso drito, ciavando pi de calche fornidore, el ga cronpà na bela vileta vissin a la so atività, intestàndola a on prestanome, come ca fa i mafiosi al dì d’oncò. Credo anca che ’l se gai messo via calche francheto robà a cajo e senpronio, ma no ’l discoréa mai de maridarse. Sicome el gera ’n artista da slanbroci e a la morosa el ghe faséa senpre védare roma e toma, lu ga canbià lavoro in do e do quatro. Par via de i so protesti no ’l ga pi possùo inviare ’n’altra atività a nome suo. Alora cossa s’alo inventà? Sfrutando na licensa de vendita ricanbi auto al minuto e a l’ingrosso, intestà a so fradelo Mario che ’l gavéa on negossieto in piassa al Dolo, el ga verto la “Vedo-Tutauto” t’on capanon a Arin, tacà casa, gnonde el s’à messo a comerciare a l’ingrosso, co la firma del fradelo che gavéa del suo guadagnà onestamente, tuti i tipi de veri e cristài par ogni marca de automobili in circolassion, italiana o foresta che la fusse. La roba da vèndare el se la faséa rivare da la Finlandia, inpengnàndose a pagare a 90 giorni da la consegna, senpre co la garanzia de Mario. Le prime fornidure ga filà via lisse e lu ga inpiantà na giostra de milioni che faséa girare i cristài fin zo in Meridion. Par gòdare pi stima e fiducia da i finlandesi el ga oferto na visita a le vetrerie de Tampere in Lapponia, a tre diretori de banca che curava i so intaressi de inportassion dal paese nordico. El viajo ghe gavéa consentìo de radopiare i tenpi de pagamento de le fature ai verari foresti, da 90 a 180 giorni, on lasco de tenpo che a Leo ghe ga jutà a sgrandare el giro, ciapando in torta puìto le banche ca ghe gavéa credùo. Intanto al salon de l’auto de Torin, el ga conossùo na bela tracagnota stendista argentina, neoda de veneti emigrài a Buenos Aires ne la prima metà del secolo passà. Fenìa la fiera, tondàndola co le so moine, el la ga convinta a restare in Italia. El se la ga menà in vila a Arin, ofréndoghe scànpoli de vita mondana da farghe pèrdare la testa. Tanto xe vero che la biondona sudamericana ga da ’verse inamorà, prova ghe ne sia che i se ga cubià, però sensa regolare le carte in munissipio, e in tel giro de misi ca ghe vole par muciare on putelo, xe nata Angela, on fiore de putina ca ghe somejava tuta a so pare. Ciò el marajon gera anca on bel tòco de omo.
– E la Veronica che fine gala fato che no la go più vista?
– Dopo che drio le me prèdiche la ga roto i raporti co ’l furbastro, par no èssare so la boca de la jente, a la muta e a la sorda, la s’à maridà co Francesco, on bravo cogo polesan che ’pena sposà el xe emigrà a Orlando in Florida (USA), dove lu e so mojere i se ga verto on ristorante e pare che i gabia fato fortuna. Cussì mi go perso le traze de tuti do e me despiase assè.
– Barba, fenìssime la storia de Leo. Go capìo che te si in rota con lu e te sbrusa mensionarlo, ma c?ntame come la xe ’ndà a fenire sta finistroca.
– Ben, el laoro novo ghe naséa a gonfie vele. El gera rivà a muciare na quindesena de dipendenti e métare in pista siè camion che rivava co’ i so cristài a servire negossianti fin zo in ponta e taco del nostro stivale. Siché, tegnendo in sospeso par siè mesi i pagaminti de i veri finlandesi, el ga possùo métarse da na parte e inboscare sentanari de milioni. Credo che la picenina no gavesse gnancora tri ani quando go sentìo che ’l gavéa fato el s-cioco. Par feragosto, quando tuto el personale gera in ferie, el ga svodà el magazin, vendùo scafài, camion e mobili de l’uficio e sarà tuto ben inlochetà. Intanto lu, la biondona e la pìcola xe partìi par l’Argentina, sicuramente co na valisa de schei e chi s’à visto s’à visto. No te cunto el putiferio ca xe nato a fine mese c? xe tornà a lavorare i dipendenti che ga catà tuto sarà. Le ose se ga spanto subito rivando in recia ai diretori de le banche restàe co le fassine desquerte. Ga fato seguito denunce e sora denunce, ma l’omo gavéa tirà el so bidon, metendo a la carità soratuto el fradelo che gavéa garantìo tuto el movimento comerciale. Sicome el diavolo fa le pignate ma sensa i querci, al bidonaro furo cofà on fuìn, dopo calche ano de bela vita, ghe ga fato gola fare on scapon in Italia co passaporto falso, forse par rancurarse ancora calche frégola bandonà al vento qua par volta. L’ultima ingordisia no ghe xe ’ndà drita. I lo ga becà e cassà al fresco dove el se ga fato pi de vint’ani de galera.
– E a sto deficente ghe vansarìa ancora de pissegarte parché te ghe ga fato troncare el so tira mola inbastìo co la Veronica. Te ga fato ben, barba!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Semo tuti piassè poareti
Tra crisi econòmica, conti in rosso, manovre coretive, finanziarie e taji a le spese, bufere polìtiche, inchieste e processi a furbeti, ladri e disonesti… có riva sera semo tuti piassè poareti
de Mario Klein
La nostra gente
Daniela Perdonà Guerra
Maestra par 40 ani in t’on paese dove se parla ancora dialeto
de Lucia Beltrame Menini
|
