|
Editoriale
Semo tuti piassè poareti
Tra crisi econòmica, conti in rosso, manovre coretive, finanziarie e taji a le spese, bufere polìtiche, inchieste e processi a furbeti, ladri e disonesti… có riva sera semo tuti piassè poareti
 |
| Altre persone, par no morire de fame, le zerca tra i rifiuti… |
In sto clima de tortura estiva, sarà stà colpa del sole che ne brusava i zarvèi, sarà stà par le notizie che ’ncora ne piove ’dosso come colpi de manara so la zoca, fato sta che se semo resi conto che … i conti no quadra: ghemo perso calcossa de inportante.
Intanto semo deventà pi poareti de schei: ne lo conferma i dati Istat che ne dise che in Italia a ghe xe 2 milioni e 657 mila fameje che vive col minimo indispensàbile; ghe xe persone che canpa col solo aiuto de le associazion caritative locali e altre che ghe toca umiliarse a slongare la man drio on marciapiè, sperando nel bon core de la gente.
Disemo però che, se lassemo stare i nùmari, ste situazion le ghe jera anca na volta: mi me ricordo che, pi de sessant’ani fà, me mama me mandava a portarghe na sporta de roba da magnare a na fameja de miserandi, co na sgnarà de fiòi che naséa via piè partera anca in pieno inverno, co on fogo che brusava fassine de cane e, taca a la cadena, na pegnata che bojéa senpre quel che drento no ghe jera. A me ricordo che anca noantri a jèrimo poareti: me popà, mediatore da canpi, jera sior de parola e basta, el n’à fato vìvare da poareti e, có ’l xe morto el n’à lassà na granda eredità: l’onestà. De quela semo senpre stà siori e la ne ga senpre giovà.
Eco, proprio de questa e de tanti altri valori che ghe someja, sentimo oncò la macanza. Coruzion, concussion, peculato, guadagni illeciti, associazione a delinquere, abusi d’uficio, mafia, camora, ’ndrangheta: tuti fenòmeni de la socetà del nostro tenpo, che, oltre a farne vergognare pa ’l disonore, i ne squalìfica moralmente e civilmente.
Metemo pure che, da che mondo xe mondo, ste robe le sia senpre esistìe, ma la pi parte le restava ne l’onbra e, quasi quasi, le faséa manco dano. ’Desso, inveze, che ste malefate le vien a gala, ’desso che le vien scoperte, a se sentimo ’ncora de pi disgustà e se sentimo in braghe de tela.
Semo dunque deventà pi poareti de schei e de onestà, ma anca pi poareti de fede. E no stemo dire che a se semo spoetizà e ghe credemo de manco, a causa de le denunce de abusi da parte de na categorìa de persone che credévino vacinà contro la pedofilia. Dire che ghemo perso la fede a causa de sti scàndali, no la xe na bona scusa: la fede xe deventà on optional, la fa senpre manco parte de la normalità umana.
Colpa de la fameja, colpa de la Cesa, colpa de on progresso che core come on fiume in piena e no tien pi conto de i àrzari, semo catà anca noantri a nar via de corsa, lassando indrìo tuto quelo che ne paréa èssarne de peso e de freno: senza Comandamenti, senza règole de religion se core pi forte.
De fato, oncò par stare al passo e no farse superare, se fa tuto piassè in pressia, a se se scana a córare de pi par laorare, par guadagnare, par vìvare, par divertirse e, de le volte, par morire. Se al contrario, qualche volta, a fùssimo boni de vardarse intorno e magari indrìo, a se inacorzaréssimo che ghemo perso par strada chel tanto – soratuto onestà, moralità e fede – che ne ga fato piassè poareti.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Semo tuti piassè poareti
Tra crisi econòmica, conti in rosso, manovre coretive, finanziarie e taji a le spese, bufere polìtiche, inchieste e processi a furbeti, ladri e disonesti… có riva sera semo tuti piassè poareti
de Mario Klein
La nostra gente
Daniela Perdonà Guerra
Maestra par 40 ani in t’on paese dove se parla ancora dialeto
de Lucia Beltrame Menini
|
