|
Da Adria (RO)
Le anguriare
Int’un fià par l’altro è conparse da i frutaròi le angurie: quele lunghe e grosse da na diesina de chili in sù, quele tonde, più picolote, da quatro sinque chili e parfin quele pìcole tonde scure ch’le par de le bale de goma da fiòi; insuma tute! Vol dire ch’è rivà l’istà. Sto ano l’è ’n ano balordo: ora te te miti in canotiera, un dì dopo te toca intabararte co camisa, majon e magari giubetelo inpermeabile, quelo ch’a te dòpari, magari, in montagna, d’istà, có te va a far qualche caminà e un strasso in più int’el zàino no ’l ghe sta mai male. Ma, a quanto pare, le angurie sti stranbessi de stajon no i li conosse e cussì i è rivà puntuali, ansi, forse, na s-cianta in anticipo, o almanco cussì m’è parso. E ’lora m’è vegnù in mente le anguriare de ani fà.
Gh’in jera anca in centro, ma la più parte le se catava in campagna, ansi, per èssere pignòi, lungo le strade de campagna, inte quele fora da i centri, se non adiritura lungo le caresà, magari arente a un fosso de aqua corentiva, indove se podeva tegner in fresca qualche anguria, pronta par èsser magnà in prestessa. Qualche cason se pol ancora catarlo, un riparo fato sù a la bona, tanto par no ciapar la piova e no brusarse i corni al sole de Lujo e Agosto. Ma è ’ndà perso le caraterìstiche che faseva de l’anguriara un logo particolare. ’Desso insieme a le angurie te cati i melun, le melansane, i pevarun, i pèrseghi, le brogne, i armelin, le siole e la salata e tuto quelo che orto e fruteto pol dare in stajon: insuma l’è na botega da frutarolo incamesà co l’anguriara. E el paron el te garantisse: “Tuta roba nostrana, roba genuìna, fata chì intorno, de drio a casa.” E magari la vien da chissà dove.
Na volta invesse n’anguriara jera proprio e solo anguriara; al massimo te podivi catare i melun, ma basta. Gh’jera el cason, bastansa grande da tegner al coverto fruti e persone, col so bancon e le banchete parte par parte, co i scudieri col buso inte ’l mànego, tacà a pingulun al bancon, dove ch’a te pudivi catare anca un tòco de ban pan biscoto. Lì, sbregà n’anguria a metà co la cortelina, dopo che el languriaro l’eva batù su la scòrsa par sentire se la sonava ben e fato el tasselo par far mostrare al cliente ch’la jera bela rossa, uno el se sentava – ma jera raro ch’el fusse uno solo, parchè a l’anguriara se ghe ’ndaseva in conbrìcola – el ciapava in man el so scudiero, el lo fondava inte chela rossa delissia, el se sgionfava ’fà un rospo, el se beveva el toceto fin in fondo, magari dopo èsserse sugà el stómego con qualche grugnolo de pan biscoto, quelo duro, ch’a ghe voleva diese minuti parchè el s’insupesse int’el brodo d’anguria.
E cussì se meteva insieme el piassere de na sbicicletà in campagna, quelo de n’oreta in conpagnìa, la delissia de l’anguria, la sassietà del panbiscoto e po quelo de l’aria sana e d’un spuntin cussì pien e abondante ch’a no gh’jera caso de sentarse a tola par la sena, tanto con quelo ch’a gh’jera in corpo se rivava sicuramente fin a matina. Unico inconveniente la necessità d’andare a spànder aqua sinque, siè volte, conpresa la note, fin matina. E cussì fra i vari benefici gh’jera anca quelo diuretico!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Semo tuti piassè poareti
Tra crisi econòmica, conti in rosso, manovre coretive, finanziarie e taji a le spese, bufere polìtiche, inchieste e processi a furbeti, ladri e disonesti… có riva sera semo tuti piassè poareti
de Mario Klein
La nostra gente
Daniela Perdonà Guerra
Maestra par 40 ani in t’on paese dove se parla ancora dialeto
de Lucia Beltrame Menini
|
