La nostra gente

Daniela Perdonà Guerra
Maestra par 40 ani in t’on paese dove se parla ancora dialeto

Ne le do foto, la Maestra Daniela Perdonà Guerra co i so scolari, l’ultimo giorno de scola: 9 giugno 2010.

Nativa de Mezzane di Sotto (VR), l’è vissùa in te na fameja colma de valori e de interessi. Conossémola da vizin:

– Maestra Daniela, sto setenbre par ela no sonarà pi la canpanela de la scola, dato che oramai l’è rivà a la pension. Come se séntela?

“Me sento tanto emossionà e, calche olta, me scapa na lagrimeta… Quando mèrcoli 9 giugno, a le ore 12.20 è sonà la canpanela, m’è vegnù un gropo in gola… e ò dito fra de mi: – Ciao, scola cara, te si stà la me seconda casa…– Beh! Sti 40 ani i è propio volè, segno che i ò passè volentieri, che so’ stà ben con tuti. Alora posso dire che me sento anca sodisfata e orgoliosa.”
– In che ano s’ala diplomà Maestra e dove ala scominzià a insegnar?
“Me son diplomà Maestra nel 1969 e ò scominzià come suplente a Boscochiesanuova ne la Colonia del Consorzio Provinciale Antitubercolare de Verona. Lì me son incorta sùbito che l’era un laoro che me piaséa; ò venzo el Concorso, dopo me son sposà e son passà de ruolo. Tra i tanti posti, ò preferìo la scoleta de Beazzana, frazion de Roverchiara. L’è stà na esperienza bela assè. L’era na casa de coatro càmare, indo’ che ghe stava anca i bidèi: i cari Ezio e Augusta. Na càmara l’era la cusina, nantra la so càmara da leto. Una la ospitava la pluriclasse 1ª e 2ª e nantra la 3ª-4ª e 5ª. Quando èrene in aula se sentìa el profumo de quelo che l’Augusta stava cusinando: el brodo, el minestron, el rosto, el sugheto par la pasta… e de spesso mi e la me colega Mariagrazia faséino i assagini… Propio na bela fameja. L’Augusta l’era ’passionà de fiori, Ezio el coltivava l’orto, cussì ogni giorno tornàimo a casa piene de fiori e de verdura. Che bei tenpi! Dopo son passà a Bonavicina, dopo ancora a San Piero de Morubio, indó me son fermà par tuti sti ani: son stà propio fortunà.”
– Certo che el mondo de la scola l’à fato passi da gigante; la ne conta de la difarenza de quando l’era picola ela...
“Mi i ò sperimentà tuti sti passi: ò fato l’insegnante unica, ò sperimentà i moduli co’ 3 maestri su do classe; ò visto l’arivo de l’informatica, de la lingua straniera, i laboratori; la scola l’à parfin canbià nome: da ‘elementare’ l’è deventà Scuola Primaria. Quanti canbiamenti, ma mi digo che la scola elementare l’è na scola de qualità e la funziona ben. Quando mi ero pìcola, l’era tuta nantra roba! Se portava el massimo rispeto a la maestra e se faséa tuto quel che la disèa; no se se sognava gnanca de replicare o lamentarse!”
– Com’èli inveze i buteleti de ancó?
“Ò scominzià co le aste, i quadratini, i cerchieti, la bela caligrafia e dopo le létere de l’alfabeto. In aula se cognéa stare ziti, conposti, far tuto a la perfezion e, se se sbaliava, se rifaséa tuto e po’ la maestra te castigava. Èrimo tuti ubidienti e pieni de oja de inparar. I buteleti de anco’ i è ben difarenti. I è inteligenti, i ga tanti stimoli; de animo bon, i sa usar la tecnologia, ma i è massa agitè, i fa pi fadiga a scoltar, i se stufa in pressia e i se aplica par poco tenpo, i fa tuto pressapoco. Generazion diverse! Penso che, in generale, sia ora “de strenzar un po’ le strope - el diséa me nono, se se vol na scola che ga el conpito de formazion umana, morale e culturale.”
– Che ruolo ga avù el dialeto e la poesia in dialeto nel so percorso da insegnante?
“Nel me percorso el dialeto l’è senpre stà studià e valorizà, parché el fa parte de la nostra storia, la nostra vita, de l’anbiente indó che semo cressùi e dove vivemo. L’è fondamentale saver da indó te si vegnù. El dialeto el ghe piase tanto anca ai aluni stranieri. I le parla e i le capisse ben! I rècita con piaser le to poesie dedichè a San Piero.”
– Sò che l’à senpre insegnà co tanta passion e amor. Pénsela de réndarse ancora utile in canpo sociale?
“Sento de ’verghe ’ncora tante energie; no starò co le man in man. No me tirarò de certo indrìo… se ghe sarà bisogno de mi. No sò cossa farò, parché, a dir la verità son senpre indafarà. Coro de qua, de là. De sicuro usarò pi tenpo par la me fameja, me papà, i me interssi… e dopo se vedarà!”
– La ghe daga on consilio ai amici letori de Quatro Ciàcoe...
“Grazie a vualtri par ’verme dato apunto l’ocasion de far quatro ciàcoe. Par mi l’è stà un onor e un modo speciale par conclùdare in belessa la me cariera de maestra elementare a San Piero de Morubio.
– Grazie, maestra Daniela, par el so inpegno e la so mission de educatrice, longhi na vita passà tra i scolari de San Piero de Morubio.

[torna sopra]