|
Editoriale
Fin dove xela mia de mi la me vita?
Davanti a la tragica fine, disperatamente coerente, del grande regista Mario Monicelli, nessun giudizio, tanto rispeto e silenzio, ma…
 |
| El grande regista e senegiatore Mario Monicelli. |
Intorno a sta vicenda umana, xe nato un putiferio, parfin con discussion e interogazion parlamentari. Xe stà strumentalizà el dolore umano, la solitudine de l’omo anzian e la paura del “dopo”, tirando fora subito la question de la “eutanasia” e de la “dolce morte”, sostegnendo che se la lege gavesse permesso na libertà de selta, Monicelli no se gavarìa butà dal quinto piano de l’ospedale che ’l jera ricoverà.
Davanti a sta mancanza de delicateza, noaltri preferimo rèndare omagio a la sensibilità narativa del grande regista e inparare la lezion che Monicelli ne ga lassà, propio toléndose la vita.
La socetà e la politica le ga da canbiare sistema ne i confronti de i anziani, de i malà e de chi no ghe la fa da solo. I veci no ga mai da sentirse un peso, le fameje va sostegnù parché no le ceda ne la responsabilità de l’assistenza.
Più e prima de organizare la morte, ghe xe bisogno de organizare la vita, dàndoghe valore al principio de la solidarietà, pi che al dirito de libertà individuale. No ghe xe gnente che possa èssare pi de aiuto del calore umano, la vera cura che rispeta la dignità de la nostra vita. E par fare questo, ocore crédare in calcossa che va oltre el bàtito del cuore, ocore respirare on’aria de speranza.
Tuto el contrario de chi insiste nel dire che uno el ga da èssare lassà lìbero de decìdare come e quando métare la parola “fine” a la propia vita. Ma, semo propio sicuri che la decision de farla finìa la corisponda a un ato de libertà e de corajo, anziché na amission de sconfita?
E po’, in pratica, sto “diritto ad uccidersi” valo propio d’acordo co la definizion de libertà, secondo la quale, “la me libertà finisse dove scomizia la tua?” Parché, se questo xe vero, anca senza scomodare el “buon Dio”, in mèrito a la propietà, la me vita no la xe solo mia de mi, la xe anca de l’umanità.
El grande filosofo Immanuel Kant el diseva che “una cosa è lecita soltanto se può essere fatta da tutti.” Dunque, secondo Kant, el suicidio no ’l xe “un gesto lecito, perché se tutti lo commettessero l’umanità intera scomparirebbe.”
El stesso Giacomo Leopardi, che tuti savemo come che el jera ridoto fisicamente, el ga scrito in proposito: “Colui che si uccide da se stesso, non ha cura né pensiero alcuno degli altri; non cerca se non la utilità propria; si gitta, per così dire, dietro alle spalle i suoi prossimi e tutto il genere umano…”
Con tuto questo, ripetemo: nessun giudizio e tanto rispeto par chi desmonta prima de l’ultima fermata. Però, far passare el suicidio come un gesto normale, che ognuno xe libero de fare, come esercizio de selta e de libertà personale, va contro la morale sociale, oltre che religiosa, e no va ben mostrarlo come un esenpio, sbalià, da copiare… Gnente de più triste e de infelice, che no ghe auguremo a nissun, gnanca a chi se dichiara ateo e rifiuta el funerale.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Fin dove xela mia de mi la me vita?
Davanti a la tragica fine, disperatamente coerente, del grande regista Mario Monicelli, nessun giudizio, tanto rispeto e silenzio, ma…
de Mario Klein
Da Lendinara (RO)
Arie bone a Lendinara
Piaze, strade, monumenti: pìcole notizie zitadine
de Renato Scarpi
Da Verona
Gioventù stranba
de Giacinta Dall'Ora
|
