Da Lendinara (RO)

Arie bone a Lendinara
Piaze, strade, monumenti: pìcole notizie zitadine

Piaza Risorgimento a Lendinara.

Lendinara fin da i tenpi antichi, la ga avù fama de avere arie bone, tanto che raquante fameje nobili veronesi, vizentine e de altri posti vizini, le xe vegnù a refujarse in zità. Un esenpio famoso xe sta Borso d’Este che durante la peste del 1463, scapava da Ferrara, trovando dentro le mure de Lendinara, sicureza e salute. E pensare inveze che la zità, la gera circondà da paludi e canpi mal coltivà, che naturalmente, i rendéa l’idea ca se podesse catare solo arie malsane. Forse la risposta a sto fato, la se poe intivare ne la bravura de chi, ’ministrando sto posto, lo tegnéa puìto o faséa téndare la zente e la roba che vegnéa dentro. ’Na man a salvare la zità da la peste e da aluvion la ne xe stà dà, come se ga senpre credesto, anca da la Madona che, stasendo intel Santuario del Pilastrelo, benediva i Lendinaresi e, tanto la ga fato, che pa’ riconossenza i la ga messa intel stema del Comune.
Dopo sta premessa, traversando contrade e piaze, scuminziemo a cognóssare la zità, patria de nobili figure risorgimentài e artistiche. Doncana, quando entrè in Lendinara slarghè tranquilamente i polmoni inpenìndoi de i profumi de la zità e, caminando longo le strade del zentro, pensè a quando un tenpo distante, se vedéa córare pa’ ste contrade tori desperà inseguìi e morsegà da can rabiosi. No i jera miga cagneti, ma bensì mastini tegnù a suto de cicin, che da la fame i faséa a tòchi sti pori animài cornuti e, sto orendo rito se ripeteva ogni ano, pa’ la goduria de i Lendinaresi. Ma stè tranquili!, ’desso sta robaza no’ se fa più. Trovo giusto farve savere anca, che in un vecio statuto de la zità se ordinava de vegner drento in Lendinara solo pa’ le porte, e chi inveze passava co’ altre maniere, ca fusse de giorno o de note, el vegneva condanà al tajo de un piè o anca in casi più gravi a la morte. Ve informo che do porte le ghe xe ancora: s’a entrè da ovest ghe ne trovè una mal ridota, ca se ghe passè soto ris-cè de schincarve un piè e partanto, ve consijo de starghe a la larga e continuare la marcia, stasendo su la strada che costeja l’Adaseto. Cussì, ocezando de qua e de là del fiume, passè davanti a la Cesa de S. Biasio (antica parochiale siora de opere d’arte) rivando cussì sul ponte de piaza. A sto punto vardeve intorno, mirando la bela vision prospetica de i palazi ca se specia intel corso de aqua.

Santuario de la Madona del Pilastrelo.

Zo dal ponte ghe xe la Piaza Risorgimento, el vero saloto de la zità. Lì se alza, co i “merli in testa”, la seconda porta che fa parte de l’antica tore de l’orelojo e, prima de passarghe soto, fermeve a mirare i antichi palazi de la piaza. Sul liston, sora ’na colona de marmo, voltà da la parte del Castelo de i Estensi, a indicare el dominio de la Serenissima, se sforza ogni dì de ruzare el leon de S. Marco. E proprio dal Castelo trezentesco co’ la tore Maistra alta 25 m., (la xe solo ’na parte de la grande fortificazion messa in piè da Alberto d’Este), nel sec. XV vegnéa dà la sentenza de purgare le malefate a quei zitadini che no’ rispetava le legi. Se sarè i oci e ghe metì un fià de fantasia, podì sentire ancora i zighi de le done condanà a la tortura. La colpa la jera de avere fato l’amore co’ òmani ebrei, essendo cristiane. Queste le vegnéa frustà pa’ tre volte intorno a la piaza e butà in preson pa’ siè mesi. Anca a l’òmo ebreo ghe tocava sentire la scuria, co’ la zonta de pagare 100 lire e de farse un ano de galera e a fine pena el vegnéa mandà via pa’ senpre da Lendinara. Ma ’tenti! se la dona cristiana la gera maridà, l’ebreo vegnéa brustolà in mezo a la piaza co’ tanto de spetatori sistemà intornovìa. El spetàcolo el deventava manco inportante quando la condana vegnéa dà a l’omo cristian che, “spassàndosela” co ’na dona ebrea sposà, el ciapava solo tre frustà e messo in preson pa’ un ano.
Continuando la visita a la piaza, su la banda che varda l’ovest se trova el Palazo Munizipale co’ la Loja, costruìo nel Tresento, che ospita inte la Sala Canoziana ’na beìssima “grata monacàe intajà e sbusolà” fata dal grande Lorenzo Canozio Lendinarese (1426-1477) “pitore, mestro rinomà pa’ le tarsìe e tipografo”.
A drita del munizipio se trova via Garibaldi, una de le più vece strade de la zità. Traversàndola notarì nòbii palazi che la costeja e tra questi ne ricordemo uno: Ca’ Dolfin de fatura cinquecentesca col so fassinante parco ideà dal Japelli, che se vanta de èssare uno tra i più bèi esenpi veneti de jardin in stile romantico (inglese). Ritornè ’desso a la piaza Rissorgimento e passè soto la porta de la tore de l’orelojo, da qua puntè el vostro viajo verso la Cesa de Santa Sofia. Dopo aver passà la piaza de S. Marco, ciapè via Cavour da i bèi palazi antichi e, girando a zanca, rivarì in pazeta Albero Mario, grande patriota garibaldin. Se tirè diriti, a pochi passi da la piazeta trovarì la parochiale de S. Sofia che in dentro, la ga inportanti opere de pitura. In banda a la cesa, a sìnbolo de la potenza reijosa che sta parochia gaveva, essendo stà sede vescovìe, ’na robusta tore canpanaria co’ in ponta un angelo stronbazante se alza verso el zielo pa’ 101 m. Tornando inveze a la piazeta A. Mario, podì ciapare la via del Santuario che la porta drita drita al Santuario stesso. Da lì passè davanti a la casa de i Mario dove xe stà ospite parece volte el Carducci, al calore de Alberto e Jesse White Mario.
El Santuario de la Madona del Pilastrelo (1579) famoso posto de devozion e pelegrinajo, xe un pìcolo “scrigno” de arte, co’ statue, marmi ai muri, afreschi ai sofiti e telari preziosi inte i altari. Fora de la cesa, ’na tore canpanaria se alza pa’ 50,17 m. e lì vizin, el convento de i frati olivetani ne conpleta el sito. A sto punto dopo aver visità la zità e cognossù le robe più inportanti che Lendinara conserva, podì ciapare la strada de casa tranquili, avendo avù da la Madona del Pilastrelo l’indulgenza plenaria e ’na bona benedizion e, da la zità tuta intiera l’aria sana, come dise l’antica storia de l’Atene del Polesine cioè: Lendinara.

PS: al IAT (p.za Risorgimento) podì trovare notizie su orari e visite guidà.

[torna sopra]