|
Memoria euganea
El socolaro
 |
| Le sopèe? Le jera par guernare le bestie in stala. (foto Paolino Bianchin) |
Na volta, in piassa, el dì de marcà ghe jera anca el socolaro. El vendeva sgàlmare, sopèi, broche e cordoni de curame, ma anca scarpe par la festa, ma quele no bisognava gnanca sognarse de portarle i dì de lavoro, solo par ’ndare a messa o a calche ocasion speciale. E quando che le sòle le se consumava le se portava dal scarparo a métarghe le meze sòle, cossì on paro de scarpe le durava na vita. E vorìa dire adiritura che le se mandava in eredità a calche fiolo.
No se butava via mai gnente: tuto se rancurava e tuto el podéa deventare utile, come par esenpio el tabaro, el jera stabilìo che ’l ghe tocava al fiolo pi vecio, e par fare on discorseto, có se ’ndava al marcà, se ’ndava pi par curiosità, spece de inverno, quando in te i canpi ghe jera poco da fare, e se portava dal socolaro a metare sù el legno so le sgàlmare che le se gheva fruà, e da i scarpari i faséa anca sto mestiero; la tomera de ’a sgiàvara la jera de semoina, e quela la jera senpre bona, e se podéa canbiare el legno fruà.
I scarpari na volta i jera uno par contrà, i giustava scarpe e anca finimenti de cavài e anca altri strafanti de fameja.
Le sopèe? Le jera par guernare le bestie in stala, le jera còmode da inpirarse sù anca le sopèe le jera de legno co la tomera de curame duro, par via che a fare i mestieri in stala le jera còmode.
Ma, come ca diséa, al marca i banchi che i vendéa scarpe i jera rari, par via che on paro de scarpe el durava na vita e oltre, e i canolari i faséa afari, i vendeva tamisi, atressi de legno come méscoli e anca panareti, méscole da fare le tajadele, cope par el sale, broche par le sgiàvare, ma anca sachi, corde e calche volta anca calche paro de scarpe, ma lavorava anca i scarpari a solare le scarpe, canbiare i legni a sgiàvare e sopèe, e i dava da lavorare anca a de ’e persone che i jera magari sòti o sborossà, dato che ’l jera on lavoro de stare sentà, cussì anca sti pòari desgrassià i gheva la possibiità de ciaparse on franco.
Na volta, se sa, no ghe jera nessuna assistensa sanitaria; on omo cussì el gera sostegnù da la fameja, e l’unica risorsa la jera de ’ndare a fare el scarparo, e da putèo el ’ndava a botega a inparare el mestiere, ma fin che no ’l jera bon de fare calcossa, paga no se ne ciapava; se el bon paron el jera na s-cianta de umanità el ghe dava na mancia, ma i scarpari na volta no xe che i fesse oto ore. I lavorava da la matina bonora fin a la sera tardi; sti pòari invalidi i se credeva fortunà a catare on posto da scarparo.
La vita alora la jera grama par tuti; se se jera na fameja grossa e tuti i se dava da fare (grandi e pìcoli), se podéa dire che no se moriva de fame, spece quando on vecio el ’ndava a la casa de ricòvaro! La jera na granda tristessa. I jera tratà par misericordia, senò i se doveva dare da fare fin che i moriva; el Comune el ghe dava de cavare l’erba in mezo ai ciotoli davanti a ’e cese o al municipio; sti pòari veci sentà soto el sole so on cussinelo pien de paja. Mi a me ricordo ca jera putèo e i me faséa tanta pecà e oncora ’desso ca so’ vecio a me vien in mente ste disgrazie de tanta gente che tribulava.
Vardando i tenpi de ’desso che xe de pi quelo che se buta via, che quelo che se dòpara… ma se sa che el mondo el xe bàrbaro, e anca volendo no se poe farghe gnente e mandare zo i gropi in gola.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Fin dove xela mia de mi la me vita?
Davanti a la tragica fine, disperatamente coerente, del grande regista Mario Monicelli, nessun giudizio, tanto rispeto e silenzio, ma…
de Mario Klein
Da Lendinara (RO)
Arie bone a Lendinara
Piaze, strade, monumenti: pìcole notizie zitadine
de Renato Scarpi
Da Verona
Gioventù stranba
de Giacinta Dall'Ora
|
