Da Isola Vicentina (VI)

El sogno de ’a vita
Cantare al Teatro Olinpico

Do belìssime imàgini del Coro “Pueri Cantores”, direto dal M° Roberto Fioretto, al Teatro Olimpico de Vicenza.

Trionfale Concerto de i “Pueri Cantores” del M° Roberto Fioretto che, al Teatro Olinpico de Vicensa, ga festejà el 25° ano de ’a so fondassion. Serata da lupi, quéa del 31 otobre 2010, co na bufera de vento e pióva che ga ris'cià de stranpussare sotosóra chel che de bèo e co tanti sacrifissi sto brào coro gavéa parecià. Invesse la jente, che da senpre segue sti fantastici “Pueri”, xe coresta co entusiasmo e calorosa presensa, fasendo sentir tuto l’afeto che i gavéa par luri so ’l core. Particolare teneressa ga fato védare smissià a s'ciapiti in fra el pùblico veci coristi che, deventà baldi zovanoti opur ’fassinanti signorine, jera lì chieti, forse pa’ scóndare l’emossion che rento l’ànemo ris'ciava de comóvarli.
Fasendo ’n giro de ocio in fra ’l teatro pien de jente, se restava incantesimà da ’a grassiosa elegansa che ’l grande architeto Andrea Palladio jera riussìo ’nfóndare so sto giojelo pien de arte e funsionaità.
La jente ormai jera postà e no gavéa oci che par el palco, curiosa de védare spuntar el Coro co ’l so maestro. Cossì, có ’l presentatore prof. Massimo Celegato, esaurìo i preànboi, el ga ciamà so ’l palco i “Pueri Cantores” e, sùito dopo, el M° Roberto Fioretto, l’esplosion de on sincero e afetuoso batiman ga fato vegner ’e sgrìsoe a tuti quéi che al Coro ghe voléa ben.
E xe stà puro e dolcissimo el canto che sti setanta coristi ga ofrìo, caressàndoghe ’l spirito a la jente che inmagà scoltava, sentèndose trasportar da ’e note de sti brani de musica ecelsa, che ilustri Maestri de on tenpo gavéa lassà a la Storia.
’Ndemo conóssarli ’lora, sti geni grandiosi che ga lassà on valor che tuto el mondo conosse e ama. Par festejar degnamente el 25° ano de fondassion, el M° Fioretto se ga ispirà a sti luminosi autori: Johann Michael Haydn (1737-1806), Wolfgang Amadeus Mozart (1756-1791), Robert Alexander Schumann (1810-1856), George Frideric Händel (1685-1759), Leonard Bernstein (1918-1990).
So ’a musica de sti sinque autori, el M° Fioretto ga ’nprontà el concerto de sto ’venimento a longo spetà. Ghin xe vegnesto fora na roba carina, gentìe, co vossi carghe de emossion che ga tocà le pi alte sime musicài, da caressar l’ànima de chi scoltava e, dopo l’ultimo bis... tuti in pìe so ’n caloroso abrasso, contenti e sodisfà tanto da pensar che ’n doman, co orgolio i podarà dir: “Anca mi ghe gero.”
Ma da ’ndove xele partìe le raise de na tàe passion, insegnarghe na musica tanto sublime a de i toseti, gnanca la passiensa de Jobe sarìa rivà a tanto e... ben ga fato el presentatore a paragonare ’l M° Fioretto a ’n “sommo sacerdote” che consuma ’a so vita par la magnificensa del Signore, donàndose co tuta l’ànema par rivare a far del ben.
Penso che tuti gavemo el nostro destin, quéo de Roberto Fioretto xe scumissià có lu jera in seconda ’lementare e ’l so maestro, on serto Tamiozzo de Caldogno, el ga mandà ciamare so mama, disendo che sto toso gavéa na forte predisposission par la musica. Cossì el xe stà mandà a lession da uno che gavéa on po’ de pratica e che ga consilià de conprarghe na fisarmònica.
Dopo ’n po’ de tenpo, sentendo che a Malo ghe gera on serto Mario Lanaro che jera tanto brào, el xe stà portà da lu. In chela ocasion, volendo farghe fare bèa figura, el ga sonà, co ’a fisarmònica, le variassion del Carnevàe de Venessia.
Lanaro, dopo tri passaji, el lo ga fermà disendo: “Dighe a to popà che mi e ti ghemo robe pì ’nportanti par la testa.” Da lì, parecià dal M° Lanaro, el xe ’ndà rento al Conservatorio “A. Pedrollo” de Vicensa, indove in oto ani, invesse de i diese che i altri ghe metéa, el se ga diplomà in Pianoforte e Organo, consumando i du ani vansà a l’università de Cremona so ’a Storia de ’a Musica.
Có ’l xe tornà casa, el paroco del paese, Don Piergiorgio Belò, lo ga ’ncaricà de métar sù on coreto de toseti che portasse ’vanti le orassion e i canti, invojando i fedeli che assistéa a la Santa Messa, a na viva partessipassion.
In te i ani, fasendo ’n salto de qualità, el ga portà ’a sede del Coro a Vicensa, Lonigo, Montebelo, Mestre, coinvolgendo sentotrenta tusi da i sìe ani a... fin che i dura.
Inùtie contare che ’l Coro de Roberto Fioretto ga girà l’Italia e quasi tuta l’Europa, cantando so i pi grandi teatri.
L’aspirassion de sto Maestro la sarìa de nar rento so calche Ente, come ’a Scala de Milan e ’ver fra e man on coro de “Pueri Cantores” professionisti.
Lu dise che, co ’e tèniche aquisìe in tanti ani de amicissia co ’l Maestro tedesco del Tolzer, el farìa robe inimajinàbii... “Forse anca sto chì el podarìa èssare nantro sogno de ’a vita.

[torna sopra]