Da Verona

Gioventù stranba

Oltre che bela, l’è anca sinpàtica: na sàgoma insoma.

Dopo do stimane che no go notissie de la me amiga parché l’è stà a casa de so mama col pié... al col par via del volo zo da le scale del mese passà, vao a catarla. Come senpre quando la me vede, la me fa festa.
“Ciao, cara!” ghe digo mi. “Te si bela lustra e sponsaissa. T’eto godùo a casa vecia con to mama? T’ala tratà co i guanti bianchi? E to fradèi t’ai fato conpagnìa? Come valo el pié? E to marì elo vegnùo de ’olta tuto intiero da l’Àfrica?”
“A pian” la me risponde ela. “’Desso te conto. Donca, te sé che el me omo el gavéa da nar a far el giro de la Tunisìa e de la Libia in moto e, sicome ghe faséa cossa lassarme da par mi in quele condissioni che sensa pontel no s’era gnanca bona de nar al gabineto, el m’à molà a casa de me mama che par fortuna l’è ancora in ganba anca se la ga oramai 84 ani conpìi. A lu no ghe l’ò mia dito, ma no me son mai godùa tanto in vita mia. Me mama la m’à servìo e riverìo come na regina; ghe mancàa solo che la me portesse l’aqua con le rece. La m’à insegnà a far le rose de stofa par infornir i pacheti de Nadal; puoti e angioleti da tacar sora le cune; fiori de carta par festejar i vecioti de na casa de riposo... Pensa che dopo 15 dì, in ogni canton de la me càmara ghera sesti pieni de regaleti fati a man par tuti.”
“E par via del magnar?” ghe domando mi che sò che so mama l’è na coga de prima.
“L’era come èssar al ristorante” la me dise ela. “Prima de nar in lèto la toléa sù i órdini par el giorno dopo e a le 7 de la matina ghera za i 4 foghi del fornel che i naséa a tuta maneta. A disnar, ’nsieme a mi e ela, magnàa senpre anca una o do neodine. Na ’olta a la stimana la faséa gnochi par tuti. A sena s’érene in 6 sentè a tola: mi e ela, più la fameja de me soreleta che la stà sul stesso pato. Na domìnica ne semo catè in 20 a ber el tè co i biscotini.”
“Da resto sì na mucia” ghe zonto mi, che da tanti che i è, no son bona de ricordarme el nome de tuti.

Sti qua, cara zia, no i è mia ociài da vista ma de vero e me ’i meto par èssar un fiantin difarente…

“Anca massa, cara” la ritaca ela. “No ghera un minuto de tregua. A la matina ghera poco passajo, ma dopo magnà l’era come la procission del Corpus Domini: gente de tute le età, parenti a la vissina e a la lontana, con brassè de fiori, sporte de cachi e de naranse, botilie de ojo, botilioni de vin, scartossi de maroni.”
“Che belo!” salto fora mi.
“Mia massa, se te pensi che m’è tocà far 5 semifredi de cachi e 3 ‘monte bianco’ de castagne, ma senpre sentà zo, par no strapassarme. A èssar sincera però l’era un gusto védar i 13 neodi, de tute le età, che i vegnéa a saludar so nona e a contarghe ogni uno le so novità. A propòsito de novità ghe n’ò una de bele da contarte.”
Mi vardo l’orolojo: l’è tardeti ma me rassegno a ’scoltarla anca sta ’olta.
“Alora”, la scominsia ela, “un sabo vien a catarne na neoda che, oltre che bela, l’è anca sinpàtica: na sàgoma insoma. ’Ntanto riva anca me soreleta con le do picenine, inamorè de so cusina piassè granda, e la nona Francesca la mete sù el pignato par el tè. Fin che spetemo che se scalda l’aqua, ciaciaremo tra noantre. Me sorela la se incorze che la butelota la ga ’ntorno i ociài da vista, quando fin al giorno prima la ghe vedéa benon, perciò ela, che la se ne intende parché l’è abastansa orba e che in fameja l’è soranominà ‘Sheridan’ par i so interogatori, la taca a domandarghe da che oculista l’è stà, se l’è brao, quanto el tol a la vìsita, se l’è in centro o fora, se ghè comodità de parchegio, se el so anbulatorio l’è neto, se el ga la segretaria, se el laora a l’ospedal e in qual, se bison spetar tanto par averghe un apuntamento, se l’è zóino o vecio, se l’è maridà e el ga fiói, se el ghe par na persona seria, se l’è suto o batolon, se l’è magro o cicion, se l’è brusco o el ga na bela maniera, se l’è ben vestìo o stramanon, se el ghe par na petorina o un sanfasson e – finalmente – che disturbo el ga catà che el ga ordinà i ociài. E seto ’sa la ghe risponde la neoda?”
“Cara zia, go da dirte che no son stà da gnissun oculista parché ghe vedo ben come un falcheto, che go i oci sani, che sti qua no i è mia ociài da vista ma de vero e che me ’i meto par èssar un fiantin difarente: par cavarme fora dal masso, insoma!”

[torna sopra]